قازاقستاننىڭ بىرنەشە قالاسىندا تاۋەلسىزدىكتىڭ 25 جىلدىعىنا وراي دومبىراشىلار فلەشموبى ءوتتى، - دەپ حابارلايدى tengrinews.kz

مىڭعا جۋىق ادام قۇرمانعازىنىڭ "سارىارقا" كۇيىن ورىندادى. 

مىسالى، قاراعاندى وقۋشىلارى، ستۋدەنتتەرى جانە كاسىبي اسپاپ شەبەرلەرى - بارلىعى 100-گە جۋىق دومبىراشى - سينحروندى تۇردە "سارىارقا" كۇيىن ورىندادى. ۇيىمداستىرۋشىلاردىڭ ايتۋىنشا، مۇنداي شارا ەلىمىزدىڭ ءبىراز وڭىرىندە ءبىر ۋاقىتتا باستالعان. 
"سارىارقا" كۇيى پەتروپاۆلدا دا ورىندالدى. وندا 50 دومبىراشى قاتىستى - نازاربايەۆ زياتكەرلىك مەكتەبىنىڭ وقۋشىلارى، فيلورمونيا ارتىستەرى، سونىمەن قاتار، وقۋشىلار مەن مۇعالىمدەر قاتىستى. 

پاۆلوداردا قۇرمانعازىنىڭ كۇيى ءىرى ساۋدا ورتالىعىندا ورىندالدى. مۇندا پاۆلودار مۋزىكا كوللەدجىنىڭ 25 جاس دومبىراشىسى كۇي شەرتتى. ۇيىمداستىرۋشىلاردىڭ ايتۋىنشا، ساۋدا ورتالىعى ناعىز كونسەرت زالىنا اينالدى، بۇل شارا ادامداردىڭ ۇلتتىق قۇندىلىققا جاقىن بولۋى ءۇشىن ىستەلگەن. 

سەمەيدە وسى فلەشموبقا نازاربايەۆ زياتكەرلىك مەكتەبىنىڭ وقۋشىلارى قاتىستى - 30 دومبىراشى جانە 20 ءبيشى. دومبىراشىلار "سارىارقا"، "اداي" جانە "بالبىراۋىن" كۇيلەرىن ورىندادى. سونىمەن قاتار، وقۋشىلار ساۋدا ورتالىعىنا كەلۋشىلەردى "ساعىندىم ەلىم" كومپوزيسياسىنا بيلەۋىمەن تاڭعالدىردى. 

وسكەمەندە بۇل شارا ولگا رىپاكوۆا اتىنداعى سپورت كەشەنىندە ءوتتى. مۇنداعى باستاما ۇلكەن كونسەرتكە اينالدى. وعان 600-گە جۋىق ادام قاتىستى. 

وسىنداي شارا اقتاۋ قالاسىندا دا وتكەن. وندا وسكەنبايەۆ اتىنداعى وبلىستىق فيلورمونيانىڭ ستۋدەنتتەرى مەن قىزمەتكەرلەرى قاتىسقان. فيلورمونيا ديرەكتورىنىڭ ورىنباسارى جاڭىلسىن مۋجييەۆانىڭ ايتۋىنشا، قۇرمانعازىنىڭ "سارىارقا" كۇيىن ورىنداۋعا 40 مۋزىكانت قاتىسقان. شارا "اقتاۋ" ساۋدا ورتالىعىندا وتكىزىلگەن. 
 

، ،