كەشە دراماتۋرگ دۋلات يسابەكوۆ اعامىز ەلباسىمەن سۇحبات بارىسىندا سىرتتا جۇرگەن 5 ميلليون قانداستارىمىزدىڭ ەلگە ورالۋعا نيەتتى ەكەنىن جەتكىزدى. تاۋەلسىزدىكتى العاننان بەرى ەلگە ورالعان قانداستاردىڭ ۇلكەن بولىگى امان-ەسەن كەلىپ، قونىستانىپ الدى. بۇگىندە ەل ەكونوميكاسىنا ءار سالادا ەلەۋلى ەڭبەك ءسىڭىرىپ جاتىر. سولتۇستىك وبلىستارداعى قالالار مەن اۋداندارداعى سىرتتان كەلگەن قانداستارىمىز قونىستانىپ، ءبىرشاما قازاقىلاندىرعانىن كورىپ ءجۇرمىز. الايدا سوڭعى جىلدار كوشى-قون ماسەلەسى سايابىرسىپ قالعانى جاسىرىن ەمەس.

   بۇل وزگەرىستەردىڭ كوبى الىستاعى اعايىننىڭ ەلگە ورالۋىنا تەجەۋ بولىپ جاتقانى وكىنىشتى. ەلباسى ءاربىر قۇرىلتايدا قانداستارىمىزعا قۇجات تاپسىرۋدا، تىركەۋگە تۇرۋدا، ازاماتتىق الۋدا كەزىگەتىن ءتۇرلى كەدەرگىلەردى جويۋعا جۇمىس جاساۋ قاجەتتىگىن ايتۋمەن كەلەدى. ازاماتتىق الۋ ءۇشىن قانداستارىمىزعا 5 جىل كۇتۋ قاجەت، سونداي-اق ورالمانداردىڭ كوشىپ كەلۋ كۆوتاسى دا جويىلعان ەدى. ەندى بۇل كەدەرگىلەر الىنىپ تاستالماقشى.  اعايىندار، ءسۇيىنشى!

 قازاقستانعا كەلگىسى كەلمەي تۇرعان قازاق جوق، جىبەرمەي وتىرعان شەتەل جوق. شەتەلدەگى قانداستاردىڭ ءبارى كوزدەرى جاۋدىرەپ ءبىر شاڭىراق استىنا توپتاسقىسى، بالالارىن ازات ەلدىڭ اۋاسىمەن تىنىستاتقىسى، ءبىر ناندى بولىسكىسى كەلەدى. تەك كەرەك قىلماي وتىرعان ءبىزدىڭ ورىستانعان بيلىك، ەشبىر اقىلعا سىيمايتىن جاعداي. سان عاسىرلار اتا-بابالارىمىزدىڭ اتتىڭ ۇستىندە ءجۇرىپ اششى تەرىمەن قىزىل قانىمەن قورعاعان ءبىراز جەرلەر كورشىلەردىڭ قانجىعاسىنا كەتكەنىمەن، قالعان اتىراۋ مەن التايدىڭ اراسى تاقيامىزعا تار كەلمەيدى. وسى جەردى ساقتاپ قالساق، يگى ەدى.

   تالاي تار جول، تايعاق كەشكەن بابالار، قيىن-قىستاۋ زاماننىڭ كەسىرىنەن الەمگە تارىداي شاشىلعان. ءوزىم وسكەن وزبەكستان رەسپۋبليكاسى، ناۆويي وبلىسى، تامدىبۇلاق اۋدانىنداعى سىنىپتاسىم، بايمۇرزايەۆ نۇرقيسا عالامتوردا ماعان «قازاق جەرىن ءبىر كورىپ، توپىراعىندا اۋناسام، ءبىر كەسە سۋىن ءىشىپ، اۋاسىن جۇتىپ سەرۋەندەسەم، استاناعا بارىپ بايتەرەككە شىقسام ارمانىم جوق ەدى» سەن ول جاقتا ءجۇرىپ ونىڭ ءقادىرىن بىلمەيسىڭ، -دەيدى. سولاردى نەعۇرلىم تەز ارادا ەلگە شاقىرىپ الماساق، سوعۇرلىم تۇرىپ جاتقان ەلىنە تاستاي باتىپ، سۋداي ءسىڭىپ كەتۋى  مۇمكىن. سوندىقتان،  ءبىز كۇن وتكەن سايىن ەمەس، ساعات وتكەن سايىن كەشىگىپ جاتىرمىز. شەتتە قالعان قانداستارىڭ تاعدىرى مەنى قاتتى الاڭداتادى. ولاردىڭ تاعدىرى نە بولماق؟

جۇمامۇرات  ءشامشى، تاريح  عىلىمدارىنىڭ  كانديداتى