«ەلىمىزدەگى مەملەكەتتىك قىزمەت سالاسىنداعى رەفورمالار بۇگىندە الەمنىڭ كوپتەگەن ەلدەرىنىڭ قىزىعۋشىلىعىن تۋدىرۋدا. بۇل تۋرالى بۇگىن ق ر مەملەكەتتىك قىزمەت ىستەرى اگەنتتىگىنىڭ ءتوراعاسى ءاليحان بايمەنوۆ تايلاند كورولدىگىنىڭ مەملەكەتتىك قىزمەت جونىندەگى كوميسسيا ءوفيسى باس حاتشىسىنىڭ ورىنباسارى ۆيسووت پراسيتسيريۆونگسەمەن كەزدەسۋ بارىسىندا ايتتى.«ەلىمىزدەگى مەملەكەتتىك قىزمەت سالاسىنداعى رەفورمالار بۇگىندە الەمنىڭ كوپتەگەن ەلدەرىنىڭ قىزىعۋشىلىعىن تۋدىرۋدا».
"قازاق ءۇنى" گازەتىنەن
ماقتانساڭ قازاق، وسىلاي ماقتان!
ءاليحان بايمەنوۆتىڭ ايتىپ وتىرعانىنا قاراعاندا، مەملەكەتتىك قىزمەت سالاسىنا رەفورمالار جاساۋدا ءبىزدىڭ قازاقستان – الەمدەگى تەڭدەسى جوق وزىق ەلدەردىڭ ءبىرى كورىنەدى. بۇعان سەنەسىڭ بە، سەنبەيسىڭ بە؟..
...ءالى ەسىمدە، 1990 جىلى سول كەزدەگى ەلىمىزدەگى مارقۇم باتىرحان دارىمبەت ەكەۋمىز شىعارىپ جاتقان تۇڭعىش تاۋەلسىز ساياسي باسىلىم – «ازات» گازەتىنە جازعان ءبىر ماقالامنىڭ تاقىرىبىن: «الەمدەگى ەڭ ماقتانشاق ەل – ءبىزدىڭ كەڭەس وداعى بولۋى مۇمكىن» دەپ قويعانىم. شىنىندا دا، ءومىردىڭ قاي جاعىنان الىپ قاراعاندا دا كەڭەس وداعى شەكتەن شىققان ماقتانشاق ەل ەدى!
سودان بەرى ارادا كوزدى اشىپ-جۇمعانشا شيرەك عاسىرعا جۋىق ۋاقىت تا زىمىراپ وتە شىعىپتى! الگى «ماقتانشاق ەل» - كەڭەس وداعى كەلمەسكە كەتتى! كەڭەس وداعىنىڭ قۇرامىنداعى مەملەكەتتەردىڭ ەڭ سوڭى بولىپ، قازاقستان ازەر دەگەندە تاۋەلسىز مەملەكەت بولدى!
سول كەلمەسكە كەتكەن كەڭەس يمپەرياسىنىڭ قۇرامىندا 15 وداقتاس رەسپۋبليكالاردىڭ بولعانى بەلگىلى. بۇگىندەرى سول «ون بەستىڭ» دەنى ءوز الدىنا جەكە تاۋەلسىز مەملەكەت! ءالى كوزدەرى بوزارىپ، تاۋەلسىزدىكتەرىن اڭساپ وتىرعان ولاردىڭ بودانداعىلارى قانشاما؟ بۇل – ءوز الدىنا بولەك اڭگىمە.
ال، ەندى «ماقتانشاقتىق» جونىندەگى اڭگىمەمە قايتا ورالايىن!
مەنىڭ كەشەگى كەلمەسكە كەتكەن كەڭەس وداعىن «ماقتانشاق» ەل دەپ جۇرگەنىم بەكەر بولىپ شىقتى. ولاي دەيتىنىم، ماقتانشاقتىق جونىنەن ول كەڭەس وداعى مىنا ءبىزدىڭ قازاقستاننىڭ جانىندا ءجىپ يىرە الماي قالادى ەكەن.
وعان دالەل، جوعارىدا سوزىنەن ءۇزىندى كەلتىرىپ وتىرعان ءاليحان بايمەنوۆتىڭ ايتقاندارى.
ءاليحانشا ايتقاندا، قازاقستان مەملەكەتتىك قىزمەتكە رەفورمالار جاساۋدا الەمدەگى الدىڭعى قاتارلى مەملەكەت سانالسا، انا 5 مىڭ جىلدىق تاريحى بار جۇڭگو مەملەكەتى، 300 جىلعا جۋىق تاريحى بار اقش، سونداي-اق، كەزىندە جارتى الەمدى بيلەگەن انگليا، فرانسيا، گەرمانيا، يتاليا، ت.ب. مەملەكەتتەر مەملەكەتتىك قىزمەتكە رەفورمالار جاساماي، بۇگىنگە دەيىن اۋىزدارىن اشىپ، ايعا قاراپ، شوشقا تاعالاپ كەلگەن بە، سوندا؟
ولار بۇگىنگە دەيىن قازاقستان دەگەن مەملەكەت بولماسا، ونىڭ رەفورماتورى ءاليحان بايمەنوۆى بولماسا، كورگەن كۇندەرى قاراڭ ەكەن عوي؟..
ءبىزدىڭ قازاقستان بيلىگى قاسيەتتى ارقادا از ۋاقىتتىڭ ىشىندە اتى جوق استاناسىن سالۋىن، ورىستارمەن بىرىگىپ، قازاقستاندا تۇڭعىش رەت اتوم ەلەكتور ستانساسى قۇرىلىسىن باستاعىسى كەلگەنىن، انا مۇحيتتىڭ ارعى جاعىنداعى كانادادان اسىل تۇقىمدى بۇقالاردى ۇشاقپەن جەتكىزۋىن، ءتىپتى، ارقاداعى جابايى قاراقۇيرىقتاردىڭ «ەۋرازيالىق ەكونوميكالىق وداققا» مۇشە بولعالى بەرى كۇرت ءوسىپ كەتۋىن («قازاقستان» تەلارناسى، «تاڭشولپان» باعدارلاماسى)، ت.ب. الەمدەگى تەڭدەسى جوق جاڭالىققا جاتقىزعاندا، اۋزىڭ اشىلىپ، كوزىڭ جۇمىلىپ قالادى ەكەن. مىنە، ناعىز ماقتانشاق مەملەكەتتىڭ كىم ەكەنىنە ەندى كوزىڭ جەتكەن شىعار...
«حابار» مەن «قازاقستان» تەلەارناسىن قاراساڭ، ءبىزدىڭ قازاقستان ءومىردىڭ قاي قىرىنان دا الەمدەگى «ەڭ وزىق ەل» ەكەنىنە ەرىكسىز كوزىڭ جەتەدى.
ءيا، قازاقستان بيلىگىنىڭ شەكتەن شىققان ماقتانشاقتىعى كۇن وتكەن سايىن شەكتەن شىعىپ بارادى.
جۇماش كوكبورى،
10.07.2014 جىل.
پىكىر قالدىرۋ