الماتىداعى قيسايعان ءۇيدىڭ تۇرعىندارىنا جىل سوڭىنا دەيىن باسقا پاتەرلەر بەرىلەدى، - دەپ حابارلايدى Qamshy.kz «الماتى» ارناسىنا سىلتەمە جاساپ.

«العاباس-6» ىقشاماۋدانىنداعى اۋىتقىعان 9 قاباتتى ءۇيدىڭ تاعدىرى وسى اپتادا شەشىلەدى. ىرگەسى سوگىلىپ، ءبىر قاپتالىنا قيسايعان ۇيگە ساراپتاما جاساعان جۇمىس كوميسسياسى الداعى بىر-ەكى كۇندە ءوز شەشىمىن جاريالايدى. سونىڭ ناتيجەسىندە قيسايعان ءۇيدى قالىپقا كەلتىرۋ نە بولماسا ءسۇرۋ تۋرالى ناقتى شەشىم قابىلدانباق. بۇل تۋرالى ارنامىزعا الاتاۋ اۋدانىنىڭ اكىمى باعدات ءمانىزوروۆ حابارلادى.

ءقازىر «العاباس» ىقشاماۋدانىنداعى جالپى سانى 97 ءۇيدىڭ بارلىعىندا تولىقتاي تەكسەرۋ جۇمىستارى جۇرگىزىلۋدە. باسپانالاردى سالعان قۇرىلىس كومپانيالارى 15 شىلدەگە دەيىن وزدەرى تۇرعىزعان نىسانداردىڭ ساپاسىن تەكسەرىپ، كەم-كەتىگىن تۇزەتەدى. شاتىرلار مەن سۋ جۇيەسىن جوندەپ، كورىكتەندىرۋ جۇمىستارىن جۇرگىزۋ مىندەتتەلدى. ال، قيسايعان ءۇيدى سالعان «استانا قۇرىلىس» مەردىگەر كومپانياسى 1 شىلدەدەن باستاپ وسى اۋداندا ەكى تۇرعىن ءۇيدى سالۋعا كىرىسەدى. ونىڭ بىرەۋى قۇلاعالى تۇرعان ۇيدەن كوشىرىلگەن تۇرعىندارعا بەرىلەدى.

«تۋرا وسى جوبامەن «استانا قۇرىلىس» كومپانياسى جۇمىس باستايدى، ەكى ءۇي سالادى. ەكىنشى ءۇيدى وتەماقى رەتىندە بەرۋى مۇمكىن، قالاعا ساتادى مۇمكىن، وزدەرىنىڭ قالاۋىنشا. ال، ءبىرىنشى ۇيگە قيسايعان ءۇيدىڭ تۇرعىندارىن ءبىرىنشى جەلتوقساندا كىرگىزەم دەپ ۋادە بەرىپ، ءتورت جاقتى كەلىسىمگە كەلىپ جاتىرمىز. قۇرىلىس جۇمىستارى 1 شىلدەدە باستالادى. 16 جەلتوقسانعا دەيىن تولىق كىرگىزىپ، بىتىرەمىز دەگەن ۋادەلەرىن بەرىپ وتىر. ال، ءتىپتى بولماعان جاعدايدا 10- 20 كۇن ايىرماشىلىق بولاتىن بولسا، قۇرىلىس مەكەمەسى كومپەنساسياسىن ۇزارتادى»، - دەدى الماتى قالاسى الاتاۋ اۋدانىنىڭ اكىمى باعدات ءمانىزوروۆ.

ەسكە سالايىق، 1 ماۋسىمدا «العاباس-6» ىقشاماۋدانىندا مەملەكەتتىك باعدارلامامەن سالىنعان 72 پاتەرلى 9 قاباتتى ءۇي 34 سم-گە شالقايىپ، ونداعى 400 -گە جۋىق تۇرعىن ءقاۋىپسىز جەرگە كوشىرىلدى. ساپاسىز قۇرىلىستىڭ سالدارىنان، جىلى ۇياسىن تاستاۋعا ءماجبۇر بولعان تۇرعىندار ءقازىر مەردىگەر كومپانيا بەرگەن ۋاقىتشا پاتەرلەردە تۇرىپ جاتىر. ولارعا «استانا قۇرىلىس» كومپانياسى ءوز ەسەبىنەن 50 مىڭ مەن 80 مىڭ تەڭگە ارالىعىندا وتەماقى تولەدى.