الماتى قالاسىنىڭ المالى اۋداندىق سوتى  "اڭىز ادام" جۋرنالىنا ناحاق شەشىم شىعارىپ، ونى جۋرنالدى سوتقا بەرگەن 13 "ارداگەرگە" ءبىر-بىر ميلليوننان، بارلىعى 13 ميلليون تەڭگە تولەۋگە مىندەتتەدى. بىرىنشىدەن، مەنىڭ سوت شەشىمىن "ناحاق" دەۋ سەبەبىم، ارنايى زاڭگەرلىك ءبىلىمى، سوت جۇرگىزۋ تاجىريبەسى بار سۋديا تۇرعاي، اتالمىش جۋرنالدى وقىعان كەز-كەلگەن قاتارداعى ازامات ءۇشىن بۇل جۋرنالدىڭ گيتلەردى جانە ءفاشيزمدى ناسيحاتتاماعانى، كەرىسىنشە، اشكەرەلەپ، ايىپتاعانى - ايداي انىق اقيقات. ال، بۇدان شىعاتىن قورىتىندى - سوت كوپە-كورنەۋ ادىلەتسىز، زاڭسىز شەشىم شىعارىپ، جۋرنالعا اشىقتان-اشىق قيانات جاساپ وتىر. ەكىنشىدەن، "ارداگەرلەر" ءسوزىن تىرناقشاعا الۋ سەبەبىم، باسقاسى - باسقا، ال، ەكىنشى دۇنيەجۇزىلىك سوعىستىڭ شىن ارداگەرلەرىنىڭ ەشقايسىسى، ەگەر ولاردىڭ جۋرنالدى وقىعانى راس بولسا جانە جالپى نيەتتەرى دۇرىس بولسا، "اڭىز ادامدى" ەشقاشان سوتقا بەرمەيدى، كەرىسىنشە، گيتلەردى اشكەرەلەپ، ايىپتاعانى ءۇشىن وعان العىس ايتادى. دەمەك، 13ء-تىڭ جۋرنالدى ايىپتاپ، سوتقا جۇگىنۋى، مەنىڭشە، بۇل ادامداردىڭ ارداگەر اتىنا لايىق ەمەس ەكەندىگىن جانە بۇل ارەكەتتىڭ ولاردى اقشامەن قىزىقتىرۋ ارقىلى بيلىك تاراپىنان ۇيىمداستىرىلعان ارەكەت ەكەندىگىن كورسەتەدى. ۇشىنشىدەن، بۇل سوت شەشىمىنىڭ تىكەلەي ماسكەۋدىڭ نۇسقاۋىمەن شىعارىلعاندىعىنا مەنىڭ ەش كۇمانىم جوق. نەگە دەسەڭىز، رەسەيدىڭ ۋكرايناعا فاشيستىك شابۋىلىنا وراي گيتلەر مەن گيتلەرلىك ءفاشيزمدى پۋتين مەن پۋتيندىك فاشيزمگە ورىندى تەڭەگەن جۋرنال سانى شىققان سوڭ ىلە-شالا، ءۇش كۇننەن سوڭ (21.04.2014 ج.) كرەمل قازاقستان بيلىگىنەن "اڭىز ادامدى" جازالاۋدى تالاپ ەتتى (قاراڭىز: "موسكۆا پريزىۆاەت ك مەرام ۆ سۆيازي س ۆىحودوم جۋرنالا و گيتلەرە"). ودان بەرىدە ەلىمىزدىڭ ساتقىن بيلىگى رەسەيمەن ەۋرازيالىق وداق قۇرۋ تۋرالى بوداندىق كەلىسىم-شارتقا قول قويعانى بەلگىلى. ەندى، مىنە، "قازاق" سوتىنىڭ مىناداي ماسقارا شەشىمى شىقتى. ال بۇل، وكىنىشكە وراي، - قازاقستاننىڭ بۇدان بىلايعى جەردە قازاقستان زاڭدارىنا نەمەسە قازاقستاننىڭ تاۋەلسىز ەركىنە ساي ەمەس، ماسكەۋدىڭ وتارشىلدىق نۇسقاۋ-بۇيرىقتارىنا ساي ءومىر سۇرەتىندىگىنىڭ ايقىن دالەلى...