ق ر پارلامەنتى سەناتى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە الەۋمەتتىك قامسىزداندىرۋ ماسەلەلەرى بويىنشا وزگەرىستەر ەنگىزۋ تۋرالى» زاڭىن قابىلدادى.
ق ر ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا دەپۋتاتتار نازارىنا ۇسىنعان زاڭ ق ر نەكە جانە وتباسى كودەكسىنە جانە حالىقتى الەۋمەتتىك قامسىزداندىرۋ مەن ازاماتتاردى الەۋمەتتىك قولداۋ ماسەلەلەرى جونىندەگى 6 زاڭعا زەينەتاقى مەن الەۋمەتتىك تولەمدەردى ارتتىرۋعا باعىتتالعان وزگەرىستەر مەن تولىقتىرۋلار ەنگىزۋدى كوزدەيدى.
«زەينەتاقى تولەمدەرىنىڭ مولشەرلەرىن وسى جىلدىڭ باسىنان باستاپ ارتتىرىلعانىن ەسەپتەگەندە بازالىق زەينەتاقىنى 12 پايىزعا دەيىن، ەڭبەك زەينەتاقىلارىن 14 پايىزعا دەيىن ارتتىرۋ كوزدەلگەن. وسىعان بايلانىستى زەينەتاقىمەن قامسىزداندىرۋ تۋرالى ق ر زاڭىنا زەينەتاقىنى ەسەپتەۋ ءۇشىن قولدانىلاتىن تابىستىڭ شاماسىن اعىمداعى جىلدىڭ 1 ساۋىرىنەن باستاپ 39-دان 41 ايلىق ەسەپتىك كورسەتكىشكە دەيىن كوبەيتۋ بولىگىندە وزگەرىستەر ەنگىزىلەدى. بۇل زەينەتكە اعىمداعى جىلدىڭ 1 ساۋىرىنەن كەيىن شىعاتىن ازاماتتاردىڭ زەينەتاقىسىن بۇعان دەيىن زەينەتكە شىققان ازاماتتاردىڭ زەينەتاقى تولەمدەرىمەن تەڭەستىرۋگە مۇمكىندىك بەرەدى»، - دەدى مينيستر.
ونىڭ اتاپ وتۋىنشە، قابىلداناتىن شارالار بازالىق زەينەتاقى تولەمى مولشەرىن 10450 تەڭگەگە دەيىن نەمەسە 12 پايىزعا كوتەرۋ ماسەلەسىن قاراستىرادى. ال ەڭبەك زەينەتاقى مولشەرىن 46661 تەڭگە كولەمىندە قامتاماسىز ەتەدى.
قازاقپارات
