بۇگىن استانادا بريفينگ وتكىزگەن تۇركيانىڭ ەلىمىزدەگى توتەنشە جانە وكىلەتتى ەلشىسى نيەۆزات ۇيانىق تۇركيانىڭ تۇرىك ليسەيلەرىنە قاتىسى جوقتىعىن ايتىپ، قازاقستان باسشىلىعىنان ەلدەگى قازاق-تۇرىك ليسەيلەرىنىڭ قىزمەتىن توقتاتۋعا كومەك سۇراعان بولاتىن، - دەپ حابارلايدى Qamshy.kz.
«رەسمي تۇردە تۇركيا ۇكىمەتىنىڭ قولداۋىمەن اشىلعان وقۋ ورنى ول – وڭتۇستىك قازاقستان وبلىسىندا، تۇركىستان قالاسىنداعى ياسساۋي اتىنداعى حالىقارالىق قازاق-تۇرىك ۋنيۆەرسيتەتى. ق ر اۋماعىندا جۇمىس ىستەپ تۇرعان، «قازاق-تۇرىك مەكتەبى» جانە «قازاق-تۇرىك ليسەيى» اتاۋىنا يە قالعان وقۋ ورىندارى ءبىزدىڭ ەلدىڭ مەملەكەتتىك ورگاندارىنا ەشقانداي قاتىسى جوق»، - دەگەن ول اتالعان وقۋ ورىندارىنىڭ ءارى قارايعى قىزمەتى تۋرالى شەشىم قابىلداۋ ق ر ءبىلىم جانە عىلىم مينيسترلىگىنىڭ قۇزىرىندا ەكەنىن ايتتى.
ەلشى تۇركيامەن دوستىق قاتىناس ورناتقان بارلىق ەلدەردى توڭكەرىس ارەكەتىنەن كەيىن وزدەرىن قولداۋعا شاقىردى.
«توڭكەرىس ارەكەتى ءبىزدىڭ ەلدىڭ دەموكراتيالىق قۇرىلىمىنا باعىتتالىپ قانا قويمايدى، ول باسقا ەلدەر ءۇشىن دە ەسكەرتۋ بولىپ تابىلادى»، - دەدى ءوز سوزىندە نيەۆزات ۇيانىق.
ال، ەكونوميست ولجاس قۇدايبەرگەنوۆ تۇرىك ەلشىسىنىڭ بۇل مالىمدەمەسىن قازاقستاننىڭ ىشكى ىسىنە ارالاسۋ دەپ باعالاپ وتىر.
«ەلشى سوزىنە قاراساق، تۇرىك بيلىگى قتل-عا (قازاق-تۇرىك ليسەيى – رەد.) قىسىم جاساۋدى ويلاعان سياقتى. ءبىراق، بۇل قازاقستاننىڭ ىشكى 
ىسىنە ارالاسۋ بولىپ تابىلادى. ونىڭ ۇستىنە، ەگەر قتل تۇركياعا قاتىسى جوق بولسا، وندا ولار نەگە قتل تۋرالى باستارىن قاتىرادى جانە بىزدەن ول ليسەيلەرگە قاتىستى شەشىم كۇتەدى؟ ەلشىنىڭ ويىنشا، كەز-كەلگەن مەكەمە اتاۋىندا «تۇرىك» ءسوزىن قولدانۋ ءۇشىن رۇقسات سۇراۋى كەرەك پە؟ ەگەر قتل «تۇرىك» سوزىنەن باس تارتسا، ەلشى مىرزا ساباسىنا ءتۇسىپ، قازاق ليسەيلەرىن جايىنا قالدىرا ما؟»، - دەگەن و. قۇدايبەرگەنوۆ اتالعان وقۋ ورىندارىنداعى قارجىلاندىرۋ شەتەلدىكتەردىڭ بالالارىن وقىتۋ اقىسىن قوسپاعاندا، 100 پايىز جەرگىلىكتى بيۋدجەتتەن قاراستىرىلاتىنىن، مۇعالىمدەرىنىڭ دە ءوزىمىزدىڭ ەلدىڭ ازاماتتارى ەكەنىن ايتادى.
ەكونوميستىڭ پىكىرىنشە، قازاق-تۇرىك ليسەيلەرىن جابۋ ارقىلى قازاقستان ءوز ازاماتتارىنا زيان كەلتىرەتىن كورىنەدى.
سونداي-اق، و. قۇدايبەرگەنوۆ تۇركيادا بولىپ جاتقان جاعدايلار ءبىزدىڭ ىشكى ىسىمىزگە اسەر ەتپەۋى كەرەكتىگىن ايتادى.
«الدە، ەلشى مىرزاعا، تۇرىك بيلىگىنە ءبىزدىڭ جايىمىز ماڭىزدى ەمەس پە؟ ولار ءوز ماقساتتارىنا جەتۋ ءۇشىن ءبىزدىڭ ازاماتتارىمىزدى قۇربان ەتپەك پە؟ ءقازىر تۇركيادا بولىپ جاتقان جاعدايلار قازاقستانعا اسەر ەتپەۋى كەرەك، كەرىسىنشە، تۇركيانىڭ قازاقستانداعى ەلشىسى شىنىمەن دوستىق پيعىلدا بولسا، وسىنى ءبىرىنشى كەزەكتە نازاردا ۇستاۋى ءتيىس. مەن ەلشىلىك تاراپىنان ءبىزدىڭ ىشكى ىسىمىزگە ارالاسۋدىڭ كەز-كەلگەن ارەكەتى تىيىلادى دەگەن سەنىمدەمىن»، - دەيدى ەكونوميست.
