اسا، مارتەبەلى وقىرمان!
«قامشى» سايتىنىڭ 微信 بەتىندەگى وقىرمان سانى ون كۇننىڭ ىشىندە مىڭنان استى. بۇل كۇندەلىكتى Web-سايتىمىزدى قارايتىن 2000 وقىرماندى قوسپاعانداعى مالىمەت. ءاۋ باستان الەمدەگى بار قازاقتىڭ تۇتاستىعىن تۋ ەتكەن اقپارات الاڭىمىز اللانىڭ قولداۋىمەن وسىلايشا كۇن ساناپ وركەندەپ كەلەدى. بۇل، ارينە وزدەرىڭىز سياقتى ناعىز ۇلت جاناشىرلارىنىڭ ەڭبەگى. ۇلتقا ءۇنسىز قىزمەت ەتۋ – جازىلماعان زاڭ. وسى تۇرعىدان العاندا «قامشىنىڭ» 微信 قوسىمشاسىن دوس-جاران، اعايىن-تۋىستارىنا جىبەرىپ، اتسالىسقان ازاماتتاردى الاش بىرلىگىنە قالتقىسىز قىزمەت ەتكەندەر دەپ تۇسىنەمىز.
ءبىز ەشقانداي مەملەكەتتىڭ، ەشقانداي ۇلتتىڭ، ەشقانداي بيلىكتىڭ جاۋى ەمەسپىز. ءبىز ادام بالاسىنا بەيبىتشىلىك، ىنتىماق، نۇرلى بولاشاق قانا تىلەيمىز. دەگەنمەن، بىزدەر ءۇشىن ەڭ ماڭىزدىسى - سول ادامزات وركەنيەتىنەن ويىپ ورىن الاتىن قازاق دەيتىن حالىقتىڭ ەرتەڭى.
ءبىز 微信 بەتىندەگى وقىرماننىڭ كوبەيگەنى ارقىلى ەشقانداي قارجىلىق تابىسقا قول جەتكىزبەيمىز. ءبىز web-سايت بەتىن قارايتىن مىڭ سان وقىرمان ارقىلى ەشقانداي ەكونوميكالىق كىرىس كىرگىزبەيمىز. بىزگە كەرەگى – سايت بەتىن قارايتىن وقىرمان سانى مىڭداپ ارتىپ، قازاقستان سايتتارىنىڭ ىشىندە رەيتينگىمىز جوعارى بولسا، سول ارقىلى بۇگىنگى بيلىككە ءسوزىمىزدى وتكىزىپ، قازاق كوشىنە قامشى سالساق، قازاقتىڭ جاعدايىن جاقسارتساق دەگەن ارمانشىل كوڭىل عانا.
ءبىز مەملەكەت تاراپىنان نەمەسە بەلگىلى توپتار تاراپىنان ەشقانداي قارجىلىق دەمەۋ كورگەن جوقپىز. ياعني ەشقانداي مۇددەلى توپقا جۇمىس جاسامايمىز. ءتيىستى قارجىنى ۇلتىم دەگەن ساناۋلى ازاماتتاردىڭ تيىن-تەبەنىمەن قۇراپ وتىرمىز.
ءيا، «ءبىز» دەپ وتىرعانىمىز - ءسىز، ول جانە مەن، ءاربىر قازاق...
«بۇل ورالمانداردىڭ سايتى»، «شەتەلدەن كەلگەندەردىڭ سايتىنا كىرمەيمىز، ماقالا بەرمەيمىز» دەگەن سوزدەردى دە ەستىدىك. وعان بولا جاسىعان جوقپىز. قىلىشىنان قان تامعان كەڭەس وداعىنىڭ وزىندە «5 ميلليون قازاق تىلەگى كەمشىلىك جولىنا سىيمايدى» دەگەن الاشوردا كوسەمى ءاليحان بوكەيحاننىڭ ءسوزىن مەدەت تۇتتىق. ياعني ميلليونداعان قازاق ءبىر تىلەكتە، ءبىر نيەتتە بولسا ول ەشقانداي كەمشىلىك ەمەس. مەيلى دۇنيەجۇزىنىڭ قاي جەرىندە جۇرسەدە ميلليون الاش ۇرپاعىنىڭ ءسوزى ءبىر جەردەن شىقسا بۇل كەرى كەتكەندىك ەمەس جەتكەندىك. سونى اڭعارعاندىقتان دا، 微信 قولدانۋشىلاردىڭ كوپ ساندىسى جۇڭگو قازاقتارى ەكەندىگىن ەسكەرىپ، اقپاراتىمىزدى احمەت بايتۇرسىنوۆ الىپبيىمەن تاراتىپ وتىرمىز. وسى ورايدا 21 عاسىر دەيتىن اقپارات زامانىندا قازاق جۇرتىنىڭ ءوزارا پىكىر الىسۋىنا تۇسىنىستىكپەن قاراپ وتىرعان جۇڭگو ۇكىمەتىنە دە ايتار العىسىمىز بولەك.
ءالقيسسا، «قامشى» اۋەل باستان قازاقتىڭ عىلىم-بىلىمىنە، ادەبيەت-مادەنيەتىنە، نامىسىنا، ەڭ باستىسى «ۇلى كوشىنە» قامشى باسۋ ماقساتىمەن اشىلعان. ءالى دە سول ماقسات، سول مۇددە. ەندەشە، وسى جۇمىستىڭ كۇتكەن بيىگىنەن كورىنۋىنە اتسالىسىپ جاتقان وزدەرىڭىزگە – مىڭ سان قازاققا تاعى ءبىر مارتە العىس!
«قامشىنىڭ» ۇرانىن ويلاعانىمىزدا «ۇل بولساڭ قولىڭدا، قۇل بولساڭ توبەڭدە وينايدى» دەگەن ءسوز سانامىزعا عايىپتان قۇيىلىپ ەدى. «قامشىنى» قولىندا ويناتقان قازاق، التى تاسپا بۇزاۋ ءتىستى توبەسىنە ۇيىرگىزبەيتىنىنە كوزىمىز جەتىپ كەلەدى.
ايتا كەتەرلىگى، 微信 قوسىمشاسىنداعى وقىرماندار سانى «قامشى» پورتالىنىڭ قازاقستانداعى رەيتينىگىسىنە ەشقانداي اسەر ەتپەيدى. ەگەر ماقالانىڭ استىنداعى 阅读原文 دەگەن ءسوزدى باسىپ جاتساڭىز ونىڭ ءجونى ءبىر باسقا. وندا «قامشىنىڭ» ناقتى web-سايت بەتىنە وتكەن وقىرمان بولىپ سانالاسىز. ياعني رەيتينگ ءبىر ساتىعا بولسا دا كوتەرىلەدى، بيلىكتىڭ ءبىر ادامى بولسادا قازاق ۇنىنە نازار اۋدارادى دەگەن ءسوز.
ال كەيبىر ۇيالى تەلەفونداردا قارىپتەرىمىز دۇرىس كورىنبەي جاتسا، ول ءۇشىن كەشىرىم سۇرايمىز. جوعارىدا ايتقانداي ءبىز تەك ساناۋلى ازاماتتاردىڭ كومەگىنە عانا سۇيەنەمىز. سونىڭ سالدارىنان ادام كۇشى دە، تەحنيكالىق قۋاتىمىز دا جەتىسپەي جاتادى.
ۇمىتىپ بارادى ەكەنبىز، «قامشى» قازاقستان رەسپبۋليكاسىنىڭ مادەنيەت جانە اقپارات مينيسترلىگىنەن قازاقستانداعى جانە شەتەلدەگى قازاقتارعا اقپارات تاراتاتىن «اقپاراتتىق اگەنتتىك» مارتەبەسىن العان. بۇل مارتەبە ءۇشىن دە 2 جىل تىنباي قىزمەت ەتۋگە تۋرا كەلدى. ەسەسىنە سايدا سانى، قۇمدا ءىزى جوق اقپارات الاڭى ەمەسپىز. ءبىزدىڭ ءۇنىمىزدى تىڭداپ، تىلەگىمىزگە قۇلاق تۇرەتىن قازاق بيلىگى بار.
قۇرمەتتى، وقىرمان!
قازاقتىڭ بۇگىنگى تاۋەلسىزدىگىنىڭ نەگىزىن قالاعان – 1917 جىلى قۇرىلعان الاشوردا ۇكىمەتى. ال الاشوردا ۇكىمەتىنىڭ ىرگەتاسىن قالاعان اتاقتى «قازاق» گازەتى بولدى. وسى باسىلىمنىڭ جارىق كورىپ، تارالۋىنا تەك قازاقستانداعى عانا ەمەس قىتايداعى قازاقتار دا دەر شاعىندا قول ءۇشىن سوزدى. «600 سوم جىبەردىك»(6000 قويدىڭ باعاسى) دەپ ۇكىلى سالەم جولداعان التاي مەن كۇنەس جۇرتىنىڭ حاتى سونىڭ دالەلى. ول ۋاقىت - يمپەريالىق رەسەيدىڭ «جەندەتتىك پيعىلى» ۇشىنا جەتكەن كەزەڭ ەدى...
قۇدايعا ءتاۋبا! ءقازىر باسقا ءداۋىر. وركەنيەتتى مەملەكەتتەر دەموكراتيا پرينسيپتەرىن ۇستانادى. بىزگە 600 سوم جىبەرىپ قاناتىمەن سۋ سەپپەسەدە، وقىرماننىڭ سايت بەتىنە كىرىپ، ءار ماقالاعا ءتيىستى پىكىر بىلدىرگەنى قاجەت. ويتكەنى، بۇل - ءسىزدىڭ «قامشىڭىز»! بۇگىنگى اقپارات داۋىرىندە وزگە ۇلتتارمەن تەڭ تۇرامىز دەسەك، «قامشىمىز» ءاردايىم قولىمىزدا ءجۇرسىن. ول - قۇرال، ول - قاسيەت. قولىندا قانداي دا ءبىر مۇمكىندىگى بار ءاربىر قازاق «قامشىعا» اتسالىسىپ جاتسا قۋانا قۇپتايمىز. ويتكەنى بۇل بار قازاقتىڭ «قامشىسى».
