كەي ادامدار سەنىمەن ەمەس، سەنىڭ ۇستىندەگى شۇبەرەكپەن، شۇبەرەكتەن شىعىپ تۇراتىن فرانسۋز ءاتىرىنىڭ يىسىمەن، قالتاڭداعى شىتىرلاق قاعاز اقشامەن، استىنداعى كولىگىڭمەن قارىم-قاتىناس جاساعىسى كەلەدى.
تىزىمدەگى دۇنيە بولماسا، سويلەسۋگە دە قۇلىقسىزدىق تانىتادى. تەگىندە ونداي پەندەلەر كەشەگى كەدەي بولعانىن ۇمىتقان، كەشىرىڭىز، ۇمىتا الماعان، ءوز ىشىنەن كەدەي بولمىسىن جويا الماعان ادامدار.
جان دۇنيەسى دە، ءتان دۇنيەسى دە باي كىسىلەرگە سەنىڭ كيىم-كەشەگىڭ دە، مىنگەن كولىگىڭ دە، تاققان ساعاتىڭ مەن جاققان مايىڭ دا قاجەت ەمەس. ونداي دۇنيە وزىندە بارشىلىق بولعاندىقتان، ول جان ىزدەيدى، جاقسى اڭگىمە، تازا قارىم-قاتىناس كۇتەدى.
ال، سەنىڭ بولمىسىڭدى سىرتىڭداعى بوزىڭنەن تانيتىنداردا شىن مانىندە اسىپ-تاسىپ جاتقان بايلىق تا، رۋحاني كەمەلدىك تە، سايتان دا جوق. جانە ەڭ باستىسى ولار جان راحاتى اقشادا ەمەس ەكەنىن باياعىدا ۇمىتقان نەمەسە ونداي تۇسىنىك ولاردا ەشقاشان بولماعان.
تاعى ءبىر قىزىق ادامدار بولادى-ەي! سەنىڭ جاعدايىڭ جاقسى كەزدە، كورە الماعاننان جارىلارداي بوپ جۇرسە دە، سەنىڭ قاسىڭنان شىقپايدى. باسىڭنان ب ا ق تايعان كۇنى كولەڭكەسى دە كورىنبەي قالادى. كولەڭكەسى بار بولسىن، وزىمەن كەتسە، ىرزا بولاسىڭ عوي. ءبىر ءيتتىڭ بالالارى بولادى، ولار: "ءبىز سەنى تۇك تە جاقسى كورمەيتىنبىز، ءبىز سەنى سول كەزدە جاقسىلاپ تۇرىپ پايدالانعانبىز عوي، نەتكەن اقىلدى بولعانبىز، شىركىن-وۋ! - دەيدى. ال، سەن شە، سەن بايعۇس سونى دا بايقاماي ەلپىلدەپ جۇگىرە بەرەتىنسىڭ. ءاي، ءاي، ءاي سول كەزدە ناعىز اقىماق بولدىڭ عوي!" - دەپ سەنى مۇقاتقىسى كەلىپ، ءوزىنىڭ سونشالىق سورلى ەكەنىن كورسەتىپ قويادى.
سەن ءتىپتى وندايلاردىڭ سونشالىق سورلى ەكەنىنە تاڭقالىپ، ىشتەي اياپ، بۇرىلىپ جۇرە بەرەسىڭ. جۇرەگىڭ سىزدايدى ءبىراق. ول دا وتەدى. ەسەسىنە كەرەمەت ساباق، تابىلمايتىن مەكتەپ!
الگىلەردىڭ تەگىندە جانى دا، ءتانى دە ەشقاشان بايىمايدى. بۇل ءتاڭىردىڭ ورناتقان زاڭدىلىعى. ءتىپتى ۋحيت-سۋحيت قىلىپ ءجۇرىپ بايىپ الدى دەلىك، الايدا ولار جوعارىدا ايتىلعان قايىرشى بولمىسىن جويا الماي ومىردەن وتەدى.
ال، ءبىر كۇندەرى بولعان، ەرتەسىڭدە جوعالعان، ارعى كۇنى قايتىپ ورالعان ءتان بايلىعىنىڭ يەلەرى ەكى توپتىڭ اراسىنداعى الگى تازا ادامدار سول مىزعىماعان قالپىندا قالا بەرەدى. سەبەبى، ولار دۇنيە پارقىن جاقسى بىلەدى، جانى دا لايلانبايدى. تاڭىرگە دە جاعىمدى، جاقسى ومىرگە دە بەيىم.
ەڭ سوڭىندا كىم جەڭبەك؟ ءيا، تازالىق جەڭبەك قوي، ارينە! ادالدىق جەڭبەك، ادامعا دەگەن ماحابباتتى دۇنيەمەن ولشەمەگەن پاراساتتىلىق جەڭبەك!
ءسىز قانداي ادام بولۋدى تاڭداساڭىز، سونداي ادام بولاسىز. ءبارى دە ءوز قولىڭىزدا.
"Facebook" الەۋمەتتىك جەلىدەگى پاراقشاسىنان.
