وقو-نىڭ اۋداندارىندا ماقتا شارۋاشىلىعىن مەحانيكالاندىرۋ دەڭگەيى ءبىر قالىپتى ەمەس ءارتۇرلى ەكەنىن اتاپ وتكەن ءجون. ماقتا ءوسىرۋ ماقتارال اۋدانىندا جوعارى دەڭگەيدە، ءىرى شارۋاشىلىقتار جانە تەگىس القاپتاردا  جاقسى دامىعان. وسى سالادا ۇزاق جىلدار بويى قىزمەت ىستەپ كەلە جاتقان ازامات رەتىندە ءوز ويىمدى بىلدىرەيىن دەپ ەدىم.

         2016 جىلى وقو-نىڭ ماقتا وسىرەتىن اۋداندارى بويىنشا ماقتا ەگىس القابى قۇرىلىمىندا 5 گا دەيىنگى شاعىن شارۋا قوجالىقتارىنىڭ ۇلەسى 51،9% قۇرادى، 10 گا دەيىن – 6،4%، ماقتارال اۋدانىندا بۇل كورسەتكىشتەر – 74،5% جانە 22،5% بولدى.   شاعىن تاۋارلى شارۋا قوجالىقتارىندا ماقتا-شيكىزاتى ءوندىرىسى تەحنولوگياسىنىڭ بارلىق ساتىلارىندا، وپەراسيالارىندا قول ەڭبەگى باسىم ورىندالادى. تەك توپىراقتى ەگىس الدىندا دايىنداۋدا، تۇقىم سەبۋدە جانە قاتار (جۇيەك) ارالارىن باپتاۋدا (كۋلتيۆاسيالاۋدا) ماشينا مەن قۇرالدار قولدانىلادى. شاعىن شارۋا قوجالىقتارىندا ماقتا-شيكىزاتى ءوندىرىسىن مەحانيكالاندىرۋدىڭ ماڭىزدى ەرەكشەلىگى – جەر ۇلەستەرىنىڭ شاعىن اۋماعى جانە ولاردىڭ پىشىندەمەلەرىنىڭ كۇردەلىلىگى.

         قازىرگى ۋاقىتتا باسەكەلەستىكتە تەك قانا كەشەندى مەحانيكالاندىرۋدى  كەڭ قولدانعان شارۋا قوجالىقتارى عانا شىداي الادى. سونىمەن بىرگە، ماقتا شارۋاشىلىقتارىندا مەحانيكالاندىرۋ دەڭگەيىن كوتەرۋمەن جاڭا، جەتىلدىرىلگەن اگروتەحنيكالىق ادىستەردى قولدانۋ ماقتا ونىمدىلىگىن ارتتىرۋ مۇمكىندىگىنە سەبەپ بولادى. شاعىن شارۋا قوجالىقتارىندا قاجەتتى تەحنيكانىڭ جوقتىعىنان قورۇنەمدى (رەسۋرسۇنەمدى) جانە وزىق تەحنولوگيالار عانا ەمەس ءداستۇرلى تەحنولوگيالاردى دا قولدانا المايدى، ال جەر جانە ەڭبەك مۇمكىندىكتەرىن تەك جارتىلاي عانا قولدانادى. ولار تەحنيكالىق جاڭعىرتۋ جانە قورۇنەمدى تەحنولوگيالارعا وتۋدە نەسيە الۋ ءۇشىن نەسيە بەرۋشىلەردىڭ تالاپتارىن ءوندىرۋ ءۇشىن  ۋاقىتىن وتكىزەدى جانە ولاردىڭ قويعان تالاپتارىنا  كونۋگە ءماجبۇر

سانى باسىم شاعىن شارۋا قوجالىقتارىندا ماقتا ەگىسى كوپ جىلدار بويى تەك قانا ءبىر جەر ۇلەسىندە وسىرىلەدى، اۋىسپالى ەگىس جۇيەسى قولدانىلمايدى. سول سەبەپتى  ماقتا-شيكىزاتىنىڭ تۇسىمدىلىگى جىل سايىن ءبىر دەڭگەيدە. جىل سايىن ءونىم الۋ ورگانيكالىق جانە مينەرالدىق تىڭايتقىشتاردى ەنگىزۋمەن جۇزەگە اسىرىلادى. سونىمەن بىرگە، تيەۋ-تۇسىرۋ جانە ورگانيكالىق تىڭايتقىشتاردى شاشۋ قول ەڭبەگىمەن ورىندالادى. نەگىزگى شاعىن شارۋا قوجالىقتارىنىڭ باسىم كوپشىلىگى وتباسى نەگىزىندە ۇيىمداستىرىلعان، ال جانۇيادا 2-3 تولىق جۇمىسكەر بار جانە ولار ەڭبەك قورلارىمەن شەكتەلگەن. كەلەشەكتە بۇل وزەكتى ماسەلەنى شەشۋ ودان ارى قيىندايدى. سەبەبى، ەڭبەك قۇنى مەن ايرىقشا بىلىكتى ماماندارعا (مەحانيزاتورلار، سۋشىلار ت.ب.) تالاپ ارتادى.

جاراس انۋاربەك،

ماقتارال اۋدانىنىڭ تۇرعىنى