21 مامىر قجو-نىڭ ادەبيەتشىلەر ۇيىندە اقىن، تۇركى دۇنيەسى جىر فەستيۆالدەرىنىڭ ديپلومانتى داۋلەتبەك بايتۇرسىن ۇلىنىڭ «اللا، سەنىڭ ارقاڭ» اتتى شىعارماشىلىق كەشى ءوتتى. كەشتى ءتوراعانىڭ ورىنباسارى، اقىن مارالتاي رايىمبەك قۇتتىقتاۋ سوزبەن اشىپ بەرگەن سوڭ، ارى قاراي پوەزيا كەڭەسىنىڭ ءتوراعاسى، اقىن ءادىلعازى قايىربەكوۆ كەش تىزگىنىن قولىنا الىپ جۇرگىزىپ وتىردى. اقىن شىعارمالارى تۋرالى ت.تاشەنوۆ بايانداما جاسادى. «انارىس» باسپاسىنان شىققان «اللا، سەنىڭ ارقاڭ» اتتى جاڭا جىر جيناعىنىڭ تۇساۋكەسەر ءراسىمى جاسالدى. اقىن ر. نيازبەك، سىنشى ب. ساربالا، جازۋشى س. ەلۋباي، ج. احمادي، س. ءاسىپ، ا. اشيري ادەبيەتشى عالىم ا. ءىسىماقوۆا، م. احەت پىكىر ءبىلدىرىپ، ويلارىن ورتاعا سالدى. بۇگىنگى تاڭداعى ءمىناجات جانرىنىڭ وكىلى بولىپ قالىپتاسىپ كەلە جاتقان اقىن تۋرالى اتاپ ءوتتى.

كەش بارىسىندا تۋىسقان تۇركى مەملەكەتتەرىنەن: تۇركيا، ازەربايجان، قىرعىز ەلىنەن قۇتتىقتاۋلار بولدى. جوعارى وقۋ ورىندارىنان، گازەت-جۋرنال مەكەمەلەرىنەن ارنايى قۇتتىقتاۋلار وقىلىپ، سىي-سياپاتتار ۇسىنىلدى. اقىن ولەڭدەرىنەن كومپوزيسيا جاسالىپ، قويىلىم كورسەتىلدى. سوڭىندا ءوزى دە ەكى ولەڭ وقىپ، كەشكە كەلگەن قوناقتارعا راحمەت ايتتى. قىرعىزستان جازۋشىلار وداعى «نۇر بوربور» شىعارماشىلىق اكادەمياسىنىڭ شەشىمىمەن «مولدا باعىش» اتىنداعى حالىقارالىق ادەبي سىيلىقتى (مولدا باعىش سارىباي ۇلى(1888-1937)) بەردى. ونىڭ التىن ديپلومىن، مەدالىن جانە اقشالاي سىيلىعىن قىرعىز جازۋشىلار وداعى ءتوراعاسىنىڭ ءبىرىنشى ورىنباسارى، اقىن نۇرلان قالىبەكوۆ تاپسىردى.