بۇل كىتاپتى ن.ءا.نازاربايەۆتىڭ ءومىرى مەن قىزمەتىن رەسمي تاريحي-عۇمىرنامالىق زەرتتەۋدىڭ العاشقى تاجىريبەسى دەۋگە بولادى. مۇندا ونىڭ قاراپايىم اۋىلداعى ءجاسوسپىرىم كەزىنەن باستاپ، ەلباسىنا دەيىنگى ءومىر جولى باياندالادى.

كىتاپتا باستى نازار ن.ءا.نازار­بايەۆ­تىڭ ساياسي ءومىربايانىنا اۋدارىلعان، ول قازاقستاننىڭ ءحح-ححى عاسىرلار ارالى­عىنداعى دامۋى كەزىندە بولىپ وتكەن درا­مالىق جانە ادەتتەن تىس وقيعالار مەن ۇدەرىس­تەردىڭ اياسىندا بەرىلگەن. اۋقىمدى مۇرا­عات ماتەريالدارىنىڭ نەگىزىندە ءازىر­لەن­گەن ءومىربايان قازاقستاننىڭ ەڭ بەرتىنگى تاريحى بويىنشا ەلەۋلى قۇجاتتاما كوزى بولىپ تابىلادى. كىتاپتا فوتوسۋرەتپەن بەزەن­دىرىلگەن باي ماتەريالدارمەن بىرگە، جەكە قۇجاتتاردىڭ ءتۇپنۇسقالارىنىڭ كوشىر­مەلەرى العاش رەت ۇسىنىلادى. ال مۇنىڭ ءوزى وقىرماننىڭ سۋرەتتەلەتىن وقيعالار اۋانىنا تولىعىراق قانىعۋىنا سەپتىگىن تيگىزەدى.

بۇل كىتاپقا ونىڭ اۆتورى قازاقستان رەسپۋبليكاسى پرەزيدەنتى كەڭسەسىنىڭ باستىعى، ساياسي عىلىمدار دوكتورى، پروفەسسور ماحمۇت قاسىمبەكوۆ ەكەنى تۋرالى دەرەك ەرەكشە قۇندىلىق بەرەدى، ول كوپ جىلدار بويى مەملەكەت باسشىسىنىڭ تىكەلەي قاراماعىندا قىزمەت اتقارىپ، پرەزيدەنتتىك ينستيتۋتتى زەرتتەۋمەن كاسىبي تۇرعىدا اينالىسىپ كەلەدى. ونىڭ عىلىمي جانە شىعارماشىلىق قورىندا پرەزيدەنتتىك ينستيتۋتقا، ن.ءا.نازاربايەۆتىڭ ساياسي قىز­مەتىنە ارنالعان عىلىمي مونوگرافيالار، وقۋ قۇرالدارى، كوپ تومدىق باسىلىمدار، پۋب­لي­سيستيكالىق جيناقتار، كوپتەگەن ماقا­لالار بار.

قازاقستان پرەزيدەنتى تۋرالى عۇمىر­نامالىق كىتاپتىڭ 2012 جىلى جارىق كورگەن ساتىنەن باستاپ، تەك وتانىمىزدا عانا ەمەس، شەت ەلدەردە دە قىزىعۋشىلىق تۋدىرۋى كەز­دەيسوق ەمەس. قىسقا مەرزىم ىشىندە ول ورىس، اعىلشىن جانە اراب تىلدەرىنە اۋدارىلىپ، جارىق كوردى.

كىتاپتىڭ ۆەنگر تىلىندەگى نۇسقاسى قا­زاق­ستان رەسپۋبليكاسىنىڭ ۆەنگرياداعى ەلشىلىگىنىڭ قولداۋىمەن جارىق كوردى. ونىڭ ۆەنگريا عىلىم اكادەمياسىنىڭ عيماراتىندا وتكەن تۇساۋكەسەرىنە ۆەنگر تاراپىنان ۆەنگريا پارلامەنتىنىڭ ءتوراعاسى شاندور لەجاك، ۆەنگريا پارلامەنتىنىڭ دۋايەنى يانوش حورۆات، وڭىرلىك دامۋ ءمينيسترى شاندور فازەكاش، قازاقستاننىڭ ۆەنگرياداعى قۇرمەتتى كونسۋلى لاسلو حورۆات پەن باسقا دا رەسمي ادامدار، عىلىمي جانە شىعارماشىلىق زيالى قاۋىم وكىلدەرى، ۆەنگرياداعى قازاق دياسپوراسىنىڭ وكىلدەرى، جۋرناليستەر مەن ستۋدەنتتەر قاتىستى.

قازاقستان تاراپىنان كىتاپتىڭ اۆتورى ماحمۇت قاسىمبەكوۆ، قازاقستاننىڭ ۆەن­گرياداعى ەلشىسى نۇرباح رۇستەموۆ، قازاق­ستان پارلامەنتى سەناتىنىڭ دەپۋتا­تى، قازاقستان جازۋشىلار وداعى باسقار­ماسىنىڭ ءتوراعاسى نۇرلان ورازالين، قازاقستان پرەزيدەنتى كەڭسەسى باستىعىنىڭ ورىن­باسارى باقىتجان تەمىربولات، ل.ن.گۋميليەۆ اتىنداعى ەۋرازيا ۇلتتىق ۋنيۆەر­سيتەتىنىڭ رەكتورى ەرلان سىدىقوۆ، تۇڭ­عىش پرەزيدەنت كىتاپحاناسىنىڭ ديرەكتورى مەيىر ەسكەندىروۆ قاتىستى.

كەزدەسۋ جىلى ءارى سەنىمدى پىكىر الىسۋ جاعدايىندا ءوتتى.تانىستىرىلىمعا قاتى­سۋشىلار قازاقستان باسشىسى تۋرالى ۆەنگر تىلىندە جارىق كورگەن كىتاپ ەكى دوستاس حا­لىق­تاردىڭ جاقىنداسا ءتۇسۋى ورايىنداعى تاعى ءبىر ناقتى قادام دەگەن ورتاق پىكىرگە كەلدى.

ساۋلەبەك ءبىرجان،

"ەگەمەن قازاقستان"