16-تامىز كۇنى 400 مەترگە جۇگىرۋ بويىنشا سايىس كەزىندە باگامدىق سپورتشى شونا ميللەر اقىرعى ساتتە مارە سىزىعىن جۇگىرىپ ەمەس، سەكىرىپ كەسكەن بولاتىن. سول سەكىرىسىنىڭ ارقاسىندا ول وليمپيادا چەمپيونى اتاندى، - دەپ حابارلايدى Qamshy.kz. baq.kz – كە سىلتەمە جاساپ.

«مەن ەشتەڭە دە ويلاعان جوقپىن» - دەيدى 400 مەترگە جۇگىرۋدەن وليمپيادا چەمپيونى باگامدىق شونا ميللەر. ءيا، ونىڭ ەشتەڭە ويلاۋعا دا شاماسى كەلگەن جوق. سەبەبى ول باسقا نارسە ويلايتىنداي بولسا وكشەسىن باسىپ كەلە جاتقان امەريكالىق ەلليسسون فەليكس ودان چەمپيوندىق اتاقتى وپ-وڭاي تارتىپ الار ەدى.

جەڭىسكە دەگەن ۇمتىلىستىڭ، ەرىك-جىگەردىڭ ناتيجەسىندە ول ءوزى ارمانداعان التىنىنا قول جەتكىزدى. مارەگە جەتۋگە سوڭعى ساتتەر قالعاندا ميللەر امەريكالىق سپورتشى ەلليسسون فەليكستىڭ وزىنەن وزىپ كەتۋى مۇمكىن ەكەنىن ءتۇسىنىپ، سوڭعى قادامعا بارۋعا بەل شەشكەن. سپورتشى مارە سىزىعىنان اسۋ ءۇشىن بار دەنەسىمەن سەكىرىپ تۇسكەن.

«مەن ەشتەڭە ويلامادىم. تەك كوز الدىمدا التىن مەدال عانا تۇردى. كەلەسى سەكۋندتا مەن جەردە جاتتىم»-دەيدى سپورتشىنىڭ ءوزى.

ميللەردىڭ كورسەتكىشى 49،44 سەكۋند. ال امەريكالىق سپورتشى بار-جوعى جەتى سەكۋند كەشىگىپ قالدى. امەريكالىق جانكۇيەرلەر جارىستىڭ سەكىرۋدەن ەمەس، جۇگىرۋدەن ءوتىپ جاتقانىن ايتىپ شۋلاستى.

الايدا باگامدىق سپورتشىنىڭ بۇل ارەكەتى سايىس ەرەجەلەرىنە قايشى كەلمەيدى. بۇل سپورت تۇرىندە مارە سىزىعىنان كەۋدە (قول، اياق نەمەسە باس ەمەس) ءوتۋى كەرەك.

ءبىر قىزىعى، امەريكالىق ەلليسسون فەليكس ءدال وسى ريو تورىندەگى سايىستا مۇنداي ارەكەتكە العاش رەت تاپ بولىپ وتىرعان جوق. 200 مەترگە جۇگىرۋدەن ريو ويىندارىنىڭ ىرىكتەۋ كەزەڭىندە جەرلەسى دجەننا پرانديني دە سەكىرۋ ارقىلى مارەگە ءبىرىنشى جەتىپ، فەليكس سايىسقا وتپەي قالعان ەدى.

ەستەرىڭىزدە بولسا، بۇل سپورت تۇرىنەن ەلىمىزدىڭ نامىسىن قورعاعان ەلينا ميحينا 53،83 سەكۋند ناتيجەسىمەن 50ء-شى ورىنعا تۇراقتاعان بولاتىن. ال اناستاسيا كۋدينوۆا 56،03 سەكۋندپەن 55ء-شى ورىندى مىسە تۇتتى.