«استانا ەكسپو-2017» ۇلتتىق كومپانياسىنىڭ بۇرىنعى باسشىسى تالعات ەرمەگيايەۆكە قاتىستى سوت ۇكىمى 10 ماۋسىمدا شىعادى، - دەپ حابارلايدى Qamshy.kz.

ەرمەگيايەۆتىڭ ءىسى بويىنشا ۇكىم كەلەسى اپتانىڭ جۇماسىندا، 10 ماۋسىم كۇنى ساعات 16.30-دا جاريالانادى. بۇل تۋرالى بۇگىن تالعات ەرمەگيايەۆتىڭ ءىسى بويىنشا سوت وتىرىسى بارىسىندا ءمالىم بولدى.

ەستەرىڭىزگە سالا كەتەيىك، استانا قالاسىنىڭ  قىلمىستىق ىستەر جونىندەگى مامانداندىرىلعان اۋدانارالىق سوتىندا «ەكسپو-2017» ۇك» اق-نىڭ بۇرىنعى باسشىسى تالعات ەرمەگيايەۆ پەن تاعى 22 ادامنىڭ بيۋدجەت قاراجاتتارىن اسا ءىرى كولەمدە جىمقىرۋ ءىسى بويىنشا  تىڭداۋ جالعاسىپ جاتىر. «ەكسپو-2017» ۇك» اق-نىڭ بۇرىنعى باسشىسى تالعات ەرمەگيايەۆكە قاتىستى قىلمىستىق ءىس بيىلعى جىلدىڭ  10 ناۋرىزىندا استانا قالاسى قىلمىستىق ىستەر جونىندەگى مامانداندىرىلعان اۋدانارالىق سوتىنا تاپسىرىلعان بولاتىن.

4 ساۋىردە وتكەن العاشقى سوت وتىرىسىندا 14 سوتتالۋشى ءوز كىنالەرىن مويىنداپ، ىستەگەن ىستەرى ءۇشىن وكىنەتىندىكتەرىن مالىمدەگەن. ولار تالعات ەرمەگيايەۆكە  پارا بەرىلگەنىن مويىنداپ،  ءبىرقاتار جالعان اكتىلەر جاسالعانى، زاڭسىز اقشانى قولما-قول اقشاعا اينالدىرۋ جۇيەسى تۋرالى ايتىپ بەرگەن ەدى.

جالپى العاندا اتى شۋلى ءىس بويىنشا باس ايىپتالۋشىعا 4،2 ميلليارد تەڭگەنى قالتاسىنا باستى دەگەن ايىپ تاعىلىپ وتىر. ايىپتاۋشى تاراپتىڭ ءۋاجى بويىنشا، ول قىزمەت بابىن پايدالانىپ اقشا ۇرلاعان.

سوتتا سويلەگەن سوڭعى سوزىندە ت. ەرمەگيايەۆ وزىنە تاعىلعان ايىپتاردىڭ ەشقايسىسىمەن كەلىسپەيتىنىن، ءوزىن تەمىر توردىڭ ارعى جاعىنان كورگىسى كەلەتىن مۇددەلى توپتاردىڭ بار ەكەنىن مالىمدەدى. 

بارلىعى اتالعان ءىس جۇمىس جۇرگىزۋ بارىسىندا قولداۋ ءۇشىن مەردىگەر كومپانيالاردان پارا الۋعا بايلانىستى ءىرى بەس ەپيزودقا بولىنگەن.