اقمولا وبلىسىنداعى اتباسار قالاسىندا 120 ءۇيدى سۋ باستى دەپ حابارلايدى توتەنشە جاعدايلار مينيسترلىگى. مينيسترلىكتىڭ دەرەگىنشە، 7-8 ساۋىردە اۋا تەمپەراتۋراسىنىڭ 14 گرادۋسقا دەيىن جىلىنۋىنان اتباسار جانە جاقسى اۋداندارى اۋماعىندا قار ەرىپ، اتباسار مەن ونىڭ ماڭايىنداعى بەس كوشەدە 120 ءۇيدى سۋ باسقان. ءقازىر قار سۋىنىڭ دەڭگەيى تۇسپەي تۇر. سۋ باسقان ايماقتان 79 تۇرعىن كوشىرىلگەن. توتەنشە جاعداي ءبولىمى مەن جەرگىلىكتى اكىمدىك قىزمەتكەرلەرى سۋ باسقان ايماقتى شولىپ شىققان. سۋ باسقان ۇيلەردەن سۋدى شىعارۋ، قۇتقارۋ جۇمىستارىن جۇرگىزۋ ءۇشىن اقمولا، قاراعاندى وبلىستارىنىڭ توتەنشە جاعدايلار قىزمەتىنىڭ بولىمشەلەرى جۇمىلدىرىلعان. ءقازىر زارداپ شەككەن ۇيلەردى تەكسەرىپ، شىعىن مولشەرىن ەسەپتەيتىن كوميسسيا، مەديسينالىق جانە پسيحولوگيالىق كومەك بەرۋ پۋنكتەرى قۇرىلعان.