قىزىلوردالىق «قايساردىڭ» بيىلعى «قارا مارجانى» - مامۋتۋ كۋليبالي قازاققا كۇيەۋبالا بولعىسى كەلەتىنىن ءمالىم ەتتى. كلۋبتىڭ رەسمي سايتىندا جاريالانعان سۇحباتىندا ول جاڭا كوماندا  تۋرالى ويى مەن قازاق قىزىنا عاشىق ەكەنىن ايتىپ بەردى.

«شىنىن ايتسام، قازاق ءتىلىن تۇسىنبەگەندىكتەن العاشقى جىلى وتە قيىن بولدى. ءتىپتى، التى ايدان كەيىن كەتىپ قالعىم دا كەلدى. ءبىراق بەرتىن كەلە ۇيرەنىسىپ كەتتىم. ءقازىر ينشاللاح، قازاقستانعا تولىق ءسىڭىسىپ كەتتىم. ءتىپتى، بولاشاق جارىم دا قازاقتىڭ قىزى ەكەنىن ايتقىم كەلەدى»، - دەپ اعىنان جارىلدى مامۋتۋ كۋليبالي.

سپورتشىنىڭ ايتۋىنا قاراعاندا، ونىڭ پاۆلودارلىق ءمادينا ەسىمدى ارۋمەن كوڭىل جاراستىرىپ جۇرگەنىنە ەكى جىل بولعان.

ءتىلشىنىڭ «قازاق ءتىلىڭ قالاي؟» دەگەن سۇراعىنا فۋتبولشى: «قازاقستان - مەنىڭ التىنشى ەلىم. ءار ەلدىڭ چەمپيوناتىندا ويناپ ءجۇرىپ، بىرنەشە ءتىلدى مەڭگەرىپ الدىم. ورىسشا بىلەمىن، فرانسۋز، مالي، اعىلشىن تىلدەرىنە سۋدايمىن. تۇرىكشەنى دە تۇسىنەتىن حالدەمىن. پاۆلوداردا جۇرت كوبىنە ورىس تىلىندە سويلەسەدى. سوندىقتان، ۇيرەنە المادىم. قىزىلوردا ناعىز قازاقي قالالاردىڭ ءبىرى عوي. كوپ ۇزاماي، قازاق ءتىلىن دە ۇيرەنىپ الارمىن»، - دەپ جاۋاپ بەردى.

inform.kz