بەلگىلى تەلەجۇرگىزۋشى، ءتىلشى اسحات سادىرباي Miss Kazakhstan بايقاۋىنا قاتىسقان ارۋلارىمىزدى سىنعا الىپ، ول جوبا جايلى ءوز ويىن جالپاق جۇرتقا مالىمدەدى. تەلەجۇرگىزۋشى بۇل جايلى پىكىرىن Facebook-تەگى پاراقشاسىندا جازعان بولاتىن.

«Miss Kazakhstan بايقاۋىنا قوس قولداپ قارسىمىن. ونىڭ بىزگە تۇككە دە پايداسى جوق. ءىش كيىممەن الەمنىڭ ساxناسىنا شىعىپ ادەمى ارۋ دەگەن اتاققا تالاسۋ نە تەڭىمىز؟ قازاق قىزىنىڭ سىر تارتار سۇلۋلىعى، ادەمىلىگى تالايلاردى باياعىدا-اق تاڭعالدىرعان، مويىنداتىپ قويعان، ءقازىر دە شەتەلدەن كەلگىشتەپ كەتكەندەر ونى قايتا-قايتا ايتىپ مويىنداپ ءجۇر عوي. سوندا قاراكوزدەرىمىز نەسىمەن سۇلۋ دەپ ءبىر ءسات ويلانىپ كورىڭىزشى. ولار تازالىعىمەن، پاكتىگىمەن، يناباتتىلىعىمەن، يبالىلىعىمەن، تاربيەسىمەن، مادەنيەتىمەن سۇلۋ. ءبىزدىڭ قىزدار –ءبىزدىڭ قارىنداستارىمىز، اپكەلەرىمىز، انالارىمىز، قۇداشا-بالدىزدارىمىز، قايىنبيكە-جەڭگەلەرىمىز. ويلانايىق. ولارعا كۋپالنيك كيگىزىپ ساxناعا شىعارىپ ابىروي تاپپايمىز. ميسس كازاxستانسىز-اق بارلىق قىز ادەمى، بارلىعى باس جۇلدەگە لايىق. بۇل سۇلۋلىق بايقاۋىنىڭ ار جاعىندا قانداي ساياسات جاتقانى بەسەنەدەن بەلگىلى. دوعارماساق تەكتىلىگىمىزگە سىن. تەگى بايقاۋسىز بولمايدى دەسەڭىزدەر ءوزىمىزدىڭ باياعى «قىز سىنى» دەگەن جاپ-جاقسى بايقاۋدى جاڭا فورماتتا قايتا جاڭعىرتۋعا بولادى. جىلدا وسى، قاتىساتىن قازاق، ونى كىتاپ وقىمايدى، نادان دەپ مازاق ەتەتىن دە قازاق. ولارعا كۇلگەنشە جاعدايدى تۇزەيىكشى. جاستاردىڭ، اسىرەسە ادەمى قىزداردىڭ قوعامداعى ءرولى ميسس كازاxستانمەن شەكتەلمەيتىنىن ۇعىندىرايىقشى، تۇسىندىرەيىكشى ەرتە باستان، مەكتەپ جاسىنان جاقسىعا ۇيرەتەيىكشى، كىتاپقا قىزىقتىرايىقشى. ال، مىناۋ ارسىزدىقتى دوعارايىق. ءقازىر كۇلكىگە قالعان دا ، وعان كۇلگەن دە ۇيالمايتىن زامان بولدى عوي. وندايعا قۇلاق ۇيرەندى، ەندى ەت ولمەسىن. ەسىمىزدى جيايىق. سىناي بەرگەنشە ءبىر ادام بولسا دا تامشىداي ۇلەس قوسسىن. ءوزىمىزدى ءوزىمىز عانا تۇزەيمىز. وزگەنىڭ وعان باسىنىڭ اۋىرعانى قانشا؟!»، - دەپ جازادى  اسحات سادىرباي.