قازاقستان كوممۋنيستىك پارتياسى (قپك) مەن جالپى ۇلتتىق سوسيال-دەموكراتيالىق پارتيانىڭ (جسدپ) جانە قوعامدىق ۇيىمداردىڭ وكىلدەرى، ساياساتكەرلەر، عالىمدار قاتىسۋىمەن 31 مامىر كۇنى الماتى قالاسىنداعى «قازاق كونسەرت» زالىندا «ەل بيلىگىن حالىققا قايتارايىق» دەگەن ۇرانمەن وتكەن جيىندا «جالپىۇلتتىق ازاماتتىق جينالىس» قۇرىلدى. بۇل تۋرالى «ازاتتىق راديوسى» جازدى.
جيىن بارىسىندا اتالعان ازاماتتىق جينالىستىڭ ەكى تۇراقتى قۇرىلىمى – ازاماتتىق كەڭەس پەن ءتورالقا جۇمىس ىستەيتىنى مالىمدەنگەن. جيىنعا قازاقستاننىڭ ءتۇرلى وڭىرىنەن 1000-عا تارتا ادام قاتىسىپ، قازاقستاننىڭ قازىرگى ەكونوميكالىق ساياساتى مەن اۆتوريتارلىق رەجيمىن سىناعان باياندامالار جاسالدى. «ازاماتتىق كەڭەستى» باسقاراتىن پرەزيديۋم سايلانىپ، ونىڭ قۇرامىنا جسدپ ليدەرى جارماحان تۇياقباي، قپك جەتەكشىسى عازيز الدامجاروۆ، «امان-ساۋلىق» ۇكىمەتتىك ەمەس ۇيىمىنىڭ باسشىسى باقىت تۇمەنوۆا، قازاقستاننىڭ ادام قۇقىقتارى بيۋروسى جەتەكشىسى ەۆگەنيي جوۆتيس، ءباسپاسوزدى قورعايتىن «ءادىل ءسوز» ۇيىمى باسشىسى تامارا كالەيەۆا جانە باسقالار كىردى. ايتا كەتەرلىگى كەڭەستىڭ ليدەرى بولمايدى، ونى وسى ازاماتتار بىرىگىپ باسقارماق.
ۇيىمداستىرۋشىلاردىڭ ايتۋىنشا، ازاماتتىق كەڭەس «پرەزيدەنتتىڭ وكىلەتتىكتەرىن شەكتەۋ، جەرگىلىكتى ءوزىن-وزى باسقارۋ جۇيەسىن قۇرۋ، كونستيتۋسيالىق سوتتى قالپىنا كەلتىرۋ، شيكىزات ءوندىرۋشى كەشەندەردى كەزەڭ-كەزەڭىمەن مەملەكەتتىڭ مەنشىگىنە قايتارۋ» ت.ب. باعىتتا جۇمىس ىستەمەك. جيىنعا قاتىسۋشىلار مامىردىڭ 29-ى كۇنى قازاقستان، بەلارۋس جانە رەسەي پرەزيدەنتتەرى قول قويعان «ەۋرازيا ەكونوميكالىق وداعى تۋرالى» كەلىسىمدى ءسوز ەتىپ، «پايداسىنان زيانى كوپ ينتەگراسيانى» سىناعان.
