ءقادىرلى "قازايتىس" سايتىنىڭ وقىرماندارى! "نۇر وتان" پارتياسىنىڭ 15 جىلدىعىنا وراي تالدىقورعان قالاسىندا وتكەن "ءبىر حالىق، ءبىر ەل - ءبىر تاعدىر" اتتى رەسپۋبليكالىق اقىندار ايتىسى مارەسىنە جەتتى.

ءدۇبىرلى ايتىستىڭ ءدۇبىرىن تىڭداپ وتىرعىسى كەلگەن اعايىنعا سايتىمىزدىڭ الەۋمەتتىك جەلىدەگى پاراقشالارىنان شامامىزدىڭ كەلگەنىنشە جەتكىزۋگە تىرىستىق. ايتىس قاشاندا ايتىس! قازاق قاشاندا قازاق! 5 ساعات بويى تاپجىلماي وتىرىپ ايتىس تىڭداعان اعايىن تاراعىسى جوق. تىڭداي بەرگىسى كەلەدى. اقىنداردىڭ اسىل سوزدەرىنىڭ ءدامىن تاۋساپ تامسانعان جۇرتتىڭ ىقىلاسىن نەمەن ولشەپ ايتۋعا بولاتىنىن ءدال ءقازىر تابا الماسپىز.

ايتىستا ەكىنشى اينالىم بولعان جوق. بال بويىنشا باعالادى. ەسەسىنە اقىندار 45-50 مينۋتقا دەيىن شاپتى. جانە اقىندارعا توسىن تاپسىرما بەرىلىپ، ايتىستى ارى قاراي جالعاپ جاتتى. "ايتسىن، ايتىسسىن" دەگەن كوپتىڭ ىقىلاسىن ەلەمەي ساحنادان قالاي تۇرىپ كەتسىن، اقىنداردىڭ ءتىل قىشۋى قانعان سايىن، كورەرمەننىڭ قۇلاق قۇرىشى قانىپ ەكىلەنە تۇسەتىنى ايتىسسۇەيەر اعايىنعا بەيتانىس مىنەز ەمەس قوي.

سونىمەن، بۇل ايتىس تۋرالى، كىمنىڭ نە دەگەنى جايىندا كەڭىنەن تولعاپ ماقالا جازامىز بۇيىرسا. تومەندە جۇلدەلى ورىندارعا يە بولعان اقىنداردىڭ رەتى بىلاي:

باس جۇلدە: سىرىم اۋەزحان ( 2 ميلليون تەڭگە)

ءبىرىنشى ورىن: جانداربەك بۇلعاقوۆ (1،5 ميلليون تەڭگە)

ەكىنشى ورىن: ديدار قامييەۆ (1 ميلليون تەڭگە)

ءۇشىنشى ورىن: بالعىنبەك يماشيەۆ (750 مىڭ تەڭگە)

ءۇشىنشى ورىن: ارزىگۇل قايىمبەك قىزى ( 750 مىڭ تەڭگە)

جانە وسى ايتىسقا قاتىسقان اقىنداردىڭ ءارقايسىسىنا 500 000 تەڭگەدەن سىيلىق جاسالدى.

ۇلاربەك نۇرعالىم ۇلى

Kazaitys.kz