(ەل تاۋەلسىزدىگىنىڭ 25 جىلدىعىنا)
ءبىر زاماندا قالعىپ تا قالتىراعان،
قالىپ بارا جاتقاسىن حالقى نادان
«ويان قازاق» دەپ الاش اقىندارى،
ساحارادا قىرانداي ساڭقىلداعان.
قالعىپ جۇرگەن حالىققا قويىن باعىپ،
كورىنە مە دۇنيەنىڭ بوياۋى انىق؟!
ءبىراق قازاق ءجۇز جىلداپ قالعىعانمەن،
كوكىرەگى تەگىندە وياۋ حالىق.
كورىنگەنمەن كوپ كوشىپ ەلدەي نادان،
جەرىن ساقتاپ، قارۋىن تەڭدەي العان.
امال قانشا ازۋلى، اككى جاۋعا،
كوبىندە راس شاماسى كەلمەي قالعان.
قوسىلىپ وعان وقۋسىز قالعاندىعى،
جاۋعا تاعى وزدەرىن الداندىردى.
سول ۇشىندە ويان دەپ اڭعارىلار،
ويانۋىن قازاقتىڭ ارمان قىلدى.
ايتىلسا دا ابىز بەن اقىن ءسوزى،
اشىلمادى عىلىمسىز اقىل كوزى.
وسى ۋىتتى ۇيقىدان ەڭ الدىمەن،
ءدىن ۇيرەتىپ وياتتى ءتاڭىر ءوزى.
عاسىرلاردى ەسكە الساق وتكەن مۇڭلى،
سىر شەرتەدى جىراۋلار توككەن جىرى.
سوسىن ەلدىڭ نامىسىن وياتتى ءوزى-اق،
وتارشىلدار، وزبىرلار وكتەمدىگى.
باس كوتەرتپەي تۇرعاندا جاتتىڭ كۇشى،
تۋدى تاعى باي-كەدەي تاپتىڭ ءىسى.
ماركيزىم قايتا ەلدى قالعىتقانمەن،
وياتتى ەلدى يدەيالار قاقتىعىسى.
ەل نامىسىن اياۋسىز جانىشتادى،
كونە، جاڭا وتارلىق بارىستارى.
جانىن تىكتى ۇلت رۋحىن سوندىرمەۋگە،
سوندا ءبىزدىڭ الاشتىڭ ارىستارى.
قاۋىپ بارىن بىلسە دە ازاپ بارىن،
اڭسادى ەل ءوزىنىڭ ازات تاڭىن.
ءدۇر سىلكىندى بەرگى بەت، ارعى بەتتە
قانى تاسىپ ويانعان قازاقتارىڭ.
شارلاي ءجۇرىپ كەشەگى، بۇگىنگىسىن،
بارلاي ءجۇرىپ زامانا قۇبىلىسىن،
ءبىزدىڭ قازاق قايتپادى العان بەتتەن،
تاۋەلسىزدىك ءدال سونىڭ تۋىندىسى.
ەندى مۇلگىپ كەتپەيدى ەندى قالعىپ،
وز-وزىنە ويانعان كەلدى حالىق
ايشىقتالىپ جازىلىپ جاتىر بۇگىن،
ارعى تاريح اقيقي بەرگى تاريح.
وركەنيەتتەن جاڭا، تىڭ وي الارلىق،
ەندى مەنىڭ قازاعىم وياۋ حالىق.
وياۋ كوزگە كورىنەر كۇڭگىرتتەنبەي،
سان قۇبىلعان زاماننىڭ بوياۋى انىق.
العا باسىپ بارادى ەرلەپ حالىق،
ەندى بىزگە جات مۇلدە كەر باقپالىق.
جار استىندا جاسىرىن جاۋ بارىندا،
ءبىلىپ وتىر سەزىنىپ، سەرگەك تانىپ.
ءار ۇلتتا بار ادامدار جانى قوتىر،
كەيبىرى ونىڭ بيلىكتىڭ تاعىندا وتىر.
ىشتەن شىققان جاۋ جامان قاشانداعى،
وياۋ قازاق ونى دا تانىپ وتىر.
جاڭا ومىرگە بۇرىلدى بەتىڭ بىردەن،
ەر قازاعىم سۋ كەشكەن ەتەگىمەن.
تەرەڭىنە عىلىمنىڭ بويلاپ ءجۇرسىڭ،
اينالىسىپ تەحنيكا تەتىگىمەن.
باقىتتى ءبىز جاسايمىز قولىمىزبەن،
ساناسامىز وڭىمىز، سولىمىزبەن.
باسقالاردىڭ قاڭسىعىن تاڭسىق كورمەي،
جۇرسەك بولدى قازاقي جولىمىزبەن.
ءبىر جاعادان شىقسا ەگەر باستارىمىز،
اشىق بولار ماڭگىلىك اسپانىمىز!
الاشتاردىڭ جولىنا ادال بولسىن،
بولاشاقتىڭ يەسى جاستارىمىز!
