تىلىڭە يە بولماساڭ ءىرى كولەمدە ايىپپۇل تولەيسىڭ. ەندى ءار ازامات عالامتوردا جازعان ءسوزى ءۇشىن زاڭ الدىندا جاۋاپ بەرەدى، دەپ حابارلايدى Bnews.kz. بۇل جونىندە باس پروكۋروردىڭ ءبىرىنشى ورىنباسارى يوگان مەركەلدىڭ مالىمدەمەسىنەن بەلگىلى بولىپ وتىر. ول ءوز سوزىندە: «زاڭ ەڭ الدىمەن عايبات پىكىر نەمەسە جالعان ءدىني اقپارات تاراتقاندارعا قاتىستى. كۇدىكتى جازبالار الدىمەن ارنايى ساراپتامادان وتەدى. ەگەر بىرەۋگە جالا جاۋىپ بالاعاتتاعانى انىقتالسا، اۆتورى جاۋاپقا تارتىلادى جانە 500 ايلىق ەسەپتىك كورسەتكىش كولەمىندە ايىپپۇل تولەيدى. بولماسا 3 اي قوعامدىق جۇمىسقا تارتىلادى»، - دەپ اتاپ كورسەتكەن.

ءتىپتى ينتەرنەتتەگى جازبانىڭ استىنا ادامنىڭ ار-نامىسىنا تيەتىن نەگىزسىز پىكىر جازعاندارعا 1 ميلليون تەڭگەگە جۋىق ايىپپۇل سالىنباق. ەلىمىزدىڭ قىلمىستىق كودەكسىنە وسىنداي جاڭا باپ ەنگىزىلگەلى جاتىر. ياعني، اقپاراتتىڭ جالعان ەكەنىن بىلە تۇرا قاساقانا قاۋەسەت تاراتقاندار ءبىرىنشى كەزەكتە جازالانادى. ەگەر پىكىر ءبىلدىرۋشى قاتەلەسكەنىن مويىنداعان جاعدايدا نەمەسە تاراتقان مالىمەتى شىن مانىندە دالەلدەنگەن بولسا سوت جوق. سونداي-اق، مەركەل الەۋمەتتىك جەلىلەردە ءجيى سىني كوزقاراس بىلدىرەتىندەرگە دە توقتالدى. باس پروكۋرور ورىنباسارىنىڭ ايتۋىنشا، جەكە پىكىر قالدىرعان ادامنىڭ ءسوزى دايەكپەن نەگىزدەلسە جاۋاپقا تارتىلمايدى. ال، بەلگىلى بىرەۋدەن شاعىم تۇسسە تەكسەرۋ جۇرەدى.