قازاقستان رەسپۋبليكاسى پارلامەنتى ءماجىلىسىنىڭ الەۋمەتتىك-مادەني دامۋ كوميتەتىنىڭ كەزەكتى كوشپەلى وتىرىسى ءماجىلىستىڭ ۆيسە-سپيكەرى داريعا نازاربايەۆانىڭ قاتىسۋىمەن كوميتەت ءتورايىمى گۇلنار يكسانوۆانىڭ جەتەكشىلىگىندە وقۋشىلار سارايىندا ءوتتى، دەپ حابارلايدى ق ر پارلامەنتىنىڭ رەسمي سايتى
وتىرىس الدىندا وقۋشىلار سارايىنىڭ ديرەكتورى ۇمسىن ارقابايەۆا عيماراتقا ەكسكۋرسيا جۇرگىزىپ، حالىق قالاۋلارىن قازاقستان رەسپۋبليكاسى پرەزيدەنتىنىڭ تاپسىرماسى بويىنشا 2011 جىلدىڭ جەلتوقسان ايىندا سالىنعان وقۋشىلار سارايىمەن تانىستىردى. دەپۋتاتتار 500 ورىندىق «جاستار» تەاترىن، كوركەمسۋرەت گالەرەياسىن، مۇز ايدىنىن، باسسەيندى جانە سپورت زالىن تاماشالادى.
كوشپەلى وتىرىستا دەپۋتاتتار «قوسىمشا ءبىلىم بەرۋ جۇيەسىنىڭ جاعدايى جانە ونىڭ بالالار مەن جاسوسپىرىمدەردىڭ شىعارماشىلىق قابىلەتتەرىن دامىتۋداعى، مەكتەپ وقۋشىلارىنا كاسىبي باعدار بەرۋدەگى جانە ولاردىڭ بوس ۋاقىتىن ۇيىمداستىرۋداعى ءرولى» دەگەن تاقىرىپتى تالدادى.
نەگىزگى باياندامانى ءبىلىم جانە عىلىم مينيسترلىگىنىڭ مەكتەپكە دەيىنگى جانە ورتا ءبىلىم، اقپاراتتىق تەحنولوگيالار دەپارتامەنتىنىڭ ديرەكتورى جاڭىل جونتايەۆا جاسادى.
ەلباسىنىڭ جارلىعىمەن بەكىتىلگەن قازاقستان رەسپۋبليكاسىنىڭ ءبىلىم بەرۋ ءىسىن دامىتۋدىڭ 2011-2020 جىلدارعا ارنالعان باعدارلاماسىندا بالالاردىڭ قوسىمشا ءبىلىم بەرۋ ۇيىمدارىنىڭ بالالار مەن جاستاردىڭ جەكە باسىنىڭ، الەۋمەتتىك جانە كاسىبي ءوزىنىڭ ورنىن بەلگىلەۋدىڭ، ولاردىڭ بەيىمدىلىگىن، زەرەكتىگىن جانە مۇددەلەرىن دامىتۋدىڭ ەڭ باستى فاكتورلارىنىڭ ءبىرى رەتىندەگى ماڭىزدى ءرولى اتاپ كورسەتىلگەن.
بۇگىندە قوسىمشا ءبىلىم بەرۋ – بۇل ارتىقشىلىقتارى كوپ ءبىلىم بەرۋ جۇيەسىنىڭ اجىراماس بولىگى: زور تالاپ ەتىلۋى، بالانىڭ وزىندىك قاسيەتىنە قاراي باعدارلانۋى، جەكە باسىنىڭ قاسيەتىن، مۇددەلەرىن جانە قابىلەتتەرىن دامىتۋ.
ەگەر جالپى ءبىلىم بەرۋ ىسىندە ينتەللەكتىنىڭ ءبىر ءتۇرى – ءبىلىم جونىندە ايتىلسا، قوسىمشا ءبىلىم بەرۋدە بالا ينتەللەكتىنىڭ ءتۇرلى قىرلارىن باعالاۋعا بىرەگەي مۇمكىندىگىمىز بار، ياعني بۇل دارىندىق جانە جان-جاقتىلىق. وسىپ-جەتىلىپ كەلە جاتقان بالانىڭ دامۋىنداعى پايدالى ىس-ارەكەت كوەففيسيەنتى قوسىمشا ءبىلىم بەرۋ مەكەمەسىندە اناعۇرلىم جوعارى بولاتىنى اتاپ ءوتىلدى.
ءسوز سويلەۋشىلەر قوسىمشا ءبىلىم بەرۋ جۇيەسىنىڭ جاعدايى جانە ونىڭ بالالار مەن جاسوسپىرىمدەردىڭ شىعارماشىلىق قابىلەتتەرىن دامىتۋداعى، مەكتەپ وقۋشىلارىنا كاسىبي باعدار بەرۋدەگى جانە ولاردىڭ بوس ۋاقىتىن ۇيىمداستىرۋداعى ءرولىن اتاپ ءوتتى.
كوشپەلى كەڭەس قورىتىندىلارى بويىنشا قوسىمشا ءبىلىم بەرۋ جۇيەسىن جەتىلدىرۋ بويىنشا ۇسىنىستار ەنگىزىلدى.
وتىرىس جۇمىسىنا پارلامەنت ءماجىلىسىنىڭ وسى كوميتەتىنىڭ دەپۋتاتتارى، ءبىلىم جانە عىلىم، بيۋدجەتتى جوسپارلاۋ، مادەنيەت مينيسترلىكتەرى مەن دەنەشىنىقتىرۋ جانە سپورت اگەنتتىگىنىڭ وكىلدەرى، ورتالىق جانە جەرگىلىكتى اتقارۋشى ورگاندارىنىڭ جاۋاپتى قىزمەتكەرلەرى، قوسىمشا ءبىلىم بەرۋ ۇيىمدارىنىڭ باسشىلارى، ۇكىمەتتىك ەمەس ۇيىمداردىڭ جانە ب ا ق وكىلدەرى قاتىستى.
