اقپان ايىندا «اتىشۋلى» مەرەكە قارساڭىندا، «وزگەنىڭ قاڭسىعىن تاڭسىق قىلدى» دەپ  جاستاردى  ءجازعىرۋشى  ەدىك. ال،  ەندى  وزگەنىڭ ەمەس،  ءوزىمىزدىڭ ءتول مەيرامىمىز بار.  ول كۇنى كەشە وتكەن – عاشىقتار مەرەكەسى.  حالقىمىزدىڭ  اڭىزىنا اينالعان، جىر-داستاندارعا ارقاۋ بولعان  عاشىقتاردى ۇلىقتايتىن مەرەكە. العاشىندا  ۆالەنتيندى الماستىرۋعا ۇسىنىلسا دا، جاستار جاعى ءىلىپ اكەتىپ،سوڭعى جىلدارى شىن ىقىلاسپەن تويلاناتىن بولدى.  وعان  قالالارداعى  ءتۇرلى  مەرەكەلىك  شارالار، جاستاردىڭ الەۋمەتتىك  جەلىلەر ارقىلى  بىر-بىرىنە  جولداعان ىستىق لەبىزدەرى، شوق گۇلدەر مەن كەزدەسۋلەر، ت.ب. قىزىقتى شارالار كۋا.

     ماسەلەن، قىزىلوردا  قالاسىنىڭ  جاستارى الاڭعا  جينالىپ،  مەيرامنىڭ كورىگىن  قىزدىرىپتى. قىزىلوردا وبلىسىنىڭ جاستار وداعى كوعامدىق بىرلەستىگى ۇيىمداستىرعان مەرەكەلىك شاراعا 10 مىڭ ادام جينالدى. پروزالىق كورىنىستەر، رەسپۋبليكامىزعا تانىمال انشىلەر، بي توپتارى، جايدارمانشىلار ونەر كورسەتتى. قىز جىبەك پەن تولەگەن، قالقامان - مامىر سەكىلدى  قازاقتىڭ عاشىقتارىنىڭ كورىنىستەرى قويىلدى. الاڭدا جاستار فلەش-موب ۇيىمداستىرىپ، بي  بيلەدى.

      جۋرناليست  بوتاگوز  جۇسىپتەگى شارا  تۋرالى  بىلاي دەيدى:

  قىزىلوردالىق جاستار بۇل مەرەكەنى كادىمگىدەي ورتالىق الاڭدا اتاپ ءوتتى.  جاستار دا كوپ جينالدى. قاتەلەسپەسەم، بيىل 4 جىل جينالعالى جاتىر. بۇل دەگەنىمىز اتى وشكىر ۆالەنتيندى ۇمىتتىرۋدىڭ عانا امالى ەمەس، قازاقىلىقتى دارىپتەۋدىڭ ءبىر كورىنىسى دەر ەدىم.  جەكە ءوز باسىما كەلەر بولسام، مەنىڭ ءار كۇنىم شىنايى سەزىمنەن قۇرالادى. جۇرەك بار دا، سەزىم بار. مەيرام اسەر ەتپەيدى. ءبىراق اپپاق گۇلدى سىيعا العانىمدى جاسىرىپ كاتەيىن»-، دەيدى.

ال،  جاسۇلان الدابەرگەنوۆ ەسىمدى  ازامات: «مەرەكەنىڭ ۇيىمداستىرىلۋى  ۇنادى. جىگىتتەردىڭ قىزدارعا شىنايى سەزىمدەرىن بىلدىرگەنى، ساحنالىق كورىنىستەر   اسەر ەتتى. انشىلەر، بي، فلەش-موب تا  جاقسى ءوتتى»،- دەدى.