7 جەلتوقسان كۇنى "نۇر وتان" پارتياسىنىڭ رەسپۋبليكالىق قوعامدىق قابىلداۋ بولمەسىندە ق ر ىشكى ىستەر ءمينيسترى ق.قاسىموۆپەن وتكەن قابىلداۋعا 9 جاسار قىز مەيىرگۇل الماتى قالاسىنان كەلىپ، اتا-اناسىنىڭ ۆيزا مەرزىمى ءوتىپ كەتۋىنە بايلانىستى بەس جىلسىز كەلە المايتىن ەتىلىپ ەلدەن تىسقارى جەرگە شىعارىلعانىن، ءوزىنىڭ الماتىدا جالعىز قالعانىن ايتىپ، اكە-شەشەسىن قايتا ورالتۋ تۋرالى مينيستردەن كومەك سۇراعانى جايلى قامشى پورتالى جازعان بولاتىن.

وسى ماسەلەگە بايلانىستى، 8 جەلتوقسان كۇنى ق ر ىشكى ىستەر مينيسترلىگى مەملەكەتتىك ءتىل جانە اقپارات دەپارتامەنتىنىڭ ديرەكتورى الماس سادۋبايەۆ «... قازىرگى ۋاقىتتا ءىىم تاراپىنان ولاردىڭ قازاقستانعا كەلۋىنە ەشقانداي شەكتەۋ جوق. قحر-داعى قازاقستان رەسپۋبليكاسىنىڭ ەلشىلىگىندە ۆيزا راسىمدەگەن جاعدايدا ولار قازاقستانعا ەش كەدەرگىسىز كەلە الادى» دەپ 9 جاسار مەيىرگۇلگە ءۇمىت سىيلاعان ەدى.

الايدا، جاعداي ءبىز ويلاعاننان مۇلدەم باسقاشا بولىپ شىقتى. ۇرىمجىدەگى مەيىرگۇلدىڭ اناسى ورالحانعا تەلەفون ارقىلى حابارلاسقاندا، ول بۇل مالىمەتتى جوققا شىعاردى. وسى ماسەلە توڭىرەگىندە «نۇر وتان» پارتياسىنىڭ قىزمەتكەرى اۋىت مۇقيبەك ءوزىنىڭ Facebook-تەگى پاراقشاسىندا جاريالادى:

«مەيىرگۇلدىڭ اتا-اناسى قىتايعا بارعان سوڭ، ۇرىمجىدەگى قازاقستان كونسۋلدىعىنان 2016 جىلدىڭ 22 تامىزىنان باستاپ، 2017 جىلدىڭ 21 تامىزىنا دەيىن ءبىر جىلدىق قازاقستانعا ءوتۋ ۆيزاسىن العان. ءبىراق، كونسۋدىق بازاداعى اكىمشىلىك جاۋاپقا تارتىلعان دەگەن مالىمەتكە سۇيەنىپ، ولاردىڭ ۆيزالارىنا «جويىلدى» دەگەن تاڭبا باسىپ تاستاعان. سول سەبەپتى ولاردىڭ قازاقستانعا قايتىپ كەلە الماي وتىرعانىن ايتادى. ونىڭ ۇستىنە، ورالحان ەكىنشى بالاسىنا جۇكتى ەكەن. قازاقستاندا بوسانعىسى كەلەتىنىن ايتىپ، كومەك سۇراپ وتىر...

قازاقستان رەسپۋبليكاسىنىڭ ۇرىمجىدەگى كونسۋلدىعىمەن تەلەفون ارقىلى بايلانىسقى شىعىپ كورىپ ەدىك، تىلدەسۋ مۇمكىن بولمادى.

بۇل ماسەلە بويىنشا «نۇر وتان» پارتياسى اينالىسىپ جاتقان كورىنەدى، ناتيجەسى نە بولار ەكەن؟ ونى الداعى ۋاقىتتاردا بىلەتىن بولامىز.

ءقازىر وسى اكىمشىلىك قۇقىق بۇزۋشىقلىق جازاسىنا تارتىلىپ، مەيىرگۇل سەكىلدى تۋمالارىنان ءبولىنىپ قالعان جانداردىڭ سانى از ەمەس.

مىسالى، سەناتور مۇرات باقتيار ۇلىنىڭ 6 قازاندا ق ر ىشكى ىستەر مينيسترلىگىنە دەپۋتاتتىق ساۋال جىبەرىپ انىقتاۋىنشا، 2015 جىلى جالپى 307 ەتنيكالىق قازاق ەلدەن تىس جەرگە شىعارىلىپتى. 
2016 جىلدىڭ العاشقى توعىز ايىندا 199 قانداسىمىز جازاعا تارتىلىپ، ءوز ەلىنە قايتارىلىپتى. 
ال، 2014 جىلعى كورسەتكىش بۇدان دا كوپ بولۋى مۇمكىن!
بۇرىن ءبىر مارتە اكىمشىلىك قۇقىق بۇزعان شەتەلدىك ازامات جازاعا تارتىلىپ، ءوز ەلىنە قايتارىلاتىن بولسا، وتكەن جىلى قايتا قابىلدانعان زاڭ جوباسىندا بۇل نورما بىرنەشە رەت بۇزعان داعدايدا ەلدەن شىعارىلادى دەپ وزگەرتىلدى («حالىقتىڭ كوشى-قونى تۋرالى» زاڭنىڭ 49-باپ، 5-تارماعى).
سوعان قاراماستان، بيىلعى – 2016 جىلدىڭ العاشقى توعىز ايىندا 199 ءقانداسىمىزدىڭ جازاعا تارتىلىپ، ءوز ەلىنە قايتارىلۋى – جۇرتتى قاتتى الاڭداتىپ وتىر.

مىنە، قازاقستان تاۋەلسىزدىگىنىڭ 25 جىلدىعى مەرەكەسىنە وراي ۇلت كوشباسشىسى نۇرسۇلتان نازاربايەۆتىڭ تاپسىرماسىمەن 30000 قىلمىسكەرگە راقىمشىلىق جاساۋ تۋرالى زاڭ جوباسى قابىلداندى.
سوندىقتان، قازاقستان رەسپۋبليكاسىنىڭ ق ر ىشكى ىستەر مينيسترلىگى دە 2013 جىلعى 10 جەلتوقساندا قابىلدانعان «كوشى-قون» زاڭىنىڭ تىم قاتاڭدىعىن ەسكەرە وتىرىپ، قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنە سايكەس كوشى-قون زاڭناماسىن بۇزعانى ءۇشىن، 2014 جىلدىڭ 1 قاڭتارىنان بەرى سوت شەشىمىمەن ەلدەن تىس جەرگە شىعارىلعان سول قانداستارىمىزعا دا ءبىر مارتە راقىمشىلىق جاساسا، وتە دۇرىس ءھام ساۋاپ بولار ەدى!»

9 جاسار قىزدىڭ تاعدىرى بارلىعىمىزدى دا الاڭداتىپ وتىر، سونىمەن قاتار سول سەكىلدى قانشاما جاندار ءوز جاقىندارىنان قول ءۇزىپ، ءتىپتى تىلدەسە دە الماي جاتىر. قازاق بالاسىن شەتكە تەۋىپ، جەتىمىن جىلاتپاعان ەل ەدى، ال قازىرگى تاڭدا اتا-اناسىنان تىرىدەي كوز جازىپ قالىپ، كورىسە الماي جۇرگەن جاندار قانشاما. قۇشاعىمىز كەڭ، الايدا، بوتەن ۇلتقا كەڭ قۇشاعىمىزدى جايا بەرمەس بۇرىن ءوز قانداستارىمىزدى وزگە ەلدە قان قاقساتپاي ەلگە ورالۋىنا كومەك قولىمىزدى سوزايىق! 

قامشىگەر: نازەركە لابيحان