الماتى تاۋەلسىزدىكتىڭ باستاۋىندا تۇرعان قالا ەدى. ال ءقازىر شە؟ مۇنى كىم ەلەپ-ەسكەرىپ جاتىر؟ قازاققا قاي مەرەكە قىمبات؟ تاۋەلسىزدىكتى بۇرىن تويلارىمىز بەلگىلى، ەندەشە جاڭا جىلعا نەمەنەگە اسىعامىز؟
ايتىلماي جاتقان جوق. ايتىپ تا، جازىپ تا جاتقان دا جايىمىز بار. جۇرت قۇلاعىنا جەتىپ جاتقان شىعار. الايدا بيلىكتىڭ ويىنا دا كىرىپ شىقپايتىن سياقتى. كىرسە دە، شىعىپ كەتەدى. جەلتوقسان باستالا سالا تاعى دا جاڭا جىلعا دايىندىق باستالىپ كەتتى. وزگە وڭىرلەردى قويشى، الماتىعا نە جوق؟
تاۋەلسىزدىك الماتىدان باستالعان ەدى عوي. الماتى اكىمدىگى مۇنى قالاي ۇمىتتى؟
ءومىرجان ءابدىحالىق ءوزىنىڭ جەلىدەگى پاراقشاسىندا وسى ماسەلە توڭىرەگىندە اكىمشىلىككە ءدوپ باسىپ سۇراق قويىپتى:
«ۇكىمەتتىڭ، الماتى قالاسى اكىمدىگىنىڭ نازارىنا!
«1 جەلتوسقاننان باستاپ، قالادا جاڭا جىلدىق بەزەندىرۋلەر جاساۋ» تۋرالى اكىمدىك بارلىق جەرگە نۇسقاۋ بەرىپتى دەيدى. دەمەك، تاۋەلسىزدىكتىڭ 25 جىلدىعىنا اكىمدىكتىڭ تۇكىرگەنى بار. مۇنداي اكىمدىكتىڭ ارەكەتىن باسقاشا ءتۇسىنۋ مۇمكىن ەمەس!
25 جىلدىق وتكەنشە قويا تۇرۋعا، شىداي تۇرۋعا بولماي ما؟
نە سەبەپتى، قانداي نەگىزگە سۇيەنىپ تاۋەلسىزدىك مەرەكەسى وتپەي، 1 جەلتوقساننان باستاپ جاڭا جىلدىق بەزەندىرۋ شارالارىنا نۇسقاۋ بەردىڭىزدەر؟ وسىعان جاۋاپ بەرسەڭىزدەر!»
بۇعان بايبەك مىرزا نە دەپ جاۋاپ بەرەر ەكەن؟..
قالامىزعا جاڭا جاس اكىم كەلدى دەپ توبەمىز كوككە ءبىر ەلى جەتپەي قالعانداي قۋانىپ ەدىك. باۋىرجان بايبەكتىڭ بۇل قىلىعىن قالاي تۇسىنۋگە بولادى؟. ءدال وسى ادماتىدا ەلىمىزدى، جەرىمىزدى قورعاپ، حالقىمىزعا تاۋەلسىزدىك سىيلاعان سول قۇربانداردىڭ كوز جاسى قايدا قالدى؟! قازاق حالقى ءوزىمىزدى قاسقىرداي رۋحتى ەلگە بالايمىز. ەندەشە سول رۋح قايدا، ۇلتقا دەگەن ماحاببات، اتا-بابالار ءارۋاعىنا دەگەن تاعزىم قايدا؟ جىل سايىن قانشاما كۇنالى ىستەرگە، اپاتتارعا، جالىنداعان ورتكە، ادام ولىمىنە سەبەپ بولاتىن حريستيان ءدىنى مەرەكەسىنىڭ ءوزىمىزدىڭ تاۋەلسىزدىگىمىزدەن نەسى ارتىق؟! تويلانباي قالماسى بەلگىلى عوي، الايدا، ەڭ الدىمەن بيىلعى تاۋەلسىزدىگىمىزدىڭ 25 جىل مەرەيتويىن دۇبىرلەتىپ وتكىزگەن دۇرىس بولار.
