كاسىپقوي بوكسشى قانات يسلامنىڭ جانكۇيەرلەرى سۇيىكتى سپورتشىسى تۋرالى تىڭ دەرەكتەردى جاڭا سايتتان بىلەتىن بولادى. جاڭا اقپاراتتىق رەسۋرستى جاساۋدى جۋرناليست بەرىك سۇلتان مەن باعدارلاماشى ساعىن ۇسەن ۇلى قولعا العان. بۇل تۋرالى قازاقپارات جازدى. اتالعان سايت http://kanatislam.com/ ادرەسى بويىنشا الداعى كۇندەردە ءجۇمىس ىستەيتىن بولادى.

سايتتا بوكسشىنىڭ جەكپە-جەگىنەن كاسىبي فوتو، ۆيدەواقپارات، كەلەسى ۇرىس قاشان جانە كىممەن وتەتىنى جايلى ماعلۇمات قازاق، ورىس، اعىلشىن تىلدەرىندە دەر كەزىندە جاريالانباق. اتالعان سايت جونىندە جاساۋشى جۋرناليست بەرىك سۇلتان بىلاي دەيدى: «بۇگىندە قاناتتىڭ جەكپە-جەگىن كورە الماي سۋساپ جۇرگەن جانكۇيەرلەر كوپ. ماسەلەن مەنىڭ ءوزىم قاشان كىممەن جۇدىرىقتاساتىنىن بىلمەيمىن، ەكى كۇننەن سوڭ وسى الەۋمەتتىك جەلى ارقىلى ءبىلىپ وتىرامىز. ساپالى سۋرەت، بەينەاقپارات تا از. سوندىقتان، ونى جۇرتشىلىققا كەڭىنەن ناسيحاتتاۋ قاجەتتىگى تۋىپ وتىر. بۇل جونىندە قاناتتىڭ وزىمەن، پروموۋتەرى نەلسون لوپەسپەن سويلەستىك. ولار ءىسىمىزدى قۇپتادى. قاناتتىڭ ءار كەزدەسۋىندە ولارمەن تىكەلەي بايلانىستا بولامىز. اقپاراتتى پروموۋتەر نەلسون لوپەس جىبەرىپ وتىرادى دەپ كەلىستىك. سايت وپەراتيۆتى جۇمىس ىستەيتىن بولادى. امەريكادا جەكپە-جەك كۇندىز وتسە، بىزدە ءتۇن بولادى عوي. سوعان قاراماستان، تۇندە كەلگەن اقپاراتتى تۇندە سالاتىن بولامىز»

قانات يسلام اۋەسقوي بوكسشى رەتىندە جۇڭگو حالىق رەسپۋبليكاسى ۇلتتىق قۇراما كومانداسىنىڭ قۇرامىندا بەيجىڭ وليمپياداسىنىڭ قولا جۇلدەگەرى، چيكاگودا وتكەن الەم چەمپيوناتىنىڭ (2007) جانە ازيا ويىندارىنىڭ (2006) قولا جۇلدەگەرى. قىتايدىڭ 10 دۇركىن چەمپيونى بولدى.  2010 جىلى اتاجۇرتقا كوشىپ كەلگەن سوڭ 2012 جىلعا دەيىن «استانا ارلاندارى» كاسىبي كلۋبىنىڭ مۇشەسى بولدى. ءقازىر كاسىپقوي بوكسپەن اينالىسىپ جاتقان قانات - «نەلسون» پروموۋتەرلىك كلۋبى اتىنان شارشى الاڭعا شىعىپ كەلەدى. كاسىپقوي بوكسقا اۋىسقالى بەرى قانات 18 كەزدەسۋ وتكىزىپ، ونىڭ 15-ىندە جەكپە-جەكتى مەرزىمىنەن بۇرىن اياقتاعان.

13 قىركۇيەك وتىز جاسقا تولاتىن قانات يسلاممەن الداعى كۇندەردە «قامشى» پورتالى ينتەرنەت كونفەرەنسيا وتكىزەتىن بولادى.

قامشى-اقپارات