ەكونوميكا جانە بيۋدجەتتى جوسپارلاۋ ۆيسە – ءمينيسترى ءمادينا ابىلكاسىموۆا نازارىنا!
ءمادينا ءابىلقاسىموۆا حانىم، ءسىزدىڭ ورالمانداردىڭ بىلىمدىلىك دەڭگەيىن قانداي كاتەگوريالارمەن ولشەگەنىن ءبىز بىلە الماي وتىرمىز. بايقاۋىمىزشا، شەتەلدەن كەلگەن قانداستارىمىزدىڭ ورىس ءتىلىن ءبىلۋ دەڭگەيى بيلىك ءۇشىن بىلىمدىلىك بولىپ ەسەپتەلەتىن سياقتى. ايتالىق، تاۋەلسىزدىك العان جىلداردان بەرى قانشاما بىلىكتى عالىمدار اتا-جۇرتقا ورالدى. ءقازىر سولاردىڭ كوپشىلىگى ءوز ماماندىعى بويىنشا جانە باسقا سالادا قىزمەت ەتىپ جاتىر. ءبىزدىڭ ەلدە شەتەلدىڭ وزىق ءبىلىمىن يگەرگەن عالىمدار ءۇشىن قازاق ەلىندە ەشقانداي جاعداي جاسالماعان. تەك ورىس ءتىلىن بىلسەڭىز عانا ءوز سالاڭىز بويىنشا جۇمىس اتقارۋعا بولادى. ونسىز بارلىق ەسىكتەر تارس جابىق.
سوندىقتان، ەلگە ورالعان قانداستارىمىزدىڭ بىلىكتىلىگىن پايدالانۋعا ەشقانداي جاعداي جاساماي تۇرىپ، ولاردىڭ كوبى ساۋاتسىز دەۋ ەش اقىلعا سىيمايدى. دۇنيەجۇزىلىك تاجىريبەگە سۇيەنسەك، عىلىمدى، ءوندىرىستى، ەكونوميكانى ساناۋلى ادامدار العا سۇيرەيدى. ەگەر ءبىزدىڭ قازاقستان جۇرتى سونشالىقتى ساۋاتتى بولسا، نەگە وسى كۇنگە دەيىن ەكونوميكامىز وركەندەپ نەمەسە عىلىمي جاڭالىق جاراتىپ، "نوبەل" سىيلىعىن الا الماي وتىرمىز؟ وسى تۇرعىندان العاندا، ءبىز ەڭ الدىمەن شەتەلدىڭ وزىق عىلىمىن يگەرگەن قانداستارىمىزدىڭ ءتيىستى ورىنعا جايعاسىپ، ءوز سالاسى بويىنشا قىزمەت اتقارۋعا جاعداي جاساۋعا ءتيىسپىز. تيىسىنشە، ەگىنشىلەر مەن مالشىلارعا دا ءتيىمدى ورتا جاراتۋعا مىندەتتىمىز.
ياعني، بىلىمدىلىك دەگەن ءمادينا حانىم ايتقانداي، ساندار مەن سيفرلاردان تۇرمايدى. ساپادان قۇرالادى. تاۋەلسىزدىك جىلدارىنان بەرى ەلگە ورالعان قانداستارىمىزدىڭ ءوندىرىستىڭ ءار سالاسىندا تابىستى جۇمىس جاساپ جاتقانىنا ءبارىمىز كۋامىز. وعان كوز جۇما قاراۋعا استە بولمايدى. سويتە تۇرا، «قازاق كوشىن» بىلىمدىلىك پەن بىلىمسىزدىككە تىرەپ قويۋ ناعىز ساۋاتسىزدىقتىڭ ءوزى.
ەگەر ءمادينا حانىمنىڭ ۋاقىتى بولسا، شەتەلدەگى قازاقتارمەن تىعىز جۇمىس جاساپ جاتقان «قامشى» سايتىنا قاراسىن. «ول – قازاق» دەگەن ايداردا شەتەل قازاقتارى تۋرالى تۇششىمدى جازىلعنا. قانشاما بىلىكتى قازاقتار شەتەلدە ءجۇر. قانشاۋى ەلگە ورالدى. بىلىمدىلىك ورىس تىلىمەن ولشەنبەيدى، مينيستر حانىم! ەگەر «قازاق كوشى» تۋرالى، «ورالماندار» تۋرالى اڭگىمە ايتۋ كەرەك بولسا، ەڭ الدىمەن سول ادامداردىڭ ورتاسىنا كىرىپ، ولارمەن پىكىر الىسۋى كەرەك. تەك قاعازداعى سيفرلارعا قاراپ ءسوز ايتسا، ايرانداي ۇيىعان جۇرتتىڭ بەرەكەسىنە سىزات ءتۇسىرىپ، اعايىندى ارازداستىرادى. مەملەكەتتىك قىزمەتكەر بولا تۇرا، مانساپتى شەنەۋنىك بولا تۇرا وسىنداي جىڭىشكە ماسەلەلەرگە ءاتۇستى قاراۋ ۆيسە- مينيستر حانىمنىڭ ءوزى ساۋاتسىز با دەگەن ويعا جەتەلەيدى ەكەن.
ءباشىر جانالتاي،
دۇنيەجۇزى يننوۆاسيالىق قورىنىڭ قازاقستانداعى وكىلى
