"الماتىمەتروقۇرىلىس" كومپانياسىنىڭ باسپا ءسوز قىزمەتىنە سىلتەمە جاساعان Tengrinews.kz اگەنتتىگى "الماتى مەتروسىنداعى 2014 جىلدىڭ سوڭىندا پايدالانۋعا بەرىلەدى دەپ جوسپارلانعان ەكى ستانسيانىڭ ىسكە قوسىلۋى 2015 جىلدىڭ باسىنا شەگەرىلدى" دەپ حابارلادى. كومپانيانىڭ سوزىنشە، مەترونىڭ جاڭا ستانسيالارىنىڭ اشىلۋى كەلەسى جىلعا قالۋىنا باستى سەبەپ: "ستانسيالاردىڭ پايدالانۋعا بەرىلۋ مەرزىمىنىڭ كەيىنگە شەگەرىلۋىنە مەترو سالىناتىن جەردەگى ۇيلەردى ءسۇرۋدىڭ ۇزاققا سوزىلىپ كەتۋى" ياعني، سۇرىلەتىن ۇيلەردىڭ يەلەرى باسپانالارىن مەملەكەت ۇسىنعان باعاعا ساتۋعا كەلىسپەگەن.

بۇعان دەيىن قالا اكىمى احمەتجان ەسىموۆ الماتى مەتروسىنداعى جاڭا "سايران" جانە "ماسكەۋ" ستانسيالارى 2014 جىلدىڭ ءبىرىنشى جەلتوقسانىندا اشىلاتىنى تۋرالى  مالىمدەگەن بولاتىن. 1988 جىلدىڭ قىركۇيەگىندە باستالعان الماتى مەتروسىنىڭ قۇرىلىسى بىرنەشە رەت توقتاپ، اراعا شيرەك عاسىر سالىپ، العاشقى جەتى ستانسياسىن 2012 جىلى 1 جەلتوقسان كۇنى ىسكە قوسقان. مەترو اشىلعاندا جىل سايىن ءبىر ستانسيادان قوسىلاتىنى ايتىلعان بولاتىن.

قامشى-اقپارات