كوپتەن كۇتكەن ءسۇيىنشى جاڭالىق! بۇگىن ەۋروپالىق كوميسسيانىڭ ۇشۋ قاۋىپسىزدىگى جونىندەگى كوميتەتىنىڭ شەشىمىمەن قازاقستاندىق اۋەكومپانيالار ەۋروكوميسسيانىڭ «قارا تىزىمىنەن» رەسمي تۇردە شىعارىلدى. بۇل تۋرالى ينۆەستيسيا جانە دامۋ ءمينيسترى جەڭىس قاسىمبەك facebook پاراقشاسىندا جازدى.

"قۇرمەتتى، دوستار! بۇگىن ەۋروپادان قۋانىشتى حابار جەتتى. ەۋروپالىق كوميسسيانىڭ ۇشۋ قاۋىپسىزدىگى جونىندەگى كوميتەتىنىڭ شەشىمىنە سايكەس قازاقستاندىق اۋەكومپانيالار ەۋروكوميسسيانىڭ «قارا تىزىمىنەن» رەسمي تۇردە شىعارىلدى. 
ەستەرىڭىزدە بولسا، «قارا تىزىمگە» «ەير استانادان» باسقا بارلىق وتاندىق اۋە كومپانيالار كىرگەن بولاتىن. ەۋروكوميسسيانىڭ بۇگىنگى رەسمي شەشىمىنەن كەيىن وتاندىق اۋە كومپانيالارىمىزدىڭ ەۋروپاعا ۇشۋ مۇمكىندىگىنە ەندى شەكتەۋ قويىلمايتىن بولادى. 
ايتا كەتەيىك، ءبىز بۇل ناتيجەگە قول جەتكىزۋ ءۇشىن تالاي جىلدان بەرى تالماي جۇمىس ىستەپ كەلەمىز. سوڭعى جىلدارى وتاندىق اۋە كومپانيالارىمىزدىڭ حالىقارالىق ازاماتتىق اۆياسيا ۇيىمىنىڭ (يكاو) تالاپتارىنا ساي كورسەتكىشى 65%-دان 74%-عا دەيىن ارتتى. ەندىگى كەزەكتە ءبىز وسى كورسەتكىشتى ودان ءارى جاقسارتۋعا، قازاقستاندىق اۋە كومپانيالاردىڭ حالىقارالىق تالاپتارعا مەيلىنشە ساي بولۋىن قاداعالاۋدى جالعاستىرا بەرەمىز. بۇگىندە مينيسترلىك حالىقارالىق باعىتتارداعى اۋە تاسىمالىن ارتتىرۋ ءۇشىن جۇمىس جاساپ جاتىر. ەۋروكوميسسيانىڭ بۇگىنگى شەشىمى وسى جوسپارىمىزدى ءوز دەڭگەيىندە جۇزەگە اسىرۋعا مۇمكىندىك بەرەدى دەپ ويلايمىز"، - دەپ سۇيىنشىلەدى مينيستر.