سىرداريا اۋدانى ايدارلى اۋىلىنىڭ تۇرعىنى،  قولونەر شەبەرى روزا ءالباتىروۆانىڭ كىلەمدەرى جۇڭگو، گونكونگ، انگليادا دا سۇرانىسقا يە بولىپ وتىر، دەپ حابارلايدى اۋداندىق اكىمدىكتىڭ باسپا ءسوز قىزمەتىنەن.

 ۇمىتىلا باستاعان ءداستۇردى جانداندىرعىسى كەلگەن قولونەر شەبەرى تۇكتى كىلەم توقۋدا الەمگە تانىمال. رەسپۋبليكاعا ەسىمى ايگىلى روزا ءالباتىروۆا 2012 جىلدىڭ ساۋىرىندە قوعامدىق كەڭەس قۇرىپ، حالىقارالىق بايقاۋلارعا قاتىسا باستادى. بىلتىر امەريكادا "USAID" شاعىن بيزنەستى دامىتۋ ورتالىعىنان جوبا ۇتىپ الدى. وسى كۇنى ونىڭ قولىنان شىققان دۇنيەلەر رەسەي، جۇڭگو، انگليا، گونكونگ، قىرعىزستان جانە تاعى باسقا دا مەملەكەتتەردە سۇرانىسقا يە.

كىلەم توقۋمەن قاتار ول توسەك-ورىن، باۋ-باسقۇر، قورجىن جاساۋعا ۇسىنىستار دا قابىلدايدى. وسى جۇمىستاردى جاساۋعا روزا ءالباتىروۆا ارنايى سەح اشقان. وندا ازىرگە اۋىلدىڭ ءتورت تۇرعىنى جۇمىسپەن قامتىلعان. اۋىلدا ءوزىنىڭ ونشاقتى شاكىرتى بار، دەلىنگەن حابارلامادا.