بۇگىن الماتىداعى 28 پانفيلوۆشىلار ساياباعىندا اۋعان سوعىسى ارداگەرلەرى مەن وزدەرىن نود (ۇلتتىق ازات ەتۋ قوزعالىسى - رەد.) دەپ اتايتىن ۇيىمنىڭ ونداعان بەلسەندىسى ادولف گيتلەر تۋرالى قاراما-قايشى ماتەريالدار باسقان "جۇلدىزدار وتباسى - اڭىز ادام" جۋرنالىنا قاتىستى نارازىلىق اكسياسىن وتكىزدى. 

ازاتتىق ءتىلشىسىنىڭ حابارلاۋىنشا، جينالعاندار جۋرنالدىڭ گيتلەرگە ءنومىر ارناۋىن ايىپتاپ، "ءفاشيزمنىڭ قايتا تىرىلۋىنە جول جوق!" دەگەن ۇران ۇستاپ شىققان. بەلسەندىلەر جۋرنالدىڭ گيتلەرگە ارنالعان ءنومىرىن ورتەپ، باسىلىم رەداكتورىن "جاۋاپقا تارتۋ" تۋرالى تالاپتار ايتقان.

اكسيا ءوتىپ جاتقان كەزدە جۋرنالدا ءفاشيزمدى قولدايتىن ەمەۋرىن جوعىن ايتپاق بولعان ءبىر ادامدى "فاشيزمگە قارسى" بەلسەندىلەر سويلەتپەۋگە تىرىستى. الگى ادامدى "كىم ەكەنىن انىقتاۋ ءۇشىن" پوليسيا وكىلدەرى ۇستاپ اكەتكەن.

قازاق تىلىندە شىعاتىن، 25 مىڭ دانامەن تارايتىن "جۇلدىزدار وتباسى - اڭىز ادام" جۋرنالى ءساۋىر ايىنداعى سانىندا ناسيستەر كوسەمى ادولف گيتلەر تۋرالى قاراما-قايشى ماقالالار جاريالاعان سوڭ داۋعا قالعانەدى.

ازاتتىق  راديوسى