بۇگىن قازاقستان رەسپۋبليكاسى پرەمەر-مينيسترىنىڭ ورىنباسارى - اۋىلشارۋاشىلىق ءمينيسترى اسقار مىرزاحمەتوۆ جۇمىس ساپارىمەن اتىراۋ وبلىسىنا باردى، - دەپ حابارلايدى Qamshy.kz.

جۇمىس ساپارى شەڭبەرىندە وبلىس اكىمدىگىنىڭ الاڭىندا اتىراۋ وبلىسى اۋىل شارۋاشىلىعىنىڭ اعىمداعى جاعدايى جانە دامۋ پەرسپەكتيۆالارى ماسەلەلەرى بويىنشا كەڭەس ءوتتى. كەڭەستە وبلىستىڭ اۋىل شارۋاشىلىعى تاۋار وندىرۋشىلەرى، وبلىس اكىمى جانە ونىڭ ورىنباسارلارى، سونىمەن قاتار اۋدان اكىمدەرى جانە جەرگىلىكتى جانە ورتالىق مەملەكەتتىك ورگانداردىڭ اۋماقتىق بولىمشەلەرىنىڭ باسشىلارى، «اتامەكەن» ۇكپ، «كازاگرو» ۇبح» اق جانە ونىڭ ەنشىلەس ۇيىمدارىنىڭ وكىلدەرى قاتىستى.

كەڭەستىڭ وتكىزۋ بارىسىندا اۋىل تۇرعىندارىن جۇمىسپەن قامتۋ جانە ءسۇت قابىلدايتىن ورىنداردى جانە وتباسى بورداقىلاۋ الاندارىن قۇرۋ ارقىلى اۋىل شارۋاشىلىعى ونىمدەرىن ءوندىرۋ مەن وتكىزۋ جۇمىسىن ورتالىقتاندىرۋدى ۇيىمداستىرۋ ماقساتىندا اۋىل شارۋاشىلىق كووپەراتيۆتەرىنە جەكە قوسالقى شارۋاشىلىقتاردى بىرىكتىرۋ جولىمەن جەكە قوسالقى شارۋاشىلىقتارىنىڭ مۇمكىندىگىن پايدالانۋ ەسەبىنەن قايتا وڭدەۋ كاسىپورىندارىنىڭ قۋاتتىلىعىن جۇكتەۋ بويىنشا شارالاردى ىسكە اسىرۋ ماسەلەلەرى تالقىلاندى.     

مينيستر سالانى قوسىمشا قارجىلاندىرۋ بويىنشا قابىلداناتىن شارالار، سۋبسيديالاۋ جۇيەسىن جەتىلدىرۋ بويىنشا شارالار جانە اگروونەركاسىپتىك كەشەنگە ينۆەستيسيالىق تارتىمدىلىقتى ارتتىرۋ تۋرالى مالىمدەدى.

سونداي-اق، ايماقتا ينۆەستيسيالىق جوبالاردى ىسكە اسىرۋ، اسىرەسە مامانداندىرۋ سىزباسىنا سايكەس كەلۋىن جانە وندىرىستىك قۋاتتىلىعىنىڭ بار بولۋى، سونىمەن قاتار ورگانيكالىق ونىمدەر نارىعىن دامىتۋ ماسەلەلەرى تالقىلاندى.

كەڭەس قورىتىندىسى بويىنشا اسقار مىرزاحمەتوۆ اگروونەركاسىپ كەشەنىن دامىتۋعا باعىتتالعان جۇمىستاردى بەلسەندىرۋ بويىنشا ءبىرقاتار ناقتى تاپسىرمالار بەردى.

بۇگىندە اتىراۋ وبلىسى بويىنشا 20،9 مىڭنان استام تۇرعىندارى ءوزىن-وزى جۇمىسپەن قامتىعان بولىپ ەسەپتەلەدى، ونىڭ ىشىندە 14،8 مىڭ ادام ءونىمدى جۇمىسپەن قامتىلعان، جەكە قوسالقى شارۋاشىلىقتاردا 80 %-دان استام ءسۇت جانە 80 %-دان استام ەت وندىرىلەتىنىن ايتا كەتكەن ءجون.