شاردارادا ءبىراز جىلدان بەرى جۇمىسىن توقتاتىپ تۇرعان بالىق ءوسىرۋ ءتالىمباعى بيىلدان باستاپ قايتا ىسكە قوسىلدى. اۋداندا بالىق شارۋاشىلىعىن دامىتۋ ماقساتىندا اشىلعان «شاردارا بالىق پيتومنيگى» ءجشس-نىڭ ماماندارى تاياۋدا شاردارا سۋ قويماسىنا شاباقتار جىبەرە باستادى. دالىرەك ايتاتىن بولساق، بۇگىندە جالپى اۋماعى 68،2 گەكتاردى قۇرايتىن توعان ىسكە قوسىلىپ، 15،7 ملن. دانا بالىق بالاڭقۇرتتارى (ليچينكا) وسىرىلۋدە.

بۇدان بولەك، اۋدانداعى «تۇران» شارۋا قوجالىعى ارنايى بالىق وسىرەتىن ورىننىڭ قۇرىلىسىن دايىنداۋ ۇستىندە. قازىرگى تاڭدا وندا ورىنداردى قازۋ، قۇرال-جابدىقتاردى ورناتۋ جۇمىستارى جۇرگىزىلۋدە.

سونىمەن بىرگە، اۋداننان جەكە كاسىپكەرلەردىڭ ۇيىمداستىرۋىمەن پيلوتتىق جوبا رەتىندە شاردارا سۋ قويماسى اۋماعىنان بالىقتى تورلى شارباقتا ءوسىرۋ شارۋاشىلىعىن (سادكوۆوە ۆىراششيۆانيە) قولعا الۋ جۇمىستارى دا جۇرگىزىلىپ جاتىر. 2014 جىلى وسىناۋ تورلى شارباقتا سىناق رەتىندە 15 توننا بالىق وسىرىلسە، بىلتىرعى جىلى جىل 300 توننا شاباق ءوسىرىلدى. سۋ قويماسىنداعى تورلى شارباقتا كەلەشەكتە 3000-4000 توننا كولەمىندە بالىق ءوندىرۋ جوسپارلانىپ وتىر.

ايتا كەتۋ كەرەك، بۇگىنگى تاڭدا شاردارا اۋدانىندا ەكى بالىق وڭدەۋ زاۋىتى جۇمىس ىستەپ كەلەدى. سونىڭ ءبىرى – جىلىنا 2500 توننا بالىق وڭدەۋمەن اينالىساتىن «حاميت» ستك بالىق وڭدەۋ زاۋىتى. اتالمىش كاسىپورىن بازاسىندا فيلە، كەپتىرىلگەن، تۇزدالعان بالىقتى وڭدەۋ جانە دايىنداۋ، قالدىقسىز ءوندىرىستى قولعا الۋ ماقساتىندا بالىق سۇيەگىنەن ۇنتاقتالعان جەم دايىنداۋ سەحتارى جۇمىس جاساۋدا.

جىلىنا 1000 توننا مۇزداتىلعان جانە ىستالعان بالىق، فيلە ونىمدەرىن شىعاراتىن «شاردارا – بالىق-1» بالىق وڭدەۋ زاۋىتىندا 70 ادام جۇمىس جاسايدى.

مۇنان بولەك، جىل سوڭىنا دەيىن شاردارادا تاعى دا جاڭادان ەكى بالىق زاۋىتى ىسكە قوسىلماق. «ۇدەمەلى يندۋستريالدى-يننوۆاسيالىق دامۋ باعدارلاماسى» اياسىندا سالىنىپ جاتقان جەكە كاسىپكەر «جالعاسبايەۆ ت» جانە «ساودات» ءجشس-ى جىلىنا ءارقايسىسى 600 توننا بالىق ونىمدەرىن ءوندىرۋدى جوسپارلاپ وتىر.