زايساننان شالعايدا جاتقان شىلىكتى اۋىلدىق وكرۋگىنە بەس ەلدى مەكەن قارايدى. ولار: شىلىكتى، تاسباستاۋ، جالشي، كاكەنتالدى جانە قاراساي اۋىلدارى. 2 300 تۇرعىنعا ەكى ورتا، ءبىر ورتالاۋ، ءبىر باستاۋىش مەكتەپ، مادەنيەت ءۇيى، پوشتا، دارىگەرلىك ەمحانا، ءتورت فەلدشەرلىك پۋنكت، توعىز دۇكەن، ەكى ناۋبايحانا، شاشتاراز، ءدارىحانا، مال سويۋ الاڭى قىزمەت كورسەتۋدە. قازىرگى ولشەممەن الىپ قاراساق، بۇل جاقسى كورسەتكىش، دەپ جازادى شىعىس قازاقستان وبلىستىق "ديدار" گازەتى

- ەلباسى نۇرسۇلتان نازاربايەۆتىڭ «قازاقستان جاڭا جاھاندىق ناقتى احۋالدا: ءوسىم، رەفورمالار، دامۋ» اتتى جولداۋىندا «جاھاندىق داعدارىس - بۇل تەك ءقاۋىپ ەمەس، بۇل جاڭا مۇمكىندىكتەر» دەپ اتاپ ءوتتى. دەمەك، داعدارىستان ۇرىكپەي، بارلىق كۇش-جىگەردى ورتاق ماقساتقا جۇمىلدىرا بىلسەك، بۇل قيىندىقتان وتەمىز. وتكەندى سارالاپ، الداعى اتقارىلار شارالاردى بەلگىلەپ، باعدارلى ىستەردى قولعا الىپ جاتىرمىز، - دەدى اۋىلدىق وكرۋگ اكىمى قۇرمەت ساعييەۆ.

بۇدان كەيىن اۋىل اكىمى وتكەن جىلى ءىرى قارانىڭ 12682، قوي-ەشكىنىڭ 31 مىڭنان اسقانىن، جىلقى 3054 باسقا جەتكەنىن تىلگە تيەك ەتتى. مۇنىڭ الدىنداعى جىلمەن سالىستىرعاندا ءىرى قارا ءۇش مىڭ، ۇساق مال التى جارىم مىڭ، ال جىلقى 624 باسقا كوبەيگەن. مال باسىن اسىلداندىرۋدا دا تابىس بارشىلىق. وتكەن جىلى 39 اسىل تۇقىمدى ءىرى قارا ساتىپ الىندى. وسىنشاما مالعا 6 ميلليون تەڭگە سۋبسيديا بەرىلىپتى. ەكى شارۋا قوجالىعى اسىل تۇقىمدى 41 قوشقارعا 328 مىڭ تەڭگە، 1230 انالىق قويعا 1 ميلليون 845 مىڭ تەڭگە سۋبسيديا الىپتى. ال جۇنگە 400 مىڭ تەڭگە سۋبسيديا العانىن ەستىگەنىمىزدە، شىنىندا دا اۋىل ادامدارىنىڭ ەڭسەسىن كوتەرۋگە ارنالعان باعدارلامالاردىڭ جەمىسىن بەرە باستاعانىن اڭعاردىق. «جايلاۋ» باعدارلاماسى بويىنشا قازىرگى ۋاقىتتا ءۇش وتباسى 300 باس قويدى امان ساقتاپ وسىرگەن ەكەن.

بولات تۇرعىنوۆ جەتەكشىلىك ەتەتىن «نۇرتازا» شارۋا قوجالىعى 250 ءىرى قارا، 150 جىلقى، ءبىر مىڭعا تارتا قويدى ءوسىرىپ وتىر. «نۇردانا» قوجالىعىنىڭ يەسى سەرىك فازىلوۆ ءىرى قارا وسىرسە، سەكەن شاجايەۆتىڭ «الماز» قوجالىعى ءبىر جارىم مىڭ قويدى باعىپ، ونداعان ادامدى جۇمىسپەن قامتاماسىز ەتۋدە. 

شىلىكتى اۋىلدىق وكرۋگىندە «100 ناقتى قادام» ۇلت جوسپارى باعدارلاماسى بويىنشا مەملەكەتتىك جانە وڭىرلىك باعدارلامالاردى جۇزەگە اسىرۋعا بايلانىستى يگىلىكتى ىستەر اتقارىلۋدا. ماسەلەن، شىلىكتى اۋىلىندا ەكى كوشەگە جارىق تارتىلسا، تاۋەلسىزدىك كوشەسىنە قۇم-تاس توسەلىپ، تۇرعىندار ريزاشىلىعىن بىلدىرۋدە. سەبەبى، بۇرىن بۇل كوشە جاۋىن-شاشىن كەزىندە لاس بولىپ، ءجۇرۋ قيىنعا تۇسەتىن. جالشي اۋىلىنىڭ شەتىنەن مال ولەكسەسىن تاستايتىن قورىم ىسكە قوسىلدى. شىلىكتىگە اعىن سۋ اكەلۋ ماقساتىندا زايسان قورعان سەرىكتەستىگى اۋىلعا سۋ ارناسىن بۇردى. اۋىل مادەنيەتى مەن سپورتىن دامىتۋ باعىتىندا جوسپارلى جۇمىستار جۇرگىزىلۋدە. ۇلى جەڭىستىڭ 70 جىلدىعى قارساڭىندا اۋىل تۇرعىندارى مەن كاسىپكەر ازاماتتاردىڭ دەمەۋشىلىگىمەن 1 ميلليون 45 مىڭ تەڭگەگە ەسكەرتكىش تاقتا اشىلىپ، 270 ادامنىڭ ەسىمدەرى جازىلدى. ناۋرىز، جەڭىستىڭ 71 جىلدىعى، بالالاردى قورعاۋ كۇنى، قازاق حاندىعىنىڭ 550 جىلدىعى، باسقا دا ايتۋلى مەرەكەلەرگە اۋىل تۇرعىندارى بەلسەندىلىكپەن قاتىسىپ، سپورتتىق جارىستاردىڭ ءسانىن كەلتىردى.

اۋىل اكىمى «تۋعان جەرگە-تاعزىم» اكسياسىنىڭ جىل سايىن ءوتىپ تۇراتىنىن ايتتى. اتاپ ايتقاندا، قۇناپيانوۆتار اۋلەتى شىلىكتى ورتا مەكتەبىنىڭ ءبىر بولمەسىن زاماناۋي جابدىقتاپ، بۇل ماقساتقا 1 ميلليون 750 مىڭ تەڭگە قارجى جۇمساپتى. سول كابينەتكە اۋداننىڭ وركەندەۋىنە ولشەۋسىز ۇلەس قوسقان، بىرنەشە وردەننىڭ يەگەرى، مارقۇم قالىم قۇناپيانوۆ اقساقالدىڭ ەسىمى بەرىلدى. ۇلى وتان سوعىسىنىڭ ارداگەرلەرى سۇلەيمەن بايمولدين، قوناي نۇرمۇحانبەتوۆ اقساقالدىڭ ۇرپاقتارى ات بايگەسىن ۇيىمداستىرىپ، مارقۇمدارعا اس بەرىپ، جەرلەستەرىن ريزا ەتىپ تاستادى. جارىس جەڭىمپازدارىنا اۆتوكولىك، موتوسيكل، باسقا دا باعالى سىيلىقتاردى تاپسىردى. تاسباستاۋ اۋىلىنىڭ تۋمالارى قايرات، دالەلبەك ساعدولديندەر كىندىك قانى تامعان اۋىلىنا 6 ميلليون تەڭگە قارجى جۇمساپ، يماندىلىق ءۇيىن سىيعا تارتتى. 

- بيىل - ۇلى مەرەكە، ەل تاۋەلسىزدىگىنىنڭ 25 جىلدىعى. مەرەكەلىك شارالاردىڭ كەستەسىن الدىن الا جاسادىق. بارلىق اۋىلداردا مادەني شارالار وتەدى، سپورت جارىستارىنا جۇرتشىلىقتى بەلسەنە قاتىستىرۋ ويدا بار. شىلىكتى اۋىلىنداعى ايجارىق كوشەسىن جارىقتاندىرۋ، تاسباستاۋ ورتالاۋ مەكتەبىنىڭ سپورت زالىن، شىلىكتىدەگى كوشەنى جوندەۋ، قاتتى قالدىقتار تاستايتىن ورىندى ىسكە قوسۋ، باسقا دا جۇمىستاردى اتقارساق دەپ وتىرمىز. شىلىكتى اۋىلدىق وكرۋگىنىڭ تۇرعىندارى تاۋەلسىزدىكتىڭ شيرەك عاسىرلىق مەرەيتويىن تولايىم تابىستارمەن قارسى الماق، - دەيدى اۋىل اكىمى قۇرمەت ساعييەۆ.

وڭداسىن ەلۋباي
شقو زايسان اۋدانى