توعجان ەسىمدى ءبىر قارىنداسىمىز «الاش ايناسىنا» حات جولداپتى. حاتتىڭ مازمۇنىمەن تانىسا كەلە ىزاعا دا بۋلىقتىق، ۇيالىپ قىزاردىق تا. وقىرمانمەن بولىسەرىمىزدى نە بولىسپەسىمىزدى بىلمەي ابدىراق قالدىق. «اۋرۋىن جاسىرعان ولەدى» دەگەندى ەسكە ءتۇسىرىپ حاتتى اشىق قوعام تالقىسىنا سالۋدى ءجون سانادىق. بىزدىڭشە بالا-شاعا تاربيەسىندەگى اكەنىڭ ءرولىن ارتتىرۋ كەرەك.

«مەنىڭ جاسىم 21-دە. جوعارعى وقۋ ورنىندارىنىڭ بىرىندە تالىمگەرمىن. قۇربىلارىمنىڭ ايتۋىنشا، اڭقاۋلاۋمىن. ادامدارعا سەنە بەرەم. بىرەۋگە عاشىق بولسام، قۇلاي عاشىق بولام. ءبىراق وتە قىزعانشاقپىن. سول قىزعانشاق مىنەزىمنىڭ كەسىرىنەن جۇرگەن جىگىتتەرمەن كوپ ۇزاماي اجىراسىپ كەتەم.

ەڭ العاش جىگىتپەن 18 جاسىمدا، ۋنيۆەرسيتەتتىڭ ءبىرىنشى كۋرسىندا وقىپ جۇرگەندە ءجۇردىم. جاقسى دوس بولدىق. ءبىر-بىرىمىزدى سۇيدىك. ءتىپتى بىرنەشە رەت ونىڭ پاتەرىنە بارىپ، بىرگە قونىپ تا ءجۇردىم. بىرگە جاتقانىمىز بولماسا، ودان ارىگە بارعان ەمەسپىز. ءبىر جىلدان كەيىن ول جىگىتپەن اجىراسىپ كەتتىك. ول اشىق-جارقىن مىنەزدى بولاتىن. ۇنەمى قىز بىتكەنمەن قالجىڭداسىپ، ويناپ-كۇلىپ جۇرەتىن. قۇربىلارىممەن دە الىسىپ ويناي بەرەتىن. ماعان سول ارەكەتى ۇنامايتىن. ويتكەنى قىزعاناتىنمىن. قىزعانىپ ءجىي ۇرىساتىنبىز. اقىرى اجىراسىپ تىندىق.

ودان كەيىن ءبىر جىل جىگىتپەن جۇرگەن جوقپىن. دۇرىسىن ايتقاندا عاشىق بولعان جوقپىن. كەيدە كەشتەردە ۇناپ قالعان جىگىتتەرمەن بىر-ەكى رەت سۇيىسكەنىم بولماسا... ءسويتىپ جۇرگەندە الەۋمەتتىك جەلى ارقىلى باسقا قالادا وقيتىن ءبىر جىگىتپەن تانىستىم. سۋرەت الماستىق. ۇزبەي حات ارقىلى سويلەسىپ جۇردىك. سولاي ءبىر-بىرىمىزدى ۇناتىپ قالدىق. ءبىر كۇنى ول مەنى ىزدەپ كەلمەكشى ەكەنىن ايتتى. مەن قارسى بولعام جوق. جاسىرىپ نە كەرەك، شىنىمدا ايتسام، قاتتى قۋاندىم. ايتقانداي، ول مەنى ارنايى ىزدەپ كەلدى.

ءبىزدىڭ قالاعا كەلگەن سوڭ ول پاتەر جالدادى. ءۇش كۇن بىرگە قىدىرىپ، بىرگە كينو كورىپ، بىرگە ساياباققا بارىپ سەرۋەندەدىك. مەن تۇسكە دەيىن ساباققا بارىپ كەلەم دە، قالعان ۋاقىتتا ۇنەمى بىرگە بولدىق. ءتىپتى ءۇش كۇن بىرگە قوندىق. ءبىراق بوتەن ارەكەتكە بارعان جوقپىز. قۇربىلارىم «ءبىر كورگەن ادامنىڭ قاسىنا قونا سالعانىڭ قالاي» دەپ رەنجىدى. ءبىراق مەن «وندا تۇرعان نە بار» دەپ ولاردى تىڭداعان جوقپىن. راسىمەن دە، وندا تۇرعان نە بار؟ ادامعا سەنۋ كەرەك قوي. ال «سۇيگەن ادامىڭا ەكى ەسە سەنۋ كەرەك» دەپ ويلايمىن. بوتەن ارەكەت جاساپ، توسەك قاتىناسىنا ءتۇسىپ جۇرگەن جوقپىز عوي.

ول جىگىتپەن دە ءبىر جىل جۇردىك. ول ەكى-ۇش اي سايىن كەلىپ تۇردى. كەلگەندە ۇنەمى بىرگە بولامىز. ۋاقىتىمىز وتە كوڭىلدى وتەتىن. سول كەزدە ءوزىمدى ناعىز باقىتتى ادام سەزىنىپ جۇرەتىنمىن. ءبىراق قاسىمنان كەتسە، «نە ىستەپ ءجۇر ەكەن، كىممەن ءجۇر ەكەن؟» دەگەن ساۋال مازالاپ، قىزعاناتىنمىن. سوسىن تەلەفون سوعام. تەلەفوندى كوتەرمەي قويسا، نە بىرەۋمەن سويلەسىپ جاتسا، ۇرىس باستاپ كەتەم. ۇرىسىمىز ءجيىلىپ، اقىرى ول جىگىتپەن دا اجىراسىپ كەتتىم.

ءقازىر قالاداعى باسقا ۋنيۆەرسيتەتتە وقيتىن ءبىر جىگىتپەن ءجۇرىپ ءجۇرمىن. كەيدە ونىڭ پاتەرى بوس بولعاندا، بىرگە قونامىز. بۇرىن جاي بىرگە قونىپ قانا جۇرەتىنبىز. سوڭعى كەزدە «توسەكتەس بولايىق» دەپ قويماي ءجۇر. «مەن سەنى تاستاپ كەتپەيمىن، ۇيلەنەمىن» دەيدى. ءبىراق ەرتەڭ ۇيلەنبەي كەتسە، قايتەم؟ جىگىتىمنىڭ ۇسىنىسى جايلى ءبىر قۇربىما ايتسام، «ەگەر ونىڭ ايتقانىنا كونبەسەڭ، ەرتەڭ-اق سەنى تاستاپ كەتەدى» دەيدى. قۇربىمنىڭ ايتۋىنشا جىگىت-قىزداردىڭ كوپشىلىگى ءجۇرىپ جۇرگەندە توسەكتەس بولادى ەكەن. «توسەكتەس بولۋدان قاشاتىن قىزداردى جىگىتتەر كوپ ۇزاماي تاستاپ كەتەدى» دەيدى. قۇربىم تۇرمىسقا شىققان بىرنەشە قىزدى مىسال ەتتى. ولاردىڭ ءبارى دە ۇيلەنگەنگە دەيىن توسەكتەس بولعان كورىنەدى.

قۇربىمنىڭ ايتقانىنىڭ دا جانى بار سەكىلدى. وتكەندە پاتەرى بوس بولىپ، بىرگە قونايىق دەگەن. ءبىراق مەنىڭ ءبىر جۇمىستارىم بولدى دا بارا المايتىنىمدى ايتتىم. سودان بەرى جىگىتىم مەننەن جىراقتاپ ءجۇر. تەلەفون سوقسام ايتەۋىر ءبىر سىلتاۋ ايتادى. ەندى ونىمەن دە اجىراساتىن سياقتىمىز. جوق الدە ونىڭ ۇسىنىسىن قابىلداۋىم كەرەك پە؟»