21 مامىردان 25 مامىرعا دەيىنگى ارالىقتا الماتىدا British Councilء-دىڭ (بريتاندىق كەڭەس) ۇيىمداستىرۋىمەن جانە بريتاندىق كينو ينستيتۋتىنىڭ (BFI)، قازاقستانداعى «شەلل» كومپانياسىنىڭ، الماتى قالاسى اكىمدىگىنىڭ، ارمان كينو-ورتالىعىنىڭ جانە «ەير استانا» كومپانياسىنىڭ قولداۋ كورسەتۋىمەن حيچكوكتىڭ دىبىسسىز كينو اپتالىعى وتۋدە. اپتالىقتا BFI مۇراعاتىنان قالپىنا كەلتىرىلگەن جانە بريتاندىق كينەماتوگرافيانىڭ ەڭ زور جەتىستىكتەرىنىڭ ءبىرى رەتىندە يۋنەسكو-نىڭ دۇنيەجۇزىلىك مۇرا تىزىمىنە ەنگەن «حيچكوك 9» جوباسىنىڭ توعىز ءفيلمىنىڭ التاۋى ۇسىنىلاتىن بولادى.
حيچكوكتىڭ دىبىسسىز كينو اپتالىعى بريتاندىق ديريجەر كريستوفەر ءوستيننىڭ جەتەكشىلىگىندەگى «قازاقستان كامەراتى» مەملەكەتتىك وركەسترىنىڭ سۇيەمەلدەۋىمەن كورسەتىلگەن Pleasure Garden («ءلاززات باعى») فيلمىنەن باستالدى. وركەستر وسى فيلم ءۇشىن سازگەر دەنيەل پاتريك كوەننىڭ ارنايى جازعان مۋزىكاسىن ورىندادى. سونداي-اق، دەنيەل پاتريك كوەن اپتالىقتىڭ اشىلۋىنا قاتىستى.
«حيچكوك 9» جوباسى كەمەڭگەر رەجيسسەردىڭ فيلمدەرىمەن جۇمىس جاساۋعا بەرگەن مۇمكىندىگىمەن مەنىڭ سازگەر رەتىندەگى ۇلكەن قىزىعۋشىلىعىمدى تۋدىردى، وسى رەتتە مۋزىكانى جازۋ كەزىندە كوركەمونەر باعىتىن تاڭداۋدا مەن تولىقتاي ەركىن بولدىم. «ءلاززات باعىنا» ارناپ كومپوزيسيا جازعان كەزدە، مەن ستراۆينسكيي جانە مەسسياننىڭ تۋىندىلارى، مايلز ديەۆيستىڭ دجازى جانە كۋرتيس مەيفيلدتىڭ سوۋلى، Beastie Boys رەبى مەن دي-دجەي Shadow سەكىلدى ونەردىڭ كوپتەگەن بۇلاقتارىنان شابىت الدىم. مەن وسى جۇمىس ءۇشىن BFI-عا جانە «حيچكوك 9» جوباسىن ءتۇرلى ەلدەردە، ونىڭ ىشىندە قازاقستاندا كورسەتۋگە مۇمكىندىك بەرگەنى ءۇشىن جەكە British Council ۇيىمىنا ۇلكەن العىسىمدى بىلدىرەمىن»، - دەدى اشىلۋ سالتاناتىندا دەنيەل پاتريك كوەن.
«حيچكوكتىڭ دىبىسسىز كينو اپتالىعى British Councilء-دىڭ قازاقستانداعى 20 جىلدىق قىزمەتىن تويلاۋ جانە قازاقستان مەن ۇلىبريتانيا اراسىندا مادەني قاتىناستاردى ورناتۋ شەڭبەرىندە وتۋدە. ونەر ارقىلى ەلدەرىمىزدىڭ اراسىندا ءوزارا تۇسىنىستىكتى نىعايتۋ British Councilء-دىڭ نەگىزگى قىزمەت باعىتتارىنىڭ ءبىرى بولىپ تابىلادى. وسى جوبانىڭ ارقاسىندا ءبىز الماتىنىڭ تۇرعىندارىنا ايگىلى بريتاندىق رەجيسسەردىڭ سيرەك جۇمىستارىن تاماشالاۋ مۇمكىندىگىن ۇسىنىپ، سونىمەن بىرگە وسى ءىس-شارا ءۇشىن مۋزىكالىق سۇيەمەمەلدەۋ بويىنشا بىرلەسكەن جۇمىستى جۇرگىزۋ جانە تاجىريبە الماسۋ ارقىلى قازاقستان مەن ۇلىبريتانيا مۋزىكانتتارىنىڭ باسىن بىرىكتىرۋگە مۇمكىندىك الدىق»، - دەپ اتاپ ءوتتى قازاقستانداعى British Council ديرەكتورى سايمون ۋيليامس.
بارلىق فيلمدەر قازاق، اعىلشىن جانە ورىس تىلدەرىندەگى سۋبتيترلەرمەن كورسەتىلەدى. «شامپان» ءفيلمى قازاقستاندىق دي-دجەي Aero-نىڭ مۋزىكالىق سۋىرىپ سالما اۋەنىمەن سۇيەمەلدەنەتىن بولادى. «مەن ارالىنان شىققان ادام»، «فەرمەردىڭ ايەلى» جانە «بوپسالاۋ» فيلمدەرى بريتاندىق پيانينوشى دجون ءسۋينيدىڭ مۋزىكالىق سۇيەمەلدەۋىمەن كورسەتىلمەك. فيلمدەردىڭ كورسەتىلىمى «سەزار» جانە «ارمان» كينوتەاترلارىندا وتەدى.
سونداي-اق، حيچكوكتىڭ دىبىسسىز كينو اپتالىعى شەڭبەرىندە دەنيەل پاتريك كوەن، كريستوفەر وستين جانە دجون سۋيني ستۋدەنتتەر مەن كاسىبي مۋزىكانتتارعا ارناپ شەبەرلىك سىنىپتارىن وتكىزەدى. شەبەرلىك سىنىپتارى قۇرمانعازى اتىنداعى قازاق ۇلتتىق كونسەرۆاتورياسىنىڭ قولداۋ كورسەتۋىمەن ۇيىمداستىرىلىپ وتىر.
الفرەد حيچكوكتىڭ توعىز دىبىسسىز ءفيلمىن قالپىنا كەلتىرۋ ماقساتىندا BFIء-دىڭ ۇلتتىق مۇراعاتى ۇيىمداستىرعان «حيچكوك 9» جوباسى قالپىنا كەلتىرۋ ءىسى بويىنشا قازىرگى كۇنگى ەڭ ءىرى ءارى ەڭ قيىن جوبا بولىپ تابىلادى. 1925 جىلدان باستاپ 1929 جىلعا دەيىنگى ارالىقتا تۇسىرىلگەن بۇل فيلمدەر شەبەر رەجيسسەردىڭ كەيىنگى جۇمىستارىنىڭ نەگىزىن قالاعان. حيچكوكتىڭ دىبىسسىز فيلمدەرى ۇلى رەجيسسەردىڭ كەيىنىرەك تۇسىرىلگەن شىعارمالارىن ءتۇسىنۋ ءۇشىن ۇلكەن مانگە يە جانە بۇل جوبا بۇكىل الەم كورەرمەندەرىنە رەجيسسەردىڭ تۋىندىلارىن جاڭا قىرىنان اشۋعا مۇمكىندىك بەرەدى.
پىكىر قالدىرۋ