ءبىر جىل بۇرىن سايا توميوكا پەن جىگىتى گريففين مەدەن نيۋ-يورك قالاسىنا قىدىرىپ كەلەدى. تايمس-سكۆەردە سۋرەتكە تۇسىرۋمەن اينالىساتىن قازاقستاندىق فوتوگراف اركەن اۆان ءسۇيىسىپ تۇرعان قوس عاشىقتى دا تاسپاسىنا باسىپ العان. الايدا قىز بەن جىگىت قالادان جىلدام كەتىپ قالادى. ال وتكەن اپتادا 23 جاستاعى مەددەن 3 جەلتوقسان كۇنى وكلەندتە بولعان ءورت كەزىندە قازا تاپقان 36 ادامنىڭ تىزىمىندە بولعان. بۇل تۋرالى قازاقپارات حابارلايدى.

ونىڭ ولىمىنەن سوڭ توميوكا 4 جەلتوقسان كۇنى فەيسبۋكتە وزدەرىن سۋرەتكە تۇسىرگەن فوتوگرافتى تابۋدى ءوتىنىپ جازبا قالدىردى.

“مۇمكىن ءبىر عاجايىپ بولىپ قالار، ءوتىنىش، بولىسىڭىزدەرشى. دوستار، سىزدەردىڭ كومەكتەرىڭىزبەن مۇمكىن سول فوتوگرافتى تاۋىپ قالارمىن. بۇل مەنىڭ جۇرەگىمدە قالاتىن اسەرلى ءسات. مەن سول ءبىر باقىتتى شاقتى قايتا كورىپ، سەزىنگىم كەلەدى”، – دەپ جازدى ول.

ونىڭ جازباسى 300-دەن استام رەت بولىسىلگەن. “مەن ولاردىڭ تۇرلەرىن تانيمىن. ويتكەنى، ولار شىنىندا دا كەرەمەت ءساتتى باستان كەشىپ تۇردى”، – دەدى CNN-گە سۇحبات بەرگەن اۆان.

وتكەن بەيسەنبىدە سايا جازبانىڭ بولىسىلگەندىگى ارقاسىندا اركەن اۆاندى تاۋىپ، فوتوگراف وعان سول ءبىر سۋرەتتى سىيلادى.

“ءبىزدىڭ گريففين ەكەۋمىزدىڭ ماحابباتىمىزدى ەستەلىككە اينالدىرعانى ءۇشىن اركەن اۆانعا العىسىم زور”، – دەپ جازدى سايا.

وسىدان سوڭ ول ءوزىنىڭ گريففينگە ارناپ جازعان حاتىن دا جاريالادى.

“مەنىڭ قىمباتتى گريففينىم. سەن ءورت قۇرساۋىندا قالىپ قويعان كەزدە، مەن لاس-ۆەگاستا بيلەپ جاتتىم. مەن ءوز نومىرىمدە بىرنەشە ساعات بويى سەنى كۇتتىم، سەنەن كەلەر حاتتى كۇتتىم. كەلەسى كۇنى دە ۇيىقتامادىم. كۇدەرىمدى ۇزبەي وكلەندتەگى شەريفتىڭ وفيسىندە ساعاتتاپ سەنى كۇتۋدى جالعاستىرا بەردىم. مەن سەنى جوعالتسام قالاي كۇن كەشەمىن دەپ ۋايىمعا باتتىم. ءبىراق، مەن بەرىلگەن جوقپىن. ءبىز سەنى 24 ساعاتتان سوڭ تاپتىق. ءبىراق، ءبارىبىر سەنى تاپقانداي كەرەمەت كۇي كەشپەدىم. مەن عاجايىپقا سەنگەن ەدىم”، -دەدى ول.