"رەسەي پرەزيدەنتى ۆلاديمير پۋتين "ۋكرايناداعى جاعدايعا بايلانىستى رەسەيگە قاتىستى ەۋرووداق پەن اقش ەنگىزگەن سانكسيالاردىڭ ەۋرازيالىق ينتەگراسياعا اسەرى بولمايدى" دەپ مالىمدەدى". "رەسەيگە قاتىستى سانكسيالاردىڭ ەۋروينتەگراسياعا قانداي اسەرى بولۋى مۇمكىن؟" دەگەن ساۋالعا پۋتين: "ەشقانداي اسەرى بولمايدى، ينتەگەراسيا بۇل تەك قاتىسۋشى ەلدەرگە قاتىستى شارا" دەپ جاۋاپ بەردى. "ءبىز بۇگىن العا قاراي ماڭىزدى قادام جاسادىق. ەكسپورتتىق ماسەلەلەردىڭ كەيبىر تۇستارىندا كەلىسۋشى تاراپتار اراسىندا تولىقتاي تۇسىنىستىك بولا بەرمەيدى. بۇگىنگى جاسالىپ وتىرعان قادام ەۋروينتەگراسيا كەلىسىمىنە بەلگىلەگەن ۋاقىتتا قول قويىلاتىنىن كورسەتتى دەپ ويلايمىن. ءالى دە كەي تۇستارىن سوڭىنا جەتكىزۋ قاجەت. دەسە دە، بارلىق تاراپتار ءبىر كەلىسىمگە كەلىپ وتىر" دەپ قوستى پۋتين. سونداي-اق، پۋتين، رەسەيگە قاتىستى سانكسيانىڭ ەكىنشى پاكەتىنىڭ نە ءۇشىن ەنگىزىلىپ وتىرعانىن تۇسىنبەيتىنىن جەتكىزدى. ونىڭ سوزىنە قاراعاندا، ۋكرايناداعى جاعدايعا بايلانىستى دەيتىندەي ەش سەبەپ جوق. "ءبىرىنشى پاكەتتى زاڭسىز دەپ بىلەمىز. ول رەسەي مەن اقش جانە ەۋروپالىق ەكونوميكالىق وداق اراسىنداعى قارىم-قاتناسقا زالال كەلتىرەدى. ال، ەكىنشى پاكەت مۇلدەم تۇسىنىكسىز. قازىرگى ۋكراينادا بولىپ جاتقان جاعدايعا مۇنىڭ ەش قاتىسى جوق" دەدى پۋتين. سونىمەن قاتار رەسەي پرەزيدەنتى ۋكراينادا رەسەيلىك اسكەريلەر مەن اسكەري ينسترۋكتورلاردىڭ جوق ەكەنىن اتاپ ءوتتى. "ءبىز ۇنەمى سول جەردە رەسەيلىك ارنايى جاساق، اسكەري ينسترۋكتورلار بار دەگەندى ەستيمىز. ۋكراينادا رەسەيلىك اسكەريلەردىڭ، اسكەري ينسترۋكتورلاردىڭ، ارنايى جاساقتىڭ جوق ەكەنىنىنە تولىق جاۋاپ بەرەمىن" دەپ اتاپ ءوتتى پۋتين.