ەلىمىزدىڭ ىشكى ميگراسياسى مەن ۋربانيزاسيا جاعدايىنا دەپۋتات نۇرتاي سابيليانوۆ الاڭداۋشىلىق ءبىلدىردى. بۇل تۋرالى kaz.tengrinews.kz حابارلادى. دەپۋتات: «سوڭعى كەزدە قازاقستاننىڭ بىرنەشە ايماقتارىنداعى اۋىل حالقىنىڭ كوشۋ ۇدەرىسى تىم جيىلەپ بارادى. كوپتەگەن ادامدار تۇرعىلىقتى جەرىن تاستاپ، قالاعا قاراي اعىلۋدا. اسىرەسە ولاردىڭ باسىم كوبى الماتى مەن استاناعا قاراي قونىستانۋعا ۇمتىلىپ وتىر»، - دەگەن.

حالىق قالاۋلىسىنىڭ ايتۋىنشا، ەلىمىزدە حالىق سانى ۇلعايىپ كەلە جاتقانىنا قاراماستان، قازاقستاننىڭ كەيبىر ايماقتارىنداعى حالىق سانى مەيلىنشە ازايۋدا. ونىڭ ەسەبىنشە، سوڭعى ون جىلدا سولتۇستىك قازاقستان وبلىسىنان 100 مىڭ ادام كوشىپ كەتكەن، ال شىعىس قازاقستاننان -60 مىڭ، قوستاناي وبلىسىنان -35 مىڭ، اقمولا وبلىسىنان -15 مىڭ ادام باسقا ايماقتارعا قونىس اۋدارعان. ەگەر وسىلاي جالعاسا بەرەتىن بولسا، وندا تۇتاستاي ەلدىمەكەندەردىڭ بارلىعىن قازاقستان كارتاسىنان سىزىپ تاستاۋعا تۋرا كەلەدى ەكەن. "ماسەلەن، سوڭعى بەس جىلدا شىعىس قازاقستاندا 70 مەكتەپ جابىلعان. بۇل دەگەنىمىز، 70 جۋىق ەلدىمەكەن يەسىز قالدى دەگەندى بىلدىرەدى"، - دەيدى دەپۋتات.

ءماجىلىس دەپۋتاتىنىڭ پىكىرىنشە، قاڭىراپ قالعان اۋىلداردىڭ بويىنا قايتا قان جۇگىرتۋ ءۇشىن ول جاققا قاراي ورالمانداردى تارتۋ كەرەك.  بۇل رەتتە مەملەكەت ورالمانداردى بوساعان ايماقتارعا جىبەرىپ، وندا ولارعا قولعابىس ەتۋى ءتيىس. ستاتيستيكا كوميتەتىنىڭ مالىمەتىنشە، 2014 جىلدىڭ 1 شىلدەسىندە قازاقستان حالقىنىڭ سانى 17 ميلليون 284 مىڭ ادامعا جەتكەن. ونىڭ ىشىندە قالا حالقى - 55،1 پايىز، ال اۋىل حالقى - 44،9 پايىزدى قۇرايدى.

قامشى-اقپارات