قازاقستاندىق كاسىپقوي بوكسشى گەنناديي گولوۆكينگە تۋعان جەرى – قاراعاندى وبلىسىنىڭ مايقۇدىق اۋدانىندا التىننان ءمۇسىن ورناتىلۋى مۇمكىن. ءقازىر مۇسىنشىلەر جوبانى ازىرلەپ جاتىر، - دەپ حابارلايدى Qamshy.kz BNews.kz - كە سىلتەمە جاساپ.

ءمۇسىنشى گامال ساگيدەنوۆتىڭ ايتۋىنشا، ءقازىر ول جوبانى جان-جاقتى تالقىلاپ جاتىر. گەننادييدىڭ ءمۇسىنىن جاساۋ – ونىڭ جانكۇيەرلەرىنىڭ يدەياسى ەكەن. قاراعاندىنىڭ بۇل اۋدانىندا سپورتشىنىڭ دوستارى كوپ بولعاندىقتان، ولار «التىن» ءمۇسىن جاساۋ يدەياسىن ۇسىنعان.+

ءقازىر ەكىباستۇزدىق ءمۇسىنشى ءمۇسىننىڭ ماكەتىن جاساپ جاتىر. ازىرگە ول «بوكسشىنىڭ باسىن» ەرمەكسازبەن عانا دايىنداپ قويدى. ءمۇسىننىڭ ءوزى ادام بويىنان ءبىر جارىم ەسە بيىك بولادى جانە التىن جالاتىلعان بوياۋمەن بويالادى. سونداي-اق سپورتشىنىڭ جانكۇيەرلەرى تاپسىرىستىڭ اقشاسىن تولەۋگە قاراجات جيناپ جاتىر.
«مەن، قالايدا، بۇل جۇمىستى اياعىنا دەيىن جەتكىزەمىن. ادەمى ءمۇسىن جاساپ، وعان گرانيتتەن تۇعىر قويىپ، جان-جاعىن اباتتاندىرعىم كەلەدى. ءمۇسىندى جاساۋعا كوپ ۋاقىت كەتپەيدى. ءبىر اي ىشىندە اياقتاي الامىن. باستىسى، بارلىعىن كەلىسىپ الۋ كەرەك، ياعني، قوياتىن ورنىن، قۇجاتتارىن كەلىسۋ ت.ب. جۇمىستاردى رەتتەۋ كەرەك»، - دەيدى گامال ساگيدەنوۆ. 

ءقازىر جانكۇيەرلەر قۇجاتتارىن رەسىمدەپ، ءمۇسىننىڭ قويىلاتىن ورنىن كەلىسىپ جاتىر. ەگەر يدەيا قولداۋ تاۋىپ، جەرگىلىكتى بيلىك ورگاندارى بەكىتسە، وندا ءمۇسىن «جاڭا مايقۇدىق» مادەنيەت ءۇيىنىڭ الدىنداعى الاڭعا قويىلادى.