پۋتينشالدىڭ "شاريك" كۇشىكتەرى قازاقستانعا قاراپ شاۋىلدەۋىن قايتا باستادى. ورىستىڭ ساياساتكەر-سىماعى ەدۋارد ليمونوۆ قازاقستاننىڭ سولتۇستىگى مەن شىعىسىن ءبولىپ الۋ كەرەك ەكەندىگىن ايتقان بەينەماتەريالى عالامتوردى كەزىپ ءجۇر.
بۇل ماتەريالدا ليمونوۆ: "ورىستار وزدەرى نەگىزىن قالاعان قالالار مەن اتىن اتاعان جەرلەردى قايتارىپ الۋ كەرەك. ورىستار قونىستانعان ەلدى–مەكەندەر رەسەيگە قايتارىلۋى ءتيىس. اكتيۋبينسك، پەتروپاۆلوۆسك، سەميپالاتينسك، پاۆلودار، ۋست-كامەنوگورسك ... – بۇلار ورىستىڭ قالالارى. قالايشا ول قازاقستاننىڭ جەرى بولۋى كەرەك؟" – دەپ ءبوستى ليمونوۆ.
بۇل ليمونوۆتىڭ ءبىرىنشى رەت قازاقستانعا كوز الارتۋى ەمەس. وسىعان دەيىن اقپان ايىندا: “قازاقستاندا مەملەكەتكە قولايسىز ديەۆالۆاسيا، پرەزيدەنت نازاربايەۆ قارتايىپ بارادى، ناقتى مۇراگەرى جوق”،- دەپ جازعان. Facebook پاراقشاسىندا. ول: "ۋكراينانىڭ دا تاعدىرى رەسەيمەن بايلانىستى، شىعىس ايماقتارى دا ماسكەۋدىڭ قول استىنا كىرۋ كەرەك" دەگەن بولاتىن. بۇل ساندىراعى ايداي انىق كەلدى.
سىرتقى ىستەر مينيسترلىگى ماماندارى رەسەيلىك ارىپتەستەرىنە ليمونوۆ “ۇسىنىسىنىڭ” پوزيسياسىنا قاتىستى ءتۇسىندىرۋدى تالاپ ەتكەن نوتا جولداۋدى ۇيعارعان بولاتىن. سويتە تۇرا، “رەسەي – ءبىزدىڭ دوسىمىز، قازاقستاننىڭ وداقتاسى ءارى ستراتەگيالىق سەرىكتەسى. ليمونوۆتىڭ اقىلعا سىيمايتىن مالىمدەمەسىنىڭ رەسەيدىڭ قازاقستانعا قاتىستى سىرتقى ساياسي باعىتىنا قاتىسى جوق. ءبىز رەسەيلىك سەرىكتەرىمىزدىڭ ليمونوۆتىڭ وعاش ارەكەتىنە ءتيىستى باعاسىن بەرەتىنىنە ەشقانداي كۇمان كەلتىرمەيمىز”، -دەپ مايموڭكەلەگەن مينيسترلىكتەگىلەر. الايدا، رەسەي تاراپى ءمىز باققان جوق، پىسقىرىپ تا قارامادى. بۇدان كەيىن "جۋاس تۇيە جۇندەۋگە جاقسى" دەيتىن ۆ.جيرينوۆسكيي دە قازاقستاندى قوسىپ الۋ كەرەكتىگىن ايتتى. وعان تاعى ءبىراز داۋرىعىپ باسىلدىق، ءبىزدىڭ تاراپ تاعى ءلام– ميم دەي المادى.
ليمونوۆ ءبىزدىڭ ءسىم–ءنىڭ بۇل دارمەنسىزدىگىن دە تىلگە تيەك ەتۋدى ۇمىتپادى: "قازاق ءسىم رەسەيدىڭ ءسىم–نە حات جولداپتى. ال، ولار ماعان نە ىستەي الادى؟ وزدەرىنىڭ كەلىسكەندەرىن قۇلاعىما سىبىرلاپ ايتا ما؟
بۇل نە باسىنۋشىلىق؟ قاشانعى ءبىز وسىنداي قورلىقتى كورە بەرەمىز؟ "ۇرا بەرسە، كيىز قازىق تا جەرگە كىرەدى". ءبىزدىڭ كەيبىر تاريحتى بىلمەيتىن، ءتىل مەن دىلدەن دىلدەن جۇرداي ازاماتارىمىز ليمونوۆتىڭ وسىنداي داقپىرتىنا سەنىپ قالماسىنا كىم كەپىل؟ الەم نە ويلايدى؟ قازاقتىڭ كسرو قۇرامىندا بولعانىن جاقسى بىلەدى. ليمونوۆ سەكىلدىلەردىڭ "ابسۋردتارى" راس دەپ قابىلداپ، سوڭى لاڭعا اينالماسىنا كىم كەپىل؟
"قامشى" سىلتەيدى
