«جۇماداعى مالىمدەمەسىندە اق ۇيلىكتەر يراكتاعى سوعىسقا امەريكانىڭ اسكەري ارالاسۋىنىڭ سوڭى جاڭا سوعىسقا ۇلاسىپ كەتپەيتىنىنە اقش حالقىن سەندىرۋگە تىرىستى»،- دەيدى «حاففينگتون پوست» كەشەگى جاڭالىعىندا. اتالعان امەريكالىق اقپاراتتىڭ ايتۋىنشا، حالىقتىڭ ساياسي جانە قوعامدىق الاڭداۋشىلىعىن باسەڭدەتۋ ءۇشىن وسىنداي مالىمدەمەلەر جاسالعان.
«اق ءۇيدىڭ باسپا ءسوز حاتشىسى دجوش ەرنەست اقش تاراپتىڭ بۇل سوعىسقا قاتىسۋىنىڭ ۇزاققا سوزىلىپ كەتپەيتىنىن بىرنەشە رەت قايتالاپ ەسكەرتتى»،- دەپ جازعان «حاففينگتون پوست» بۇل اسكەري ارالاسۋدىڭ يراك پەن شامداعى يسلام مەملەكەتى (يشيم) اتالعان قارۋلى كۇشتەرگە ۇلكەن سوققى بەرەردەي وپەراسيالارعا بارا قويمايتىندىعىن جەتكىزىپ وتىر. وعان قوسا، بۇل «ۇزاققا سوزىلمايتىن» اسكەري كومەكتىڭ قانشالىق ۋاقىتقا جالعاساتىندىعىن دا ايقىنداپ ايتپادى. اق ءۇي باسپا ءسوز حاتشىسى جۋرناليستەرگە جۇما كۇنى تۇستەن بۇرىن ەكى اسكەري ۇشاقپەن باستالعان كومەك وپەراسياسىنىڭ ناقتى اياقتاۋ مەرزىمى الىگە بەلگىلەنبەگەنىن مالىمدەگەن. «پرەزيدەنت ناقتى ءبىر داتانى بەكىتپەدى»،- دەيدى ول.
اق ءۇي باسپا ءسوز حاتشىسى باراك وبامانىڭ يراكتا كەشەندى سوعىس جۇرگىزۋگە پەيىلدى ەمەس ەكەنىن، تەك سونداعى جەرگىلىكتى تۇرعىندارعا گۋمانيتارلىق كومەكتەر بەرۋدىڭ جەدەل قاجەتتىگى مەن وڭىردەگى اقش پەرسونالدارىنىڭ قاۋىپسىزدىگى ءۇشىن وسى قادامعا بارىپ وتىرعاندارىن تۇسىندىرگەن. ونىڭ ۇستىنە، اقش-تىڭ يراك جايىنداعى سوعىسقا ارالاسۋىن اياقتاتۋ تۋرالى ۋادەسى باراك وبامانىڭ اق ۇيگە جايعاسۋىنا نەگىزگى سەبەپ بولعاندىقتان، وسى جولعى يراققا اسكەري كومەك بەرۋ جايىنداعى شەشىم ءتىپتى سەزىمتال بولىپ وتىرعان كورىنەدى.
مالىمدەمەدە بۇل اۋە كۇشتەرىنىڭ كومەگى وتە شەكتەۋلى كولەمدە بولاتىندىعىن بىرنەشە مارتە قايتالاي ەسكەرتكەن دجوش ەرنەست: «ۆاشينگتوننىڭ ەڭ نەگىزگى كوزدەگەنى، اۋماقتاعى اقش قىزمەتكەرلەرىن ءقاۋىپ ءتوندىرىپ كەلە جاتقان يشيم-نان قورعاۋ جانە دىندىك ازشىلىق توپ ەسەپتەلەتىن يازيديستەرگە سۋ مەن ازىق-تۇلىك جەتكىزىپ بەرۋ»،- دەپ وتىر.
اق ءۇي باسپا ءسوز حاتشىسى وپەراسيانىڭ قانشاعا سوزىلاتىنى جايىندا سۇرالعاندا: «مەن وپەراسيا حاقىنداعى ناقتى ۋاقىت كەستەلەرى تۋرالى ەشتەڭە دە ايتا المايمىن. الايدا، مەن اسكەري ارەكەتتىڭ ۇزاققا جالعاسۋى تۋرالى پرەزيدەنتتىك ورنالاستىرۋدىڭ جوق ەكەندىگىن سەنىممەن جەتكىزە الامىن»،- دەگەن.
دايىنداعان: سانات ناققازاق.
