بۇگىن ءماجىلىس دەپۋتاتى ومارحان وكسىكبايەۆ ءسالافيزم اعىمى اناۋ ايتقانداي ءقاۋىپتى ەمەس دەگەن سياقتى وي ايتىپتى. وسىعان بايلانىستى مىناداي سۇراقتار تۋادى.
بىرىنشىدەن، و. وكسىكبايەۆ مىرزانىڭ ەلدە ۇقك، ءىىم جۇرگىزىپ جاتقان تەرگەۋ امالدارى اياقتالمايىنشا مۇنداي مالىمدەمە جاساۋىنا نە تۇرتكى بولدى؟ ودان جۋرناليستەر سوڭىنان قالماي سۇرايتىنداي يمام ەمەس، تەولوگ ەمەس.
ەكىنشىدەن، دەپۋتات ءسالافيزمدى ۇستانىپ وتىرعان ساۋد ارابياسىن مىسالعا كەلتىرىپ، ءتىپتى، ۇلگى رەتىندە ۇسىنعانداي بولىپتى. ونىڭ «جالپى، ءسالافيزمنىڭ ءوزىنىڭ يدەولوگياسى ءبىر كەرەمەتتەي تەرىس دەپ ايتقىم دا كەلمەيدى. سەبەبى ساۋد ارابياسى مەملەكەتى وسى باعىتتى قولداپ، دىندەرىندە قولدانىپ ءجۇر. ونىڭ وزىندە راديكاليزمنىڭ ەشتەڭەسى كورىنىپ تۇرعان جوق»، - دەگەن سوزدەرىن قالاي تۇسىنۋگە بولادى؟ و. وكسىكبايەۆ ماماندىعى بويىنشا ەكونوميست پە، تەولوگ پا؟ ەڭ قۇرىماعاندا اراب مەملەكەتتەرىندە ەلشىلىكتە بولىپ پا؟ بوتەن ەلدىڭ ىشكى جۇيەسىن نەگە قازاقستانعا ۇلگى رەتىندە ۇسىنادى؟
دەپۋتات «بىزدە سونى بۇرمالاپ الىپ كەتەتىن، سونىڭ اتىن جامىلىپ، ءبىراق باسقا باعىتتا ادامنىڭ ومىرىنە ءقاۋىپ كەلتىرەتىن، مەملەكەت قۇرىلىمىنا ءقاۋىپ توندىرەتىن ماسەلەلەر ول باسقا دۇنيە»، - دەگەن سوزدەرىمەن نە ايتقىسى كەلەدى؟ اقتوبەدەگى تەراكتىگە قاتىستى ەلباسىنىڭ ايتقانى قايدا قالادى؟
وسىنىڭ الدىندا سەرىك اقىلباي دەگەن سەناتور دا بالاق كەسكەن، ساقال وسىرگەننىڭ ءبارى تەررورشى ەمەس دەگەنگە ساياتىن
وي ايتىپ، ەلدى اداستىرماق بولدى. ول دەپۋتات ايتىپ اۋىز جيعان جوق، اقتوبەدە لاڭكەستەر لاڭ سالدى. ولاردىڭ بالاعىنىڭ قانشالىقتى «ۇزىن» ەكەنىن كوردىك.
ءيا، ساۋد ارابياسىنىڭ ءسالافيزمدى ۇستاناتىنى بۇگىندە ەشكىمگە جاسىرىن ەمەس. مەملەكەتتىك جۇيەسى، مەملەكەتتىك ورگانداردىڭ جۇمىسى بارلىعى سالافيلىك، ۋاحابتىق ۇستانىمداعى شەيحتاردىڭ ءپاتۋالارىنا نەگىزدەلگەن. ول ەندى سول ەلدىڭ ىشكى شارۋاسى. وعان ءبىز ارالاسۋعا، باعا بەرۋگە حاقىمىز جوق. ءبىراق، مىنا جاعدايدى ەسكەرۋىمىز كەرەك. و. وكسىكبايەۆ ۇلگى ەتىپ وتىرعان ساۋد ارابياسىنىڭ ءمۇفتيى شەيح ابدۋلازيز اش-شەيح كەزىندە يزرايل مەن پالەستينا اراسىنداعى قاقتىعىستا يزرايل جاعىن قولداپ، وعان قارسىلىق كورسەتكەن مۇسىلمانداردىڭ ءىسىن «حارام» دەپ ءپاتۋا شىعارعان. بۇل ءمۇفتيدىڭ سيرياداعى لاڭكەستەردىڭ ارەكەتىنە دە قاسيەتتى سوعىس «جيھاد» دەپ باعا بەرگەنىن بىلەمىز. سونداي «عۇلامالاردىڭ» ءبىزدىڭ ەلىمىزدە ورىن العان لاڭكەستىك ارەكەتتەردى دە «قاسيەتتى سوعىس» دەپ وتىرماعانىنا كىم كەپىل؟
سول اراب ىقپالىنداعى اعىمداردىڭ وكىلدەرى ونسىز دا ناماز وقىمايتىن اتا-انالارىن، جاقىن تۋىستارىن كاپىر دەپ، ۇيلەرىنىڭ بەرەكەسىن الىپ جاتقانى، ءتىپتى، وتانىن تاستاپ سيريا، يراكقا سوعىسقا كەتىپ جاتقانىنا قانشا جىل بولدى؟ مۇسىلماندىعىنان دورەكىلىگى اسىپ تۇسەتىن سول باۋىرلار ءقازىر وزدەرىنىڭ ءسالافي ەكەنىن اشىق ايتىپ ءجۇر. اشىق ايتۋىنىڭ سەبەبى دە تۇسىنىكتى. ماجىلىستە قولداۋشىلارى بار...
ياحيا ءجۇسىپ
