بۇگىن ءبىلىم كۇنى قارساڭىندا استانا قالاسىندا بەس جاڭا مەكتەپ اشىلدى. اتاپ ايتقاندا ءار قايسىسى 1200 بالاعا ارنالعان №73، №74، №75، №76، №78 مەكتەپتەرى استانا قالاسىنىڭ بالالارى ءۇشىن الداعى ۋاقىتتا قىزمەت ەتەتىن بولادى. №75 مەكتەپ-گيمنازيانىڭ اشىلۋىنا ارنايى بارعان ەلباسى نۇرسۇلتان نازاربايەۆ ەلىمىزدىڭ بارشا وقۋشىلارىن ءبىلىم كۇنىمەن قۇتتىقتاپ، ءسوز سويلەدى. بۇل تۋرالى Bnews.kz جازدى.

 «بۇگىن – ءبىلىم كۇنى. ءبىزدىڭ ەلىمىزدە 7 600 مەكتەپتە 2 ملن 600 مىڭ بالا پارتاعا وتىرادى. ەڭ قۋانتاتىنى – 300 مىڭ ءبۇلدىرشىن ءبىرىنشى كلاسقا بارادى. ولاردىڭ سانى – بىلتىرعىمەن سالىستىرعاندا 70 مىڭعا كوپ. بۇل قۋانتاتىن جاعداي، سەبەبى ءبىزدىڭ جاستارىمىزدىڭ ءوسىپ كەلە جاتقانى، حالقىمىزدىڭ ءوسىپ كەلە جاتقانى، بالا تۋۋدىڭ كوبەيىپ كەلە جاتقانى»، - دەدى ەلباسى. پرەزيدەنتتىڭ ايتۋىنشا قازاقستان بويىنشا تاۋەلسىزدىك جىلدارى 1 مىڭ مەكتەپ ىسكە قوسىلعان. «ونىڭ ىشىندە بيىل 150 مەكتەپ ىسكە قوسىلادى، بۇگىن 62 مەكتەپ وقۋشىلارعا ەسىگىن ايقارا اشادى. مىناۋ استانانىڭ وزىندە 11 مەكتەپ ىسكە قوسىلادى. ول مەكتەپتەردە 300 مىڭ ءمۇعالىم ساباق بەرەدى. وسىنىڭ بارلىعى قازاقستاننىڭ بولاشاققا دەگەن، كەلەشەگىمىزگە دەگەن ءبىزدىڭ كەمەل ەڭبەگىمىز بەن ماقساتىمىزدى ورىنداۋ. سوندىقتان، بۇگىنگى ءبىلىم كۇنىمەن بارشاڭىزدى قۇتتىقتايمىن»، - دەپ پرەزيدەنت بالالارعا ساتتىلىك تىلەگەن.

اقپاراتقا ساي استانا قالاسى بويىنشا بيىلعى وقۋ جىلىندا 13 مىڭعا جۋىق بالا ءبىرىنشى سىنىپقا اياق باستى.

قامشى-اقپارات