Kingdom Tower جوباسىنىڭ جۇزەگە اسىرىلۋى - ءۇش جىلدان بەرى شەشىمىن تاپپاي كەلە جاتقان ماسەلە ەدى. مىنە، ەندى عانا جوبا تولىققاندى تۇردە قولعا الىندى، دەپ جازادى hi-news.ru.

ساۋد ارابياسىنداعى دجيددا قالاسىندا سالىنۋى ءتيىس بۇل عيمارات تۋرالى ءسوز سوناۋ 2000 جىلدارى-اك قوزعالعان ەدى. 2008 جىلدان بەرى ول بىرنەشە رەت قولعا الىنىپ، تۋىنداعان قيىندىقتارعا بايلانىستى بىرنەشە رەت توقتاپ قالعان. ءدال قازىرگى ساتتە Kingdom Tower عيماراتىنىڭ بيىكتىگى شامامەن 1007 مەتر بولادى، دەپ كۇتىلىپ وتىر. دەسەك تە، ينجەنەرلەر ونى بۇدان دا بيىك ەتىپ سالماقشى ەدى، بەلگىلى ءبىر سەبەپتەرگە بايلانىستى ول ويلارىنان باس تارتقان ءتارىزدى. الايدا بۇل مۇنارانىڭ الەمدەگى ەڭ بيىك عيماراتقا جاتقىزىلۋىنا بوگەت بولا المايدى. Kingdom Tower-دەن كەيىنگى ەكىنشى ورىندا بيىكتىگى 828 مەتر بولاتىن بۋردج-حاليفا عيماراتى تۇر. ال ءۇشىنشى ورىندى 2015 جىلى سالىنىپ بىتەتىن، بيىكتىگى 660 مەترگە دەيىن جەتەتىن پينان قارجى ورتالىعى يەلەنەدى. ايتا كەتەيىك، Kingdom Tower قۇرىلىسىن بريتاندىق EC Harris and Mace كومپانياسى اعىمداعى جىلدىڭ 27 ساۋىرىندە باستاماق.