ايماقتاعى كليمات جاعدايلارى جەرگىلىكتى ەكونوميكانى دامىتۋدا ماڭىزدى ءرول اتقاراتىن اۋىل شارۋاشىلىعىنا قولايلى. ءوزىم تۇركىستان قالاسىنىڭ تۇرعىنى رەتىندە بۇل ىلگەرىلەۋدىڭ قالاي جۇزەگە اسقانىن ايتا كەتكىم كەلەدى. وڭتۇستىك قازاقستان وبلىسىنىڭ اۋىل شارۋاشىلىعى سوڭعى جيىرما بەس جىلدا يننوۆاسيالىق سالاعا اينالدى. مەملەكەتتىڭ قارجىلىق قولداۋىنىڭ ارقاسىندا اۋىل ەڭبەككەرلەرى جاڭا تەحنولوگيالاردى بەلسەنە قولدانا باستادى، بۇعان ەڭ الدىمەن ىلعال ۇنەمدەگىش تەحنولوگيالاردى جاتقىزۋعا بولدى. ونداعان جىلدار بويى سۋعا ءزارۋ بولىپ كەلگەن وڭتۇستىك قازاقستان ءۇشىن بۇل اگرارلىق سالاداعى ناعىز ىلگەرىلەۋ بولدى: 15 مىڭ گەكتاردان استام جەر تامشىلاپ سۋارىلادى. وسى باعىتتاعى جۇمىس باستالعان 2015 جىلمەن سالىستىرعاندا ىلعال ۇنەمدەگىش تەحنولوگيا پايدالانىلاتىن اۋداندار ەكى ەسەدەن ارتىق ۇلعايدى. ەندى مىنە ولار رەسپۋبليكالىق كورسەتكىشتىڭ 70 پايىزىن قۇرايدى. تۇركىستاندا تامشىلاتىپ سۋارۋعا ارنالعان جابدىق شىعاراتىن زاۋىت سالىندى، بۇل شارۋالار ءۇشىن تەحنولوگيانى الدەقايدا ارزان باعاعا ساتىپ الۋعا مۇمكىندىك تۋعىزدى.

         تەك تاۋەلسىزدىك جىلدارى قازاقستان شاردارا سۋ قويماسىنان ماقتاارال اۋدانىنىڭ سۋارمالى ەگىستىكتەرىنە ماشينامەن سۋ تارتۋ جوباسىن ىسكە اسىرۋ ەسەبىنەن وبلىستىڭ وڭتۇستىگىندەگى سۋ ماسەلەسىن شەشۋدىڭ ءساتى ءتۇستى. وڭتۇستىكتەر ونى «تاۋەلسىزدىك جوباسى» دەپ اتادى. ق ر پرەزيدەنتى ن.نازاربايەۆتىڭ ارقاسىندا ەل ءۇشىن ەڭ قىسىلتاياڭ قارجىلىق جانە ەكونوميكالىق داعدارىس كەزەڭىندە مەملەكەت بۇعان 14 ميلليارد تەڭگە جۇمساپ، ماقتاارالدىقتار ماقتا ءوسىرۋ كەزىندە سىرداريا سۋىن وزبەكستان اۋماعى ارقىلى اعىزاتىن مەملەكەتارالىق «دوستىق» ارناسىنداعى سۋعا تاۋەلسىز ەتتى.

         وبلىستا قازاق ماقتا شارۋشالىعى عىلىمي-زەرتتەۋ ينستيتۋتى اشىلدى،  ونىڭ عالىمدارى ەگىستىكتەردە قازاقستاندا اۋدانداستىرىلماعان وزبەك ماقتاسىن اۋىستىرعان بەس وتاندىق سۇرىپتى ءوسىرىپ شىعاردى. ولاردى ەگۋگە كوشۋ ناتيجەسىندە وبلىس كىرىسىنىڭ ەكسپورتتىق باپتارىنىڭ ءبىرى بولىپ تابىلاتىن ءشيتى ماقتا ءونىمىن ارتتىردى. وقو – قازاقستانداعى وتاندىق توقىما ونەركاسىبىنىڭ دامۋىنىڭ نەگىزىن قۇرايتىن ءشيتى ماقتا وسىرىلەتىن جالعىز وبلىس. سوندىقتان بۇل ۇلكەن مۇمكىندىكتەر اشاتىنىن ۇمىتپاعان ءجون.

مايرا ءابسادىق،

تۇركىستان قالاسىنىڭ تۇرعىنى