وڭتۇستىك قازاقستان وبلىسىنىڭ ديقاندارى قاۋىن-قاربىزبەن قاتار جەمىس-جيدەكتەن دە مول ءونىم الا باستادى، - دەپ حابارلايدى Qamshy.kz 24.kz - كە سىلتەمە جاساپ.

بيىلعى اۋا رايىنىڭ قولايلى بولۋىنان باۋداعى اعاشتار جەمىسىن كوتەرە الماي سامساپ تۇر. ۋىلجىپ پىسكەن ءجۇزىم مەن المانىڭ جازدىق ءتۇرى شىمكەنتپەن قاتار الماتى، استانا جانە اقتوبەگە جونەلتىلىپ جاتىر. ال جەمىستىڭ كەشتەۋ پىسەتىن سۇرىپتارى ەكسپورتتالادى. باعباندار بيىل قارقىندى باۋعا وتىرعىزىلعان جەمىس اعاشتارىنان مول ءونىم الامىز دەپ وتىر.

ساباعىنان جاڭا ۇزىلگەن ءجۇزىمدى ۇزاق ساقتاۋعا بولادى. ۋىلجىپ پىسكەن ءونىم تاسىمالعا شىدامدى. مىرزاشولدەگى قارقىندى باۋ بيىل تولىق ءونىم سالدى. سۇلتان وسى باقتاعى جوعارى سۇرىپتى الما مەن ءجۇزىم قالامشالارىن ءۇش جىل بۇرىن ءوز قولىمەن وتىرعىزعان. وقىپ ءجۇرىپ وسىندا تاجىريبە جينادى. قولىنا ديپلومىن العان سوڭ اۋىلعا كەلىپ ەڭبەك ەتۋدە.

سۇلتان جولداسبايەۆ، اگرونوم:
- ءجۇزىمنىڭ ءوزى جىلۋسۇيگىش جانە جارىقتى قاجەت ەتەدى. بىزدە قۇدايعا شۇكىر، جىلۋ دا، ءبارى جاقسى. مىسالى، ماۋسىم ايىندا 25 گرادۋس ىستىق قاجەت. بىزدە 25-30 گرادۋس بولادى. ياعني ءبىزدىڭ كليمات وتە قولايلى.

ال، قازىعۇرتتىق شارۋالار باپتاعان جەمىس-جيدەك ەلىمىزدىڭ تۇكپىر-تۇكپىرىندە ساتىلۋدا. 500 گەكتاردان استام قىرلى جەردەگى قارقىندى باۋعا الىس يتاليادان اكەلىنىپ وتىرعىزىلعان جەمىستەر تامشىلاتىپ سۋارىلادى. باۋدا الما مەن جۇزىمنەن بولەك القورى، شابدالى، المۇرت، قارا ورىك سياقتى جەمىستىڭ بىرنەشە ءتۇرى وسەدى. ولارعا اۋىل ادامدارى كۇتىم جاسايدى.

جەرگىلىكتى جاستارعا قارقىندى باۋدىڭ قىر-سىرىن تۇركيادان كەلگەن ارنايى مامان ۇيرەتەدى. ول ءاربىر كوشەتتىڭ جيىلىگى مەن جەردىڭ قۇنارىنا ءمان بەرەدى. ويتكەنى تىڭايتقىشتى سوعان قاراپ قوسادى ەكەن.

بيرول قاراباۋ، اگرونوم:
- مىنا المانىڭ تۇركيادا پىسكەن الماعا قاراعاندا ايىرماشىلىعى جوق. ءبىراق ساپاسىنان بۇل جاقتىڭ ءونىمى ارتىق بولۋى مۇمكىن. ويتكەنى سىزدەردە كۇننىڭ كوزى كوپ شىعادى. سوسىن ءونىم جاقسى بولادى.

قوجالىقتىڭ ءونىمدى ساقتايتىن ەكى مىڭ توننالىق توڭازىتقىشى بار. ۇزىلگەن جەمىستەر الدىن سوندا جينالادى. سالقىنداتىپ بارىپ جىبەرەدى. «سوندا ول ءونىم سولمايدى جانە ءدامدى بولىپ جەتەدى»، - دەيدى ماماندار.

نۇرلان قۇرالوۆ، «امانكەلدى» ءجشس-نىڭ باس ديرەكتورى:
- ءبىرىنشى جاعىنان، تابيعي تازا بولاتىن بولسا، ەكىنشى جاعىنان، بۇل وتە بالعىن. بۇگىن القاپتان جينالعان ءونىم ەرتەڭىنە 15-20 ساعات كولەمىندە الماتى، استانا قالالارىنا جەتىپ وتىر. جەمىستىڭ ەڭ پايدالىسى – بالعىندىعى.

جىل وتكەن سايىن وبلىس اۋماعىنداعى قارقىندى باۋ كولەمى دە ارتىپ كەلەدى. ويتكەنى جەرگىلىكتى ينۆەستورلارعا شىعىننىڭ 40%-ى سۋبسيديا رەتىندە قايتارىلادى. جانە وزگەلەرگە قاراعاندا بۋدانداستىرىلعان الما تۇرلەرى ءونىمدى ەكى ەسە كوپ بەرەدى.

ايدوس ابيحانوۆ، وبلىستىق اۋىل شارۋاشىلىعى باسقارماسى باسشىسىنىڭ ورىنباسارى:
- جاي باۋدان ءسىز 8-10 توننا ءونىم الاتىن بولساڭىز، ينتەنسيۆتى باۋ ءۇش جىلدان كەيىن 25-تەن 50 تونناعا دەيىن ءونىم بەرەدى. بۇل ەكونوميكالىق تۇرعىدان دا پايدالى. سوندىقتان قازىرگى تاڭدا ءبىزدىڭ اۋىلشارۋاشىلىق ديقاندارى وسى ينتەنسيۆتى باۋ ەگۋگە جاپپاي كوشىپ جاتىر.

وبلىستا جەمىس داقىلدارى مەن ءجۇزىمنىڭ بارلىق ەگىس كولەمى 31 مىڭ گەكتاردان اسىپ جىعىلعان. ونىڭ 20 مىڭى ءارتۇرلى جەمىس داقىلدارى بولسا، 10 مىڭى ءجۇزىم. وسى ەگىستىكتەن بيىل باعباندار 170 مىڭ توننا جەمىس-جيدەك جينايمىز دەپ جوسپارلاپ وتىر.