كەشە، ەلىمىزگە اتاقتى كينورەجيسسەر ەرمەك تۇرسىنوۆتىڭ «مەلوچي جيزني» اتتى كىتابىنىڭ تۇساۋكەسەرى ۇلتتىق كىتاپحانانادا ءوتتى. كىتاپتىڭ بىرنەشە باسىلىمىن رەجيسسەر ۇلتتىق كىتاپحانا قىزمەتكەرلەرىنە سىيعا تارتىپ، ۇلكەن العىسىن ءبىلدىردى. ءتىلشى ماماندىعىن بىتىرگەن رەجيسسەر ءوزىنىڭ جازۋشىلىق قىزمەتىن مەكتەپ قابىرعاسىندا ءجۇرىپ باستاعان ەكەن.
«مەكتەپتە وقىپ جۇرگەنىمدە بۇزىقتاۋ بالا ەدىم، ءبىلىم كورسەتكىشىم دە تىم جوعارى ەمەس ەدى. قازاق تىلىندە بولسىن، ورىس تىلىندە بولسىن جازعان شىعارمالارىما ەشقاشان جوعارى باعا العان ەمەسپىن، بالكىم، بالالىق شاقتىڭ قىزىعىمەن ءمان بەرىپ قاراماعان بولارمىن. انام ادەبيەت ءپانىنىڭ ءمۇعالىمى بولىپ جۇمىس ىستەگەن. ول كىسى جازۋشىلىقپەن اينالىسقاندى جاقسى كورەتىن، سودان مەن دە انامنىڭ ىقپالىنان جازۋشىلىققا بەت بۇرا باستادىم»، - دەپ، رەجيسسەر ءوزىنىڭ جازۋشىلىققا، ءتىلشى قىزمەتىنە قالاي كەلگەنىن بايانداپ بەردى.
«مەن ءتىلشى بولامىن دەپ ويلاعان جوقپىن. ءبىزدىڭ اۋىلدا كونسلاگەردە وتىرىپ شىققان ءبىر كىسى بولاتىن، ول ءۇش رەت قاشىپ ءۇش رەت ۇستالعان، سودان ونى اتۋ جازاسىنا كەسكەننەن سوڭ ءتورتىنشى رەت قاشىپ شىعىپ، سول بويى ۇستاتپاي كەتكەن. سول ادام جايلى ءوزىمنىڭ تىرناق الدى ماقالامدى جازدىم. كەيىننەن ول ماقالام جۇرتتىڭ نازارىنا ىلىگىپ، «لەنيندىك» گازەت بەتتەرىندە جارىق كوردى. وقۋشى كەزىمدە شىعارمادان وڭ باعا الىپ كورمەگەن مەن ءۇشىن بۇل جاعداي ۇلكەن جاڭالىق بولدى. كيوسكىلەردە ساتىلىپ جاتقان گازەت باسىلىمىنىڭ بىرنەشە داناسىن ساتىپ الدىم دا مەكتەپتەگى مۇعالىمدەرىمە ماقتانىشپەن كورسەتتىم. بۇل ماقالامنان كەيىن دە بىرنەشە تاقىرىپتا جازىپ شىعارعان بولاتىنمىن. سودان ءبىر كۇنى قاسكەلەڭنىڭ باسپا ءىسىنىڭ ديرەكتورى حابارلاسىپ «كەلىڭىز دە گونورارىڭىزدى الىپ كەتىڭىز» دەدى، ءبىراز ۋاقىت اڭ-تاڭ بولىپ تۇرىپ قالدىم. باردىم، اقشامدى الدىم، ءبىراق سول كەزدەگى سەزىمدى سوزبەن ايتىپ جەتكىزە المايمىن. مەكتەپتى بىتىرگەن سوڭ قازۇۋ-دىڭ جۋرناليستيكا ماماندىعىنا تاپسىرىپ ءبىرىنشى جىلى قۇلاپ قالدىم دا، ەكىنشى جىلى وقۋعا قابىلداندىم. سولاي سولاي ءوزىمنىڭ ءتىلشى رەتىندەگى كەرەرامدى باستادىم».
«جازۋشىلىققا بەت بۇرعانشا مەن فۋتبول كوماندالارىنىڭ بىرىندە ويىنشى دا بولعانمىن. ول كەزدەرى فۋتبولعا دەگەن قىزىعۋشىلىعىم ەرەكشە ەدى، ءوزىمدى، ءتىپتى، بولاشاقتا فۋتبوليست رەتىندە ەلەستەتەتىنمىن»، - دەپ ەرمەك تۇرسىنوۆ ءوزىنىڭ باسقا دا قابىلەتتەرىن ايتىپ ءوتتى.
وتكەن ومىرىنەن ءبىراز دەرەكتەر بەرە وتىرىپ، كىتاپ جازۋعا قالاي كەلگەندىگىنە دە توقتالدى.
«ەڭ العاش شاعىن-شاعىن اڭگىمەلەرىمدى ينتەرنەت جەلىسىندەگى سايتتاردىڭ بىرىندە جاريالاپ ءجۇردىم. سول سايتتىڭ وزىندە ءبىراز وقىرمان جينالىپ قالدى. ءبىر كۇندەرى ءوزىمنىڭ قاسىمدا بىرگە جۇرگەن دوسىم وسى جازبالارىمنىڭ باسىن قوسىپ ءبىر كىتاپ قىلىپ شىعارايىق دەپ وي تاستادى. ۇزاق ويلانعانىم جوق، نەگە شىعارماسقا دەدىم. سودان جازبالارىمنىڭ بارلىعىن جيناپ، تاعى دا ءبىراز قوسىپ، ارتىق جەرلەرىن الىپ، وڭدەپ، بۇگىن، مىنە، سول تۋىندىمنىڭ تۇساۋكەسەرىن وتكىزىپ جاتىرمىز».
سونىمەن قاتار، رەجيسسەر ەرمەك تۇرسىنوۆ الداعى جوسپارلارىنان دا حاباردار ەتتى.
«جازۋشىلىققا بەت بۇرعانمەن، بۇل كينودان الشاقتاپ كەتتىم دەگەن ءسوز ەمەس. قازىرگى تاڭدا «كينومەحانيك» دەگەن جاڭا كينونىڭ ءتۇسىرىلىمىن باستايىن دەپ جاتىرمىن، جاس شاماسى ءبىرازعا كەلىپ قالعان قاريالارعا كاستينگ جاريالاپ، كينومنىڭ كەيىپكەرىن ىزدەۋ ۇستىندەمىن. الدىمەن ءتۇسىرىلىم بۋداپەشت قالاسىندا وتەدى، كەيىننەن ەلىمىزگە كەلىپ جالعاستىرامىز. كينومنىڭ مازمۇنى ازىرگە قۇپيا بولسىن، جارىققا شىققاننان كەيىن سىزدەرمەن تاعى دا ءبىر باس قوسامىز دەگەن ۇمىتتەمىن».
قامشى پورتالى ەرمەك تۇرسىنوۆ مىرزاعا الداعى ۋاقىتتاردا قالامى قۇرعاماسىن دەپ ساتتىلىك تىلەيدى. وتاندىق ساپالى تۋىندىلاردىڭ كوبەيگەنىنە ءبىز ءاردايىم قۋانىشتىمىز.
قامشىگەر: لابيحان نازەركە
