بۇگىن گيتلەر جايلى ماتەريال باسىپ، داۋلى بولعان «جۇلدىزدار وتباسى – اڭىز ادام» جۋرنالى بويىنشا سوت ۇكىمى شىقتى. شەشىم بويىنشا، جۋرنال رەداكتورى جارىلقاپ قالىباي ارىزدانعان 13 «ارداگەردىڭ» ءارقايسىسىنا ءبىر ميلليون تەڭگەدەن تولەم تولەۋگە جانە سوعىس ارداگەرلەرىنەن جاريا تۇردە كەشىرىم سۇراۋعا مىندەتتەلدى. ءبىزدىڭ بىلەتىنىمىز، جۋرنال اتاۋى «ابىز ادام» ەمەس، «اڭىز ادام». اتالمىش ءنومىردىڭ مۇقاباسىنا «ادامزات ارداگەرى» دەپ ەمەس «ادامزات قاسىرەتى» دەپ جازىلعان. جۋرنالدا باستان-اياق گيتلەردىڭ زۇلىمدىعى اشكەرەلەنىپ، تەك باسپا ءسوز قاعيداسى بويىنشا ناعاشىباي ەسمىرزا ەسىمدى اۆتوردىڭ «گيتلەر – فاشيست ەمەس» دەگەن جەكە پىكىرى جاريالانعان. سوتقا كۋاگەر رەتىندە تارتىلعان مۇحتار شاحانوۆتىڭ ايتقانىنداي، جۋرنالدىڭ «ءولى گيتلەر»  ەمەس «كوزى ءتىرى» ءوزى تۋرالى نومىرىندەدە ءارتۇرلى جۇرت پىكىرىنە ورىن بەرىلگەن. بۇل - تاۋەلسىز جۋرناليستيكانىڭ زاڭى. الدىڭعى جولى سوت وتىرىسىنا قاتىسقاندا جىگەرىمىز قۇم بولىپ قايتىپ ەدى. قالىڭ قازاق جيىلىپ، ءولى گيتلەردىڭ ارۋاعىمەن سوتتاسىپ جاتتى. بالانىڭ ويىنى، باقسىنىڭ جىنى دەرسىڭ. باياعىدا سۇيەگى قۋراپ قالعان گيتلەردىڭ قىلمىسى ءۇشىن تانىمال جۋرناليست جارىلقاپ قالىبايدى سوتقا تارتۋ – ەش قيسىنعا سيمايدى. بۇل سوتتىڭ ءبىر عانا «پايداسى» بولدى. بۇگىنگى قازاق بيلىگىنىڭ قانشالىقتى ماسقارا كۇيگە تۇسكەندىگى، اللا بەرگەن تاۋەلسىزدىكتىڭ قايداعى ءبىر قارانيەتتىلەردىڭ قولجاۋلىعىنا اينالعاندىعى، ءوز ەلىندە، ءوز جەرىندە تۇرىپ جەكە پىكىر ايتۋعا قازاققا مۇمكىندىك بەرىلمەگەندىگى تاريحقا جازىلاتىن بولدى. ءيا، بۇل سوت ارقىلى جارىلقاپ قالىباي نەمەسە «اڭىز ادام» سوتتالعان جوق. تاۋەلسىزدىك "سوتتالدى". سوتتالماعاندا شە؟ ءولى گيتلەر تۇگىلى ءتىرى ءپۋتيندى سىناۋعا دا بولمايدى. ەسەسىنە «ۇلى وتان سوعىسىن» جالاۋلاتىپ، سوۆەت وداعىنىڭ تۋىن كوتەرىپ جۇرە بەرسەڭ اقشاعا دا، باسقاعا دا قارىق بولاسىڭ.