استانادا 11-13 ءساۋىر ارالىعىندا ءححىىى «جاس قانات» جاستار ءان بايقاۋى وتەدى. بيىل ونەر دوداسىنا قاتىسۋعا 100-دەن استام ءوتىنىم ءتۇسىپ، ونىڭ 14 قاتىسۋشىسى عانا ىرىكتەۋ كەزەڭىنىڭ بارلىعىنان سۇرىنبەي ءوتتى.

وسى بايقاۋدىڭ الدىندا «جاس قاناتتا» ب ا ق سىناۋعا كەلگەندەر ءوز ويلارىمەن جانە ۇمىتتەرىمەن ءبولىستى.

رۋحيا بايكەنوۆا، 15 جاستا، تالدىقورعان:  - مەن «جاس قاناتتى» مەنىڭ بولاشاققا دەگەن كىلتىم دەپ بىلەمىن. وسى بايقاۋدان كوپ نارسەنى ۇيرەنەمىن دەگەن ويدامىن. العاش رەت «جاس قاناتتى» تەلەديداردان كورگەن بولاتىنمىن، كەيىن ىرىكتەۋ تۋرىنان وتكەن كەزىمدە قاتتى قۋانعانىم ەسىمدە. بۇل مەن ءۇشىن ومىرلىك ماڭىزى بار ۇلكەن قادام. جەڭىسكە جەتكىم كەلەدى، ءبىراق جەڭىلسەم جاسىمايمىن. ەڭ باستىسى - ءوزىمنىڭ تالانتىمدى كورسەتۋ.

مەرۋەرت تويبەكوۆا، 28 جاستا،قاراعاندى: - وسى بايقاۋعا ءۇمىتىم زور. العاش رەت «جاس قاناتقا» 13 جىل بۇرىن وبلىستىق دەڭگەيدە قاتىسقان بولاتىنمىن. ەسترادالىق وركەندەۋىمە بۇل سايىس كومەكتەسەدى دەگەن ويدامىن. ارينە، سايىس الدىندا وتە قاتتى قوبالجىپ تۇرمىن، ءبىراق ويىمداعى جوسپارلارىم ىسكە اسادى دەگەن سەنىمدەمىن. سەبەبى، ءدال وسى بايقاۋ ارقىلى ەسترادانىڭ گۇلنۇر ورازىمبەتوۆا، مەدەۋ ارىنبايەۆ، ءمادينا سادۋاقاسوۆا سىندى ونەر مايتالماندارىنىڭ جۇلدىزى جانعان. بولاشاقتا قازاقستاندى حالىقارالىق فەستيۆالداردا تانىستىرامىن دەگەن ويدامىن. سونىمەن قاتار ءوزىمنىڭ جەكە شىعارماشىلىعىمدى دامىتامىن.

ءمادي ءمۇساپىروۆ، «حان تەنگري» توبى، 23 جاستا،تالدىقورعان: - ايتارلىقتاي قورقىپ،قوبالجىپ تۇرعانىم جوق. ارينە، جۇلدەلى ورىن الامىز دەگەن ويدامىن. قارسىلاستارىما ساتتىلىك تىلەيمىن.

ءىلدار وماروۆ، 23 جاستا، استانا: - بايقاۋ الدىندا ءسال قوبالجىپ تۇرمىن. ءبىراق الدىڭعى قاتاردى بولاتىنىما سەنىمدىمىن، سەبەبى بار ىنتامدى سالىپ، دايىندالىپ ءجۇرمىن. وسى بايقاۋ ارقىلى ءوزىمدى كورسەتكىم كەلەدى، تالانتىمدى بايقاپ قالادى دەپ سەنەمىن.

قازاقپارات